2 Mamwenye 25

Musi wa ku Yelusalemu akugumulikwa

(2 Indu ya katema 36:13-21; Yeremiah 52:3b-11)

1Pa chaka cha tisa cha utawala wa mwenye che Sedekia, pa lyuŵa lya kumi lya mwesi wa kumi, Nebukadineza mwenye jwa ku Babeli ŵapite kuugungumuchila musi wa ku Yelusalemu. Ŵaŵisile chigono paasa musi ni ŵaunjiche litaka kuti akolosye paakwelela mmapupa mbande syose kuti ŵaagungumuchile ŵandu ŵa musi wo. 2Musi ŵajendelechele kusyungulwa mpaka pa chaka cha kumi na moja cha utawala wa mwenye wa che Sedekia. 3Lyuwa lya tisa lya mwesi wa ncheche, kwaliji ni sala jakunuunga pa musi, nganichipagwa chakulya chilichose kwa ligongo lya ŵandu ŵa musi wo. 4Nipele lipupa lya musi wo lyagumulikwe, nombe ŵangondo wose ŵautwiche katema ka chilo, ŵapitile pannango uwaliji pasikati mapupa gaŵili chiŵandi ni ngunda wamwana wa mwenye, nachiŵamuno ŵangondo ŵa ku Babeli ŵaliji ausyungwile musi, ŵautwiche achipitaga ku chipululu cha ku Alaba kwaula ku chiŵata ch lusulo lwa Yolodani. 5Nambo ŵangondo ŵa ku Babeli ŵankuiye mwenye ni kunsimana ku iŵata ya ku Yeliko. Ŵangondo ŵakwe wose ŵannesile ni kupwilingana, 6ni ŵakamulikwe. Nipele, ŵanjawisye kwa mwenye jwa ku Babeli ku musi wa ku Libila ko pamalo pati ŵanlamwile. 7Ŵauleje achiŵanagwe che Sedekia nsyene ali nkulola, nipele ŵagakusile meeso gakwe, ŵantaŵile kwa magwedegwede ga shaba ni ŵanjawisye ku Babeli.

Nyuumba ja Ambuje Akunnungu jikonasikwa

(Yeremiah 52:12-23)

8Pa lyuŵa lya saba pa mwesi wa tano pa chaka cha kumi na tisa cha utawala wa Nebukadineza mwenye jwa ku Babeli, che Nebusaladani jwankulu jwa ŵakulindilila ŵa mwenye, ni nkamusi jwa mwenye jwa ku Babeli, ŵajinjile ku Yelusalemu. 9Ŵachomile Nyuumba ja Ambuje Akunnungu, ni nyuumba ja chimwenye ni nyuumba syose sya ku Yelusalemu, kila nyuumba ja mundu jwakumanyika jachomekwe mooto. 10Nombe ŵangondo wose ŵa ku Babeli ŵaŵaliji pamo ni jwankulu jwa ŵakulindilila ŵa mwenye ŵagumwile mapupa gagasyungwile musi wa Yelusalemu. 11Che Nebusaladani juŵaliji wankulu jwa ŵakulindilila ŵa mwenye, ŵaapeleche ku usami ŵandu wose ŵaŵasigalile ku musi ni aŵala wose ŵaŵasigalile pamo ni ŵangondo wose ŵaŵalipeleche achinsyene kwa mwenye jwa ku Babeli. 12Nambo ŵaalesile ŵandu ŵane ŵaŵaliji ŵakulaga nnope ŵa mmusi. Ŵalesile agose migunda ja misabibu ni migunda jine. 13Ŵangondo ŵa ku Babeli wakasenye ipandeipande imila ya shaba iyaliji pa Nyuumba ja Ambuje Akunnungu, pamo ni itamichilo yakwe, ntawala wekulungwa wa shaba uwaliji pa Nyuumba ja Ambuje Akunnungu, ŵajijigele shaba mpaka ku Babeli. 14Iyoyopeyo ŵajigele iŵiga, masepetu, mikasi jakukatila utambi ni yoombo ya lilongo ni yombo yose ya shaba iyatumikaga pa Nyuumba. 15Jwankulu jwa ŵakulindilila ŵa mwenye ŵajigele iteso ni mabakuli ga kunyuluchisya miasi ni kila choombo cha sahabu jakusalala ni choombo cha madini ga feza. 16Shaba jose jiŵatumie mwenye che Selemani kukolochesya imila iŵili ni ntala wekulungwa ula ni itamichilo kwa ligongo lya pa Nyuumba ja Ambuje Akunnungu nganilikomboleka kulipima chisilo chakwe. 17Kila chimila chaliji ni uleu wa mita nane, pachanya pakwe paliji ni ntwe wa shaba, uleu wa kila ntwe waliji mita moja na lobo. Kila ntwe ŵasyunguchiswe ni yakusalalisya ya isogosi ya chitela chachikuŵilanjikwa makomamanga, yose ya shaba.

Ŵandu ŵa ku Yuda akujigalikwa ku usami

(Yeremiah 52:24-27)

18Nipele che Nebuzaladani jwankulu jwa ŵakulindilila ŵa mwenye ŵaakamwile che Selaya jwambopesi jwankulu, ni che Sefania jwambopesi nkamusi pamo ni achakulu ŵakulindilila pa minango jitatu. 19Kutyochela kwa aŵala ŵaŵaliji chiŵela pa musi, ŵanjigele jwankulu jumpepe juŵaajimililaga ŵangondo ŵamachili pamo ni ŵandu nsano ŵaŵaliji ŵashauli ŵa mwenye. Iyoyo ŵanjigele jwakulemba juŵaliji jwankulu juŵajimililaga kwajandika ŵangondo, pamo ni ŵandu ŵakwe sitini, ŵaŵasimanikwe pa musi wa Yelusalemu. 20Che Nebusaladani jwankulu jwa ŵakulindilila ŵaajigele ŵandu wo, ŵaapeleche kwa mwenye jwa ku Babeli ako ku Libila. 21Kwele ku Libila ko, ku chilambo cha Hamati, mwenye jwa ku Babeli ŵalamwile kuti ŵandu wo ataŵililwe. Kwayele ŵandu ŵane wose ŵa ku Yuda ŵajigalikwe migole kwatalika ni chilambo chao.

Che Gedalia akutendekwa jwankulu jwa ku Yuda

(Yeremiah 40:7-9; 41:1-3)

22Che Nebukadineza mwenye jwa ku Babeli ŵansagwile che Gedalia mwana jwa che Ahikamu, chisukulu cha che Shafani, aŵe jwakwajimilila ŵandu wose ŵaŵaalesile ku Yuda. 23Achakulu ŵa ŵangondo wose pamo ni ŵandu ŵao paŵapikene yakuti mwenye jwa ku Babeli ansagwile che Gedalia aŵe jwankulu, ŵanjaulile che Gedali ako ku Misipa. Ŵandu wo ŵaliji che Ishumaeli mwana jwa che Netania ni che Yohanani mwana jwa che Kalea ni che Selaya mwana ja che Tanihumeti Mnetofati ni che Yesania mwana jwa che Maaka pamo ni ŵandu ŵaŵaliji pamo nawo. 24Nombe che Gedalia ŵalumbilile paujo pao ni ŵandu ŵakwe, achitiji, “Nkajogopa ligongo lya achakulu ŵa ku Babeli. Ntame pachilambo pa muntumichile mwenye jwa ku Babeli ni indu yose tiinjendele yambone.” 25Pa mwesi wa saba, che Ishumaeli mwana jwa che Netania, chisukulu cha che Elishama juŵaliji jwa ntundu wa chimwenye, ŵaiche kwa che Gedalia achilonganaga ni ŵandu kumi, ŵangungumuchile che Gedalia, ŵammuleje. Iyoyopeyo, ŵauleje Ŵayahudi ni ŵandu ŵa ku Babeli ŵaŵaliji pamo nao ku Misipa ko. 26Pelepo ŵandu wose, ŵaangamanyika ni ŵakumanyika pamo ni ilongola ŵa ŵangondo ŵao, ŵatyosile, ŵatilile ku Misili, ligongo ŵajogopaga Ŵakalidayo.

Che Yehoyakini akulechelelwa kutyochela mu nyumba ja kutaŵilwa

(Yeremiah 52:31-34)

27Pa chaka cha selasini na mbili, che Evili Melodaki mwenye jwa ku Babeli, paŵatandite kutawala, chaka chichocho ŵanlechelele che Yehoyakini mwenye jwa ku Yuda, ŵantyosisye mu nyuumba ja kutaŵilwa. Lyele lyaliji lyuŵa lya ishilini na saba ja mwesi wa kumi na mbili, chaka cha selasini na saba kutandilila che Yehoyakini paŵajigalikwe migoli. 28Mwenye ŵa ku Babeli Ŵakungulwiche yambone ni Che Yehoyakini mwenye jwa ku Yuda ni kwaluchimbichimbi kupunda iŵatesile mamwenye ŵane ŵa ku Babeli ŵaŵannongolele. 29Nipele, che Yehoyakini ŵausile yakuwala yakwe ya mu nyuumba ja kutaŵilwa ni kutandilila katema ko ŵaliji nkulya pamo ni mwenye mu atame wakwe wose. 30Sooni kila lyuŵa, mwenye jwa ku Babeli ŵaliji nkwapa mwenye che Yehoyakini indu iyaasoŵaga mu utame wakwe wose.

നിലവിൽ തിരഞ്ഞെടുത്തിരിക്കുന്നു:

2 Mamwenye 25: YBV

ഹൈലൈറ്റ് ചെയ്യുക

പങ്ക് വെക്കു

പകർത്തുക