Kutyoka 39
39
Yakuŵala ya Ŵambopesi
(Kutyoka 28:1-14)
1Che Besaleli ni che Oholiabu ni ŵakamusi ŵao ŵakolosisye iwalo yeswela ya ŵambopesi kwa nguo jeswela mbee jajiluchikwe kwa usi wa chibuluu ni sambalau ni wechejeu, iwalo yaakuwalaga paakutumichila Peuto Papaswela. Ŵakolosisye iwalo ya che Haluni mpela AMBUJE iŵannajisye che Musa.
2Ŵaakolochesye nguo jakuunichila pantima kwa nguo jeswela mbee jajiluchikwe kwa usi wa sahabu ni langi ja chibuluu ni sambalau ni jechejeu. 3Ŵandu wo ŵasyanile sahabu ni ŵalenjilelenjile jiŵe usi, kuti aluchile kumo ni usi wa chibuluu ni wa sambalau ni wachejeu ni kutotela mu nguo jeswela mbee. 4Ŵapangenye ipande iŵili nti migoji pekoyo jetotekwe pamo pachanya nguo jakuunichila pantima kila upande, kuti akombole kulitaŵa. 5Mpumbulu wepote yambone nnope pachanya pakwe, wakutaŵilila waliji chindu chimo ni nguo jakuunichila pantima jo, ni wakolochekwe kwa nguo jeswela mbee jepotekwe ni kutotekwa kwa usi wa sahabu ni chibuluu ni sambalau ni wechejeu, ilaila mpela AMBUJE iŵannajichisye che Musa.
6Ŵasepile maganga ga sadoniki, ni ŵagamatile mu ikodobwa ya sahabu. Yasepekwe chisau yakuti kulembelemba chimanyisyo, ni kugalemba meena kumi na mbili ga ŵanache ŵachilume ŵa che Yakubu. 7Ŵagajigele maganga go ni kugamatila mu ikodobwa ni ikodobwa yo ŵaitaŵilile pa ipande iŵili ya mmakoyo ya mu nguo jakuunichila pantima iŵe chikumbuchisyo kwa ngosyo kumi na mbili sya Isilaeli, mpela AMBUJE iŵansalile che Musa.
Kasaku ka pantima
(Kutyoka 28:15-30)
8Nombewo ŵakolosisye kasaku kakuwala pantima mpela muŵatotile nguo jakuunichila pantima jila. Ŵakolosisye kwa nguo jeswela mbee jepotekwe ni kutotekwa kwa usi wa sahabu ni chibuluu ni sambalau ni wechejeu. 9Kasaku ko kaliji kepinde kaŵili ni kulandana uleu wakwe ni nchijipi mwakwe kwa sentimita ishilini na mbili. 10Kasaku ko ŵakaŵisile misitali ncheche ja maganga ga ndalama. Msitali waandanda waliji wa maganga ga akiki ni topasi ni alumasi jechejeu. 11Msitali waaŵili ŵaŵisile maganga ga sumalidi ni johali ja samawiti ni alumasi, 12msitali waatatu ŵaŵisile maganga ga yasinto ni akiki jechejeu ni ametisito, 13ni msitali wancheche ŵaŵisile maganga ga sabalajadi ni sadoniki ni yasipi. Maganga gose go ŵagamatile mu ikodobwa ya sahabu. 14Kwaliji ni maganga kumi na mbili gagaliji ni meena mugaŵelele meena ga ŵanache ŵa che Yakubu. Kila liganga lyasepelwe nti chimanyisyo chachili ni liina limo mwa meena ga ngosyo kumi na mbili sya Isilaeli. 15Ŵakapanganyichisye kasaku ka pantima kala mikufu ja sahabu jakusalala jajipotekwe nti ngonji. 16Ŵakolosisye ikodobwa iŵili ya sahabu ni pete siŵili sya sahabu, ni kusitaŵilila pete syo pa songa siŵili sya kasaku kakuwala pantima ko. 17Mikufu jiŵili jajipotekwe jo ŵajitaŵilile mu pete sisili pa songa siŵili sya kasaku kakuwala pantima ko. 18Songa siŵili sine sya mikufu jiŵili jo ŵasimatile mu ikodobwa iŵili ya mmakoyo mwa nguo jakuunichila pantima. 19Ŵakolosisye pete siŵili sya sahabu ni kusitaŵilila mu songa siŵili sya paasi, chamunkati mwa kasaku kakuwala pantima kuŵandikana ni nguo jakuunichila pantima. 20Ŵakolosisye pete sine siŵili sya sahabu ni kusikamulisya chapaujo pa songa sya paasi pa ipande iŵili ya nguo jakuunichila pantima, peuto papakulumbikana ni mpumbulu wanchiunu wauluchikwe kwakusalalila. 21Ŵakalumbikenye kasaku kakuwala pantima ko pa nguo jakuunichila pantima kwa kuŵika pete syakwe ni nguo jakuunichila pantima kwa ngonji sya chibuluu, yalumbikenywe ni aula mpumbulu kuti kasaku ko kakatyoka ni kulekangana ni nguo jakuunichila pantima, mpela AMBUJE iŵannajisye che Musa.
Yakuwala ine yachimbopesi
(Kutyoka 28:31-43)
22Ŵatotile nkogo wakuwala munkati mwa nguo jakuunichila pantima kwa chitambaa cha buluu. 23Nkogo wo wakwete pakwinjichisya ntwe pasikati jakwe ni mumbali lipesa lyo mwatotekwe mwakulimbila kusyunguchisya lipowo lyose kuti lipowo lyo likapapuka. 24Mu lujenje lwa nkogo wo chapaasi ŵakolosisye indu mpela makomamanga gagalelembaga kwa nguo jeswela mbee ni kutotekwa kwa usi wa chibuluu, ni sambalau ni wechejeu. 25Ŵakolosisye njuga sya sahabu jakusalala ni makomamanga ni kutotela mwakupisyanisya kusyungulila lujenje lwa nkogo. 26Kwayele ŵaŵisile mwakupisyangana njuga ni makomamanga kusyungula lujenje lwa nkogo kuti che Haluni awaleje katema kakupanganya msengo ga umbopesi mpela AMBUJE iŵannajisye che Musa.
27Ni ŵanluchile che Haluni ni achiŵanagwe minjilo jo kwa nguo jeswela mbee, 28ni chilemba cha nguo jeswela mbee ni ipeu ya nguo syeswela mbee ni budula sya nguo jeswela mbee jajiluchikwe, 29ni mipumbulu ja nguo jeswela mbee jajiluchikwe yambone kwa langi jachibuluu ni sambalau ni jechejeu, mpela AMBUJE iŵannajisye che Musa.
30Ŵapanganyisye chibati kwa sahabu jakusalala chachikulosya uswejelo ni kuchilemba nti chimanyisyo pachanya pakwe maloŵe gagakuti, “Atyosekwe kwa AMBUJE.” 31Nipele ŵachitaŵilile chibati cho paujo pa chilemba chila kwa ngonji sya chibuluu mpela AMBUJE iŵannajichisye che Musa.
Kumalila kwa masengo
(Kutyoka 35:10-19)
32Nipele masengo ga kutaŵa Lisakasa Lyakusimanilana ni Akunnungu gamalile. Ŵaisilaeli ŵatesile yose mpela AMBUJE iŵatite pakwalajichisya che Musa. 33Ni ŵampelechele che Musa Lisakasa Lyakusimanilana ni Akunnungu ni yoombo yose ya mu Lisakasa lyo, pamo ni iunichilo yakwe ni ikulusisya yakwe ni mafelemu gakwe pamo ni igingi yakwe ni njanamila syakwe ni itamichilo yakwe. 34Iyoyo ŵapeleche chiunichilo cha mapende ga ngondolo tonde, chachitajikwe langi jechejeu, chiunichilo cha mapende gakwepepala ga inyama ni nguo jalusasa jakulekanganya Peuto Papaswela Nnope ni Peuto Papaswela. 35Lisanduku lya Lilangano ni itela yakwe yakunyakulila ni chiunichilo cha Lisanduku lya Lilangano yaani peuto pachanasa, 36pamo ni mesa ni yoombo yakwe yose, ni mikate jajikuŵichikwa paujo pa AMBUJE, 37ni chindu chakuŵichila lumuli cha sahabu jakusalala, imuli yakwe, yoombo yakwe yose pamo ni mauta gakwe. 38Iyoyo ŵaichinawo chilisa cha sahabu chakututumichisya ubani ni mauta gakwajitilila ŵandu ni indu yetyosekwe kwa AMBUJE ni ubani wakununjila ni nguo jalusasa ja pannango wa Lisakasa Lyakusimanilana ni Akunnungu, 39ni chilisa chekolochekwe ni shaba ni lwau lwakwe lwa shaba pamo ni itela yakunyakulila ni yoombo yakwe yose ni ntala wa shaba wakunaŵila ni chitamichilo chakwe. 40Nguo sya lusasa sya lutenje ni njanamila syakwe ni itamichilo yakwe pamo ni nguo jalusasa ja pannango wa lutenje ni itaŵililo yakwe ni njanamila syakwe ni igingi yakwe ni yoombo yose yaikusachilwa kwa ligongo lya Lisakasa Lyakusimanilana ni Akunnungu. 41Iwalo yose yatotekwe ukoto, yaikuwalikwa kwaligongo lya kutumichila Peuto Papaswela, yaani iwalo yeswela ya jwambopesi che Haluni ni achiŵanagwe kwa ligongo lya masengo ga chimbopesi. 42Ŵaisilaeli ŵapanganyisye masengo gose malinga ni AMBUJE iŵatite pakwalajisya che Musa. 43Che Musa ŵagalolite masengo naga gapanganyikwe yambone, ŵaiweni kuti gapanganyikwe nti yatite kulajisya AMBUJE. Kwapele che Musa ŵaapele upile.
നിലവിൽ തിരഞ്ഞെടുത്തിരിക്കുന്നു:
Kutyoka 39: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
