1 Indu ya katema 17
17
Utenga wa che Natani ku che Daudi
(2 Samweli 7:1-17)
1Mwenye che Daudi paŵatamaga mu likome lya umwenye, lyuŵa limo ŵansalile jwakulondola che Natani, “Nnole, une ngutama mu nyuumba jakusalala jajitawikwe ni itela ya mielezi, nambo Lisanduku lya Lilangano lya Ambuje Akunnungu likutama mu lisakasa.”
2Che Natani ŵaasalile che Daudi, “Ntende chachili chose chinkuchiganisya muntima mwenu, pakuŵa Akunnungu ali pamo ni mmwe.”
3Nambo chilo pechila, liloŵe lya Ambuje Akunnungu lyannyichilile che Natani, kuti, 4“Njaule nkaasalile jwakutumichila jwangu che Daudi, Ambuje Akunnungu akuti nnyi, ‘Mmwe ngamuundawila nyuumba jakuti ndame mwelemo. 5Kutandilila katema kanalongwesye ŵaisilaeli atyoche ku Misili mpaka lelojino, nganindame mu nyuumba. Naliji jwakusamasama kutyochela mu lisakasa limo mpaka lisakasa line, ni kutyochela malo jimo mpaka malo jine. 6Uli, palipose panaapite ni Ŵaisilaeli, naausisye ŵakulamula ŵao ŵaaliwose ŵanalajisye ŵaagose ŵandu ŵangu, kwachichi nganimuundaŵila nyuumba ja itela ya mielezi?’ ”
7“Kwayele munsalile jwakutumichila jwangu che Daudi kuti, Ambuje Akunnungu ŵa machili gose akuti nnyi ‘Nantyosisye mwitinji kumwachingaga ngondolo, kuti mme jwankulu jwa ŵandu ŵangu Ŵaisilaeli. 8Kutandilila katema ko mele pamo ni mmwe kulikose kumwajawile ni naauleje ŵammagongo ŵenu wose paujo penu. Tinantende mme jwakumanyika mpela achakulu ŵane ŵapachilambo pano. 9None tinaasagulile ŵandu ŵangu Ŵaisilaeli pamalo pakutama, ni tinjatamika kweleko kuti akole malo gawogawope gakutama pangali ŵakwasausya sooni. Ni ŵandu ŵakakatima ntima ŵakutumia machili ngasiŵaalagasya sooni nti kuundanda po, 10kutandilila katema panaasagwile ilongola kwaligongo lya ŵandu ŵangu Ŵaisilaeli, une tinankulupusye ni ŵammagongo ŵenu wose. Kupunda ni yeleyo, une Ambuje Akunnungu nguntangachisya kuti tinantaŵile nyuumba. 11Ndaŵi jitinchiwa, ni pitachinsika mmalembe ga achatati ŵenu, jumo jwa ŵanache ŵenu jutimummeleche mmwe mwasyene tinjintenda mwenye pamalo penu, ni une tinjiulimbikasya umwenye wakwe. 12Jwelejo ni jutachitaŵa nyuumba kwaligongo lya liina lyangu ni chitengu chakwe cha umwenye tinjichilimbisya moŵa gose pangali mbesi. 13Une tinjiŵa atatigwe, nombejo tachiŵa mwanangu; nambo ngasinautyosya unonyelo wangu kukwakwe mpela inatite kuutyosya ku che Shauli mwenye juŵannongolele. 14Nambo tinjintamika mu nyuumba jangu ni umwenye wangu tiuŵe wa moŵa gose pangali mbesi, ni chitengu chakwe cha umwenye tichipunde kulimbangana.’ ”
15Jwakulondola che Natani ŵaasalile che Daudi indu yose malinga iyatite kuunukula Akunnungu.
Mapopelelo ga che Daudi ga kwatogolela Akunnungu
(2 Samweli 7:18-29)
16Nipele mwenye che Daudi ŵajinjile mu lisakasa ni kutama paujo pa Ambuje Akunnungu, ni kupopelela achitiji, “Alakwe Akunnungu, uneji nduni ni uŵelesi wangu ali ŵani kwampaka muundendele yeleyo yose? 17Pakonjechesya yeleyo, muundendele ine yejinji, mumichile chilanga kwa iŵelesi yangu ya mmbujo alakwe Ambuje Akunnungu! 18Nansalile chichi chakupunda, uneji che Daudi jwakutumichila jwenu, kwa kunjimbikasya kwanti yele? Alakwe muumanyi une jwakutumichila jwenu. 19Alakwe Ambuje Akunnungu, kwaligongo lya jwakutumichila jwenu ni malinga ni usache wenu, ntesile chindu chachikulungwa chi, kuti imanyiche ipanganyo yekulu yose. 20Pangali jwine mpela mmwe, alakwe Ambuje Akunnungu, ni yatukuipikana yose ikulosya kuti pangali Akunnungu ŵane nambo mmwemwe pe. 21Sooni ŵandu chi pachilambo pa ŵaali mpela ŵandu ŵenu Ŵaisilaeli, ŵanyawo pe Akunnungu ni umwakulupwisye kuti aŵe ŵandu ŵenu? Alakwe mwalikusisye liina lyenu mwasyene kwa kupanganya indu yekulungwa ni yakusimosya pamwatopwele ŵandu ŵa ilambo ine paujo pa ŵandu ŵenu umwakopwesye kutyochela ku Misili. 22Mwatesile ŵandu ŵenu Ŵaisilaeli aŵe ŵandu ŵenu moŵa gose pangali mbesi, Nombe alakwe Ambuje Akunnungu, mmele Akunnungu ŵao.”
23“Nipele sano, alakwe Ambuje Akunnungu, nlilimbikasye liloŵe lyenu limmechete moŵa gose pangali mbesi kuung'amba une jwakutumichila jwenu ni nkati achalongo ŵangu. 24Ni liina lyenu chiliŵe lyekulu moŵa gose pangali mbesi, nombe ŵandu tajile kuti, ‘Ambuje Akunnungu ŵa machili gose, Akunnungu ŵa ku Isilaeli, elo ali Akunnungu pa Isilaeli!’ Ni achalongo ŵangu, uneji che Daudi jwakutumichila jwenu, tijilimbangane paujo penu. 25Pakuŵa alakwe Akunnungu ŵangu, muumunukulile une jwakutumichila jwenu kuti uŵelesi wangu tachiŵa mamwenye. Nipele une jwakutumichila jwenu ngupopela mwakulimbangana. 26Sambano alakwe Ambuje Akunnungu, alakwe nli Akunnungu, muunanjile une jwakutumichila jwenu, chelechi chindu chambone chi. 27Kwayele nkundile kwapa upile ŵandu ŵamu nyuumba jangu, une jwakutumichila jwenu, kuti jitamilisye moŵa gose pangali mbesi paujo penu, pakuŵa chinkuchipa upile alakwe, chikuŵa ni upile moŵa gose pangali mbesi.”
നിലവിൽ തിരഞ്ഞെടുത്തിരിക്കുന്നു:
1 Indu ya katema 17: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.