Kutyoka 4
4
Akunnungu akumpa che Musa ukombole wakupanganya yakusimonjeka
1Che Musa ŵajanjile Akunnungu, “Iŵaga Ŵaisilaeli ngaaja kungulupilila une namose kumbikanila, chajile kuti, Ambuje Akunnungu nganankopochela mmwe.” 2Pelepo Ambuje Akunnungu ŵausisye che Musa, “Nkamulile ichichi mu nkono wenu?” Ŵajanjile, “Lubokola.” 3Ambuje Akunnungu ŵatite, “Nluponye paasi.” Che Musa ŵaluponyisye paasi lubokola, lwasandwiche lijoka! Che Musa ŵautwiche. 4Nipele, Ambuje Akunnungu ŵansalile che Musa, “Njongole nkono wenu ni kulikamula ku nchila.” Che Musa ŵaujongwele nkono ni ŵalikamwile, lijoka lyasandwiche lubokola mu nkono mwakwe. 5Ambuje Akunnungu ŵatite, “Nkatende yelei paujo pa Ŵaisilaeli, akulupilile yakuti, Ambuje Akunnungu, Akunnungu ŵa achambuje ŵao, Akunnungu ŵa che Ibulahimu ni che Isaka ni che Yakubu nankopochele.”
6Sooni, Ambuje Akunnungu ŵansalile che Musa, “Njinjisye nkono wenu mu nguo pantima wenu.” Che Musa ŵaujinjisye, paŵaukopwesye nkono ula waliji ni matana gamaswela mbee. 7Nipele Ambuje Akunnungu ŵansalile, “Njinjisye sooni nkono wenu mu nguo pantima wenu.” Che Musa ŵaujinjisye nkono wao pantima. Ni paŵaukopwesye nkono wao walamile, waujilile mpela uwaliji kuundanda. 8Ambuje Akunnungu ŵansalile che Musa, “Iŵaga ngaja kumpikanila pane kuchikulupilila chakusimonjeka chaandanda, komboleka chaachikulupilile chakusimonjeka chaaŵili. 9Nambo naga ngaja kuikulupilila yakusimonjeka iŵili yo, pane kulipilikanila liloŵe lyenu, chinteche meesi mu lusulo lwa Naili ni kugajitila palitaka. Ni meesi go chigasanduche miasi palitaka.”
10Nambo, che Musa ŵaasalile Ambuje Akunnungu, “Alakwe Ambuje, une ngangukombola kuŵecheta uchenene chitandilile kalakala namose sambano panguŵecheta ni mmwe, nguŵecheta mbolembole ni kwa chimeme.” 11Ambuje Akunnungu ŵambusisye, “Ana ŵaani ŵajigumbile kang'wa ja mundu? Pane ŵaani ŵaakuntenda mundu aŵeje jwangaŵecheta pane jwangapikana? Kulola pane ungalola? Ana ngaŵa une Ambuje Akunnungu? 12Nipele sambano njaule! Une chinankamusye nkombole kuŵecheta ni kunjiganya yakuŵecheta.”
13Nambo che Musa ŵatite, “Alakwe Ambuje ngunchondelela muntume mundu jwine.” 14Pelepo chikali cha Ambuje Akunnungu ku che Musa chawoneche, ŵatite, “Ana nganapagwa jwankulu jwenu che Haluni Mlawi? Nguimanyilila kuti jwelejo akukombola kuŵecheta yambone. Sooni, akwika kukunchingamila, nombewo chasangalale muntima pakummona mmwejo. 15Chinkunguluche nawo ni kwasalila yose ichaakajileje. Une chinjinkamusya ŵanyamwe kuŵecheta ni kunjiganya ichinkaitendekanye. 16Che Haluni chaŵechete ni ŵandu pamalo penu, ni mwe chinchiŵa mpela ila Akunnungu kukwao. 17Njigale lubokola lu mmakono mwenu, ni chinkatende yakusimonjeka kwa lubokola lu.”
Che Musa akuujila ku Misili
18Nipele che Musa ŵausile ku che Yetulo akwegwao ni kwasalila, “Choonde muuneche nyaule kwa achalongo ŵangu ku Misili ngaalole naga ali ŵajumi.” Che Yetulo ŵasalile, “Njaule kwa chitendewele.”
19Ambuje Akunnungu ŵansalile che Musa akanaŵe kutyoka ku Midiani, “Mbujile ku Misili pakuŵa aŵala ŵandu ŵaŵasachile kumbulaga awile.” 20Kwayele, che Musa ŵanjigele ŵankwakwe ni ŵanache ŵao ŵaakwesisye pa mbunda ni kuutanda ulendo kuujila ku Misili. Ŵajigele lubokola mmakono mwakwe mpela ila iŵatite pakusalilwa ni Ambuje Akunnungu alujigale.
21Ambuje Akunnungu ŵansalile che Musa, “Pachinkaiche ku Misili, nlolechesye kuti nkutenda paujo pa mwenye aila yakusimonjeka inampele. Nambo une chinaulimbisye ntima wa mwenye, nombewo ngaŵalechelela Ŵaisilaeli atyoche. 22Ni mwe chimunsalile mwenye jo kuti, Ambuje Akunnungu akuti, ‘Isilaeli ali mwanangu jwannume jwa kwitiwo! 23None ngunsalila, munneche mwanangu ajaule kuti akaambopelele nambo nkukana. Sano, chinammulaje mwanagwenu jwannume, jwa kwitiwo.’ ”
24Ali mwitala kuuja ku Misili, che Musa ŵaŵisile chigono, Ambuje Akunnungu ŵasimene nawo, ni kusaka kwaulaga. 25Nipele che Sipola ŵankwawo che Musa, ŵajigele liganga lyakutema ni kumbumbasya mwanagwe jwachilume, ŵaujigele nsumbu ula ni kuugwisya pa makongolo ga che Musa achitiji, “Kusyene mwejo ndi ŵankwangu ŵa myasi.” 26Kwayele Ambuje Akunnungu nganiŵaulaga che Musa, che Sipola ŵankwawo ŵatite, “Ndi wankwangu wa myasi,” kwaligongo lya kuumbasya.
27Ambuje Akunnungu waasalile che Haluni, “Njaule kwipululu nkasimane ni che Musa.” Nipele, che Haluni ŵajawile, ŵaasimene che Musa kuchitumbi cha Akunnungu ni kwakomasya kwakwanonyela. 28Nombe che Musa ŵansalile che Haluni maloŵe gose ga Ambuje Akunnungu gaŵaatumile, ni yakusimonjeka yose iŵalajisye atende. 29Kwayele che Musa ni che Haluni ŵajawile ni kwasonganganya achachekulu wose ŵa Ŵaisilaeli. 30Che Haluni ŵasasile maloŵe gose ga Ambuje Akunnungu gaŵalajichisye che Musa, ni che Musa ŵatesile yakusimonjeka mbujo mwa ŵandu, 31ŵandu ŵaakulupilile. Paŵapilikene kuti, Ambuje Akunnungu ŵaichilile kukwakamusya, nikuti akuweni kulaga kwao, ŵajinamisye mitwe jao ni kwapopelela.
നിലവിൽ തിരഞ്ഞെടുത്തിരിക്കുന്നു:
Kutyoka 4: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
