1 Indu ya katema 14
14
Masengo ga che Daudi ku Yelusalemu
(2 Samweli 5:11-16)
1Nipele mwenye che Hilamu jwa ku Tilo ŵaatumile ŵantenga ku che Daudi, nombe ali ajigele mitambala ja itele ya Mielesi, ni ŵandu ŵa kutaŵa majumba ni maselemala, kuti akaataŵile nyuumba che Daudi. 2Nipele che Daudi ŵaimanyilile kuti Ambuje Akunnungu ŵaatesile aŵe mwenye jwa Ŵaisilaeli ni kuti autesile umwenye wakwe uŵe wakulimbangana kwaligongo lya ŵandu ŵakwe Ŵaisilaeli.
3Ku Yelusalemu ko, che Daudi ŵalombele achakongwe achajinji, ni ŵakwete ŵanache ŵachilume ni achiŵali achajinji. 4Gele ni mena ga ŵanache ŵaŵaŵeleche ku Yelusalemu ko, che Shamua ni che Shobabu ni che Natani ni che Selemani, 5ni che Ibihali ni che Elishua ni che Elipeleti, 6ni che Noga ni che Nefegi ni che Yafia, 7che Elishama ni che Beeeliada ni che Elifeleti.
Che Daudi akwapunda Ŵafilisiti
(2 Samweli 5:17-25)
8Ŵafilisiti paŵapilikene kuti che Daudi akamulikwe umwenye wa chilambo chose cha Isilaeli, ŵatyosile ni ŵangondo ŵao wose ŵajawile kukwasosa. Nambo che Daudi paŵapilikene ngani syo ŵatyosile kwaula kukuputana nawo. 9Ŵafilisiti ŵaiche ni kutanda kwagungumuchila ŵandu ŵa ku Lichemba lya ku Lefaimu. 10Nipele, che Daudi ŵausisye Akunnungu, “Uli, nyaule kukwaagungumuchila Ŵafilisiti? Uli chimundendasye naapunde?”
Nombe Ambuje Akunnungu ŵaasalile, “Njaule, chinantendekasye mwapunde.”
11Nipele, che Daudi ŵapite ku Baali Pelasimu ni ŵaapundile kweleko, ŵatite, “Akunnungu ŵaakumbile ŵammagongo ŵangu kwa machili gangu, nti chikumba meesi.” Nipele, ŵapaŵilasile pamalo po Baali Pelasimu malumbo gakwe “Akunnungu ŵakulosya litala.” 12Ŵafilisti paŵatisile, ŵailesile inyago ya minungu jawo ni che Daudi ŵalamwile inyago yose ichomekwe mooto.
13Nipele, Ŵafilisiti ŵaagunguluchile ŵandu ŵa ku chiŵata cho kaaŵili. 14Katema ko che Daudi ŵausisye soni Akunnungu, Akunnungu ŵajanjile, “Ngasimwagunguluchila kutyochela apano, nambo nsyungule njaule chiŵandi ni itela yaikuŵilanjikwa Misolofaji, ni nkaagunguluchile kutyochela kweleko. 15Nipele pachimpilikane misindo ja kwenda kwa ŵangondo jilinkutyochela ku jili misolofaji, pelepo ntyoche nkaputane ngondo. None chinongolele kwaputa ŵangondo ŵa Ŵafilisiti.” 16Che Daudi ŵatesile mpela yatite kulamulikwa ni Akunnungu. Ŵaaputile ŵangondo ŵa Ŵafilisiti kutandulila ku Gibeoni mpaka ku Geseli. 17Che Daudi ŵapikaniche ku chilambo chosope, nombe Ambuje Akunnungu ŵatendekasisye ŵandu ŵa ilambo yose ŵaajogope che Daudi.
നിലവിൽ തിരഞ്ഞെടുത്തിരിക്കുന്നു:
1 Indu ya katema 14: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.