Kutyoka 35

Makanyo ga lyuŵa lya kupumulila.

1Che Musa ŵaasongangenye Ŵaislaeli wose ni ŵaasalile, “Yelei ili indu yannajisye AMBUJE mpanganye; 2mpanganye masengo kwa moŵa sita nambo lyuŵa lya saba chiliŵe Lyuŵa Lyakupumulila lyakwachimbichisya AMBUJE. Mundu jwalijose jwachapanganye masengo lyele lyuŵa lyo akusachilwa aulajikwe. 3Ngasinkolesya mooto mmajumba mwenu pa Lyuŵa Lyakupumulila.”

Sadaka ja Lisakasa Lyakusimanilana ni Akunnungu.

(Kutyoka 25:1-9)

4Che Musa ŵaasalile Ŵaisilaeli, “Ayi ni yalamwile AMBUJE: 5Ntyose sadaka kwa AMBUJE. Mundu jwalijose jwali ni ntima wakutosya, champelechele AMBUJE sahabu, feza, ni shaba ni, 6usi wa langi ja chibuluu, sya sambalau ni jechejeu, nguo jeswela mbee ni manyunya ga mbusi. 7Mapende ga tonde ja ngondolo gagatajikwe langi jechejeu, ni mapende gakwepepala ni mbao sya misonobali, 8ni mauta ga mseituni kwaligongo lya mimuli, ni indu yakununjila yakukolochesya mauta gakwajitilila ŵatyosyekwe kwa AMBUJE ni kwaligongo lya ubani wakununjila; 9ni maganga ga ndalama gagakuŵilanjikwa shohamu, ni maganga gane ga ndalama gagakuŵichikwa pa nguo jakuunichila pantima ni kasaku kakuwala pantima.”

Indu ya mu Lisakasa Lyakusimanilana ni Akunnungu.

(Kutyoka 39:32-43)

10“Mundu jwalijose jwali ni umanyilisi wa masengo pasikati ŵanyamwe chaiche kupanganya yose yalajisye AMBUJE: 11Akolosye Lisakasa Lyakusimanilana ni Akunnungu ni iunichilo yakwe pamo ni ikulusisya yakwe, mafelemu gakwe, igingi yakwe, ni njanamila syakwe pamo ni itamichilo yakwe. 12Lisanduku lya Lilangano ni itela yakunyakulila ni chiunichilo cha Lisanduku lya Lilangano, ni nguo jalusasa ja Peuto Papaswela, 13pamo ni mesa ni itela yakwe yakunyakulila pamo ni yoombo yakwe yose ni mikate jajikuŵichikwa paujo pa Ambuje Akunnungu; 14ni chindu chakuŵichila lumuli pamo ni yoombo yakwe yose, imuli yakwe pamo ni mauta gakwe, 15ni chilisa cha kututumichisya ubani pamo ni itela yakwe ni mauta ga kwajitilila ŵatyosyekwe kwa AMBUJE ni ubani wakununjila, nguo jalusasa ja pannango wa Lisakasa Lyakusimanilana ni Akunnungu. 16Chilisa cha mbopesi sya kutinisya pamo ni lwau lwakwe lwa shaba pamo ni itela yakunyakulila ni yoombo yakwe yose, ntala wa shaba wakunaŵila ni chitamichilo chakwe. 17Nguo sya lusasa sya lutenje ni njanamila syakwe, ni itamichilo yakwe ni nguo jalusasa ja pannango wa lutenje 18igingi ya Lisakasa Lyakusimanilana ni Akunnungu ni sya lutenje pamo ni itaŵililo yakwe; 19iwalo yaitotekwe ukoto, yakuwala jwambopesi che Haluni Peuto Peswela ni iwalo ine ya achiŵanagwe paakutumika pa masengo ga chimbopesi.”

Ŵandu akwikanayo indu yakupeleka kwa Akunnungu.

20Nipele nsongano wa nkutule wa Ŵaislaeli watyosilenje paujo pa che Musa. 21Mundu juŵasachile kutyosya yakupeleka pangaakanganichisya ŵaichenawo yakutyosya ni kwatyochesya AMBUJE, ligongo lya masengo ga Lisakasa Lyakusimanilana ni Akunnungu, ligongo lya iwalo ya ŵambopesi. 22Kwayele ŵandu wose ŵaŵaliji ni mitima ja kutyosya kwakusaka, achalume ni achakongwe ŵaichenao ipini, pete ni mikufu ni yakulikwatulila ni yombo yakupisyangana ya sahabu, ni kila mundu ŵantyochesye AMBUJE indu ya sahabu. 23Sooni mundu jwalijose ŵaaichenao chachili chose chaŵakwete chinga ngonji syasili ni langi ja chibuluu, sambalao, jechejeu, nguo jeswela mbee, mapende gakwepepela gatajikwe langi jechejeu. 24Jwalijose jwaŵakombwele kupeleka madini ga feza ni shaba ŵaasiichisye nao kwa AMBUJE iŵe yakupeleka yakwe. Sooni mundu jwalijose jwakwete mbao sya nnosobali nombejo ŵaichenasyo. 25Achimmasyeto wosepe ŵaŵaakombwele kuluka ŵaasiichenao indu siŵaaluchile sya langi sya buluu, sambalao ni syasichejeu ni nguo syeswela mbee. 26Ni achimmasyeto wose ŵaŵasachile ni ŵaŵaliji ni ukombole ŵaasinjile manyunya ga mbusi. 27Ilongola ŵaichenao maganga gakusalala ga sadoniki ni maganga ganegane kwaligongo lya kugamatila mu nguo jakuunichila pantima ni mu kasaku kakuwala pantima. 28Iyoyo ŵaichenao mauta ga mseituni kwaligongo lya mimuli, indu ya kununjila yakupanganyichisya mauta ga kwajitilila ŵatyosyekwe kwa AMBUJE ni kwaligongo lya ubani wakununjila yambone. 29Ŵaisilaeli wose achalume ni achimmasyeto, ŵaŵaliji ni lung'wanu muntima mwao ŵaichenayo indu yo nti yakupeleka kwaligongo lya masengo ga AMBUJE gaŵalajichisye che Musa kugapanganya.

Ŵakutaŵa Lisakasa

(Kutyoka 31:1-11)

30Nipele che Musa ŵaasalile Ŵaisilaeli; “Nnolanje! AMBUJE ansagwile che Bezaleli mwanache ju che Uli, jwali mwanache ju che Huli, jwa lukosyo lwa Yuda. 31Nombejo ŵaangumbesye mbumu jwa AMBUJE, ŵaampele ukombole ni lunda ni umanyilisi mu uwele wauli wose wa masengo, 32kuti aganisye yakuti kulembalemba indu yauŵeleuŵele ni kwa kutumia madini ga sahabu, feza, ni shaba akolosye indu yo, 33naapele umanyilisi wa kukatanya maganga ga ndalama ni kugaŵika mu ikodobwa ni kusepa itela, ni atumiche kwa masengo gane gose ga ufundi. 34Nombe AMBUJE ŵaagumbesye umanyilisi jwelejo ni che Oholiabu, mwanache ju che Ahisamaki jwa lukosyo lwa Dani, kuti ŵaajiganye ni ŵane. 35Ŵaapele umanyilisi wa kupanganya masengo ga uŵeleuŵele gagakupanganyikwa ni ŵandu ŵali ni umanyilisi. Masengo go gali: kusepa kupota kusalalisya kwa usi wa chibuluu, sambalau ni wechejeu ni nguo jeswela mbee ni ŵakuluka. Ŵanawose waliji mafundi ni wakuganichisya kwa uhodali.”

നിലവിൽ തിരഞ്ഞെടുത്തിരിക്കുന്നു:

Kutyoka 35: YBV

ഹൈലൈറ്റ് ചെയ്യുക

പങ്ക് വെക്കു

പകർത്തുക