1 Indu ya katema 22
22
1Nipele che Daudi ŵatite, “Nyuumba ja Ambuje Akunnungu tijiŵe pamalo pa, ni sooni chilisa chakupelechela mbopesi jakutinisya cha Ŵaisilaeli.”
Kuŵika chile pakutaŵa Nyuumba ja Ambuje Akunnungu.
2Nipele, che Daudi ŵalamwile kuti achalendo uŵatamaga pa chilambo cha ku Isilaeli asongangane, ni ŵapele masengo ga kupanganya. Ŵasagwile ŵaumanyilisi wa kutaŵa majumba kuti asepe yambone maganga ga kutaŵila nyumba ja Akunnungu. 3Nombe che Daudi ŵatyosisye isyano yejinji ya kukolosesya nyuumba jo pamo ni misumali ni iugalilo ya mmilango ja nyumba, ni shaba syejinji syangapimika. 4Sooni ŵatyosisye mbao sya mielesi syangaŵalanjikwa, pakuŵa Ŵasidoni ni ŵandu ŵa ku Tilo ŵannyichisye che Daudi mbao syejinji nnope. 5Che Daudi ŵalisalile muntima mwao, “Mwanangu che Selemani bado nganakule ni nganasyoŵelele. Nyuumba jitajitaŵe kwa ligongo lya Ambuje Akunnungu jikusachilwa jiŵe jakusalala nnope, ni jakulapikwa ni pachilambo pose. Kwayele tinjalinganyichisya.” Che Daudi ŵalinganyisye chile akanaŵe kuwa.
6Nipele che Daudi ŵammilasile che Selemani mwanagwao, ŵannajisye ŵataŵile nyumba Ambuje Akunnungu, Akunnungu ŵa ku Isilaeli. 7Che Daudi ŵansalile che Selemani, “Mwanangu, chinduchi chaliji muntima mwangu, kwataŵila nyumba Ambuje Akunnungu, Akunnungu ŵangu kuti napopelele. 8Nambo Ambuje Akunnungu ŵaasalile une, ‘Mmwe mmuleje ŵandu achajinji kwa kuputana ngondo jekulungwa, mmwe ngamundawila nyumba pakuŵa mmuleje ŵandu achajinji paujo pangu pachilambo pa. 9Namose yeleyo, chinkole mwanache, jutachiŵa jwachitendewele ligongo une chinampe chitendewele paujo pa ŵammagongo ŵakwe ŵaali kosekosepe. Lina lyakwe chaŵilanjikwe che Selemani, pakuŵa chinjapa Ŵaisilaeli chitendewele ni kutulala mmoŵa ga utawala wakwe. 10Ŵelewo ni utachindaŵila une nyuumba. Chaŵe mwanache jwangu none chime atatigwe, ni uŵelesi wakwe chiutawale Isilaeli moŵa gose pangali mbesi.’ ”
11Che Daudi ŵajendelechele kusala, “Sambano mwanangu, Ambuje Akunnungu, Akunnungu ŵenu aŵe pamo ni mmwe kuti nkombole kwataŵila nyuumba mpela yatite kunsalila. 12Ambuje Akunnungu ampe lunda ni umanyilisi, katema patachimmika kuŵa chilongola jwa Ŵaisilaeli, njitichisye malajisyo gao Ambuje Akunnungu, Akunnungu ŵenu. 13Mwalilolechesyaga pa kutenda indu, ni mwakamulisyaga makanyo gati Ambuje Akunnungu, ŵampele che Musa kwaligongo lya Ŵaisilaeli, indu yenu tiinjendele yambone. Nlimbangane ni kukola ntima wangajogopa. Ngasinjogopa namose ngasimpwa ntima. 14Njalile kwannope kuti najiŵichile mbiko nyuumba ja Ambuje Akunnungu, tani elufu tatu na mia nne ya sahabu ni tani elufu salasini na nne ya madini ga feza. Pamo ni yeleyo, gapali madini ga shaba ni chisyano gangaŵalanjikwa, miisile chilechilepe mbao pamo ni maganga, nambo nkusachilwa njonjechesye. 15Nkwete ŵandu achajinji ŵakupanganya masengo, apali ŵakusepa maganga, ŵakutaŵa majumba, maselemala ni ŵandu ŵali ni umanyilisi wakupisyangana, 16ŵakusyana saabu, madini ga fesa, shaba ni chisyano. Elo, ntande masengo! Ambuje Akunnungu awe pamo ni mmwe!”
17Nipele che Daudi ŵaalajisye ilongola wose ŵa ku Isilaeli ŵaakamusye che Selemani mwanagwe, achitiji, 18“Uli, Ambuje Akunnungu, Akunnungu ŵenu nganaŵa pamo ni ŵanyamwe? Uli, nganampa chitendeŵe nkati mbande syose? Ŵelewo ŵandendekasisye naapute achinsyene chilambo chino ni kuundenda naatawale, ni sambano jino alinji ŵandu ŵa Ambuje Akunnungu pamo ni ŵandu ŵao. 19Sambano mwatumichile Ambuje Akunnungu, Akunnungu ŵenu kwa kuchalila ni ntima wose. Njimuchanje nkaataŵile Ambuje Akunnungu malo jajikukundikwa kwa kwapopelela kuti Lisanduku lya Lilangano lya Ambuje Akunnungu pamo ni yoombo yao yose yaikukundikwa kwa kwapopelela Ambuje Akunnungu yaikutumika pakupopela, iŵichikwe mu Nyuumba jajitawikwe kwaligongo lya Ambuje Akunnungu.”
നിലവിൽ തിരഞ്ഞെടുത്തിരിക്കുന്നു:
1 Indu ya katema 22: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.