मत्ती 25

दश अड्लाई कुइयां केरि मिसाल

1तैखन यीशुए अपने चेलन सेइं ज़ोवं, ज़ैखन मैन्हेरू मट्ठू यानी अवं वापस एज्जेलो तैस मौके सुर्गेरू राज़ तैन दश अड्लैई कुइयां केरू ज़ेरू भोल्हु, ज़ैना अपनि मिसालां बैलतां लाड़े सेइं मिलनेरे लेई निस्सी। 2तैन मां पंच़ बेवकूफ थी, पन पंच़ अक्लमन्द थी। 3ज़ैना बेवकूफ थी तैनेईं मिसालां त नी, पन होरो तेल साथी न नियो। 4“पन ज़ैना अक्लमन्द थी तैनेईं मिसालां केरे अलावा कुप्पन मां होरो तेल भी साथी नियो।” 5लाड़ो एजने च़िर लग्गू, ते तैना सब बलगते-बलगते डिगरी लेई देने, ते झ़ुल्‍ली जेई।

6“अध्धी रात भोइ त शौर मच़ी कि लाड़ो एवरोए, ते तैस सेइं मिलनेरे लेई एज्जा। 7तैखन सैरी अड्लैई कुइयां बींझ़ी, ते अपनि-अपनि मिसालां ठीक केरने लेगि। 8बेवकूफ कुइयेईं अक्लमन्द अड्लैई कुइयन सेइं ज़ोवं, ‘अपने तेले मरां थोड़ो ज़ेरो तेल असन भी देथ, किजोकि इश्शी मिसालां हिश्शने लेवरिन।’ 9पन अक्लमन्द कुइयेईं जुवाब दित्तो, ‘असन कां एत्रो तेल नईं, कि इश्शे लेई ते तुश्शे लेई पूरो भोए, तुस एरू केरा कि बेच़नेबालन करां आनां।’ 10ज़ैखन तैना तेल घिन्ने च़ेलोरी थी त तेत्रे मां लाड़ो पुज़ी जेव, ते ज़ैना तियार थी, तैना लाड़े सेइं साथी अन्तर ड्लाहेरे घरे मां च़ेलि जेई, ते दार बंद केरतां छ़डू। 11बादे मां तैना होरि अड्लैई कुइयां भी वापस पुज़ी ते लाड़े जो ज़ोने लेगि, ‘प्रभु! प्रभु!’ इश्शे लेई दार खोल्‍ल। 12पन तैनी जुवाब दित्तो, ‘अवं तुसन सेइं सच़ ज़ोताईं, अवं तुसन न ज़ैंनी।’ 13एल्हेरेलेइ खबरदार राथ, किजोकि तुस मेरे वापस एजनेरे दिहाड़ेरे बारे मां न ज़ानथ।”

तोड़ां केरि मसाल

(लूक. 19:11-27)

14ज़ैखन मैन्हेरू मट्ठू यानी अवं वापस एज्जेलो त सुर्गेरू राज़ तैस मैन्हेरो ज़ेरू भोनूए, ज़ै दूर मुल्खे जेव, तैनी अपने नौकर कुजाए ते सारी दौलत तैन दित्ती, ते तैन ज़ोवं एस दौलती सेइं होरि भी कमाई केरा। 15“तैनी एक्‍की पंच़ तोड़े दित्ते होरि दूई तोड़े दित्ते, ते एक्‍की अक्‍के तोड़ो#25:15 तोड़ो: अक तोड़ो परहने सालां केरि कुमैयारे बराबर थियो। दित्तो, हर एक्‍की तैसेरे काबलीतरे मुताबिक दित्ते, ते एप्पू होरि मुल्खे जो च़लो जेव।” 16ज़ैस नौकरे पंच़ तोड़े मैल्होरे थिये, तैनी गेइतां कारोबार केरतां पंच़ तोड़े होरे कमाए। 17एन्च़रे ज़ैस नौकरे दूई तोड़े मैल्होरे, तैनी दूई होरे कमाए। 18पन ज़ैस नौकरे अक तोड़ो मैल्होरो थियो, तैनी मित्ती घेड़तां मालिकेरी रकम छ़ुपेइतां छ़डी।

19बड़े च़िरेरां पत्ती तैन केरो मालिक वापस अव, ते नौकरन सेइं हिसाब केरने लगो कि तैनेईं तैन तोड़ां केरू कुन कियूं। 20“ज़ैस नौकरे पंच़ तोड़े मैल्होरे थिये, तैनी गेइतां पंच़ होरे तोड़े हाज़र कमाए ते ज़ोने लगो, ‘हे मालिक तीं पंच़ तोड़े दित्तोरे, ते हेर मीं पंच़ तोड़े होरे कमाए।’ 21मालिके तैस सेइं ज़ोवं, ‘शाबाश ईमानदार नौकरा तीं थोड़ी ज़ेरि रकमी पुड़ ईमानदैरी सेइं कम कमाव, अवं तीं बेड़ि चीज़ां केरो मुख्तियार बनालो, ते अपने मालिकेरी खुशी मां शामल भो।’”

22ते ज़ैस दूई तोड़े मैल्होरे थिये, तै भी अव ते ज़ोने लगो, “हे मालिक तीं मीं दूई तोड़े दित्तोरे थिये, ते हेर मीं दूई तोड़े होरे कमाए।” 23मालिके तैस सेइं ज़ोवं, “शाबाश ईमानदार नौकरा तीं थोड़ी ज़ेरि रकमी पुड़ ईमानदैरी सेइं कम कमाव, अवं तीं बेड़ि चीज़ां केरो मुख्तियार बनालो, ते अपने मालिकेरी खुशी मां शामल भो।”

24ते ज़ैस अक तोड़ो मैल्होरो थियो, त तै भी हाज़र भोव ते ज़ोने लगो, “हे मालिक अवं ज़ानतो थियो तू बड़ो सखत मैन्हु आस, तू तैस मैन्हेरो ज़ेरोस ज़ैनी ऊडारे मां फसल नईं बेवरी ते तै तैट्ठां फसल कटते।” 25एल्हेरेलेइ अवं डरो कि अगर अवं तेरी दौलत हरेइलो त तू मीं सज़ाह देलो, तांए तेरी दौलत मीं ज़मीनी मां देबतां छ़डी, हेर, “तेरी दौलत ई आए।” 26तैसेरे मालिके जुवाब दित्तो, हे दुष्ट ते निकम्मे नौकरा अगर तीं पतो थियो, कि अवं तैस मैन्हेरो ज़ेरोईं ज़ैनी ज़ैस ऊडारे मां नईं बेवरू त तैट्ठां कटते। 27त तीं एन लोड़तू थियूं कियोरू, कि मेरी दौलत शौकारां केरे हवाले केरस, तैखन अवं वापस एइतां अपनि दौलत सूते समेत उसुल केरेथो। 28हुनी एन केरा कि एस करां तै तोड़ो नेइतां तैस देथ ज़ैस कां दश तोड़ेन। 29एल्हेरेलेइ ज़ैस कां परमेशरेरी मर्ज़ी समझ़नेरी इच्छा आए, तैस परमेशर जादे समझ़ देलो। पन ज़ैस कां परमेशरेरी मर्ज़ी समझ़नेरी इच्छा नईं, तैस केरां, थोड़ी ज़ेरि समझ़ ज़ै तैस कां आए, तै भी नी गाली। 30ते एस निकम्मे नौकरे बेइर आंधरे मां छ़ड्डा, ज़ैड़ी ऐह लेरां देंतो ते दंत च़ापतो राए।

यीशु दुनियारो न्याय केरेलो

31ज़ैखन मैन्हेरू मट्ठू यानी अवं, अपने महिमा मां अपने स्वर्गदूतन सेइं साथी एज्जेलो त अपने महिमारे तखते पुड़ बिशतां लोकन पुड़ राज़ केरेलो। 32सैरी कौमां मीं कां अकोट्ठी भोल्ही, ते धर्मी लोक बुरे लोकन करां अलग किये गानेन, ज़ेन्च़रे पुहाल भैड्डन, छ़ेल्‍लन मरां अलग केरते। 33ते अवं धर्मी लोकन सेइं ज़ैना मेरे देइने पासे भोल्हे, ते बुरे लोकन ज़ैना मेरे बांए पासे भोल्हे। 34तैखन राज़ो यानी अवं अपने देइने पासेरे लोकन सेइं ज़ोलो, “एज्जा मेरे बाजेरे धन लोकव इन राज़, ज़ैन दुनियारे शुरू मां तुश्शे लेई तियार कियोरूए। 35किजोकि अवं नियन्नो थियो, ते तुसेईं मीं रोट्टी खुवाई, अवं ट्लिशोरो थियो, ते तुसेईं मीं पानी पियांव अवं परदेशी थियो, ते तुसेईं अवं अपने घरे मां कुजव। 36अवं नग्गो थियो, ते तुसेईं मीं लिगड़ां दित्तां, ते अवं बिमार थियो, ते तुसेईं मेरी हेरगेश की अवं कैद थियो, ते तुस मीं मिलने आए।”

37तैखन तैना धर्मी मैन्हन ज़ोलो, “हे प्रभु असेईं कैखन तू नियन्नो लाव, ते असेईं तीं रोट्टी खुवाई या तू ट्लिशोरो थियो, ते असेईं तीं पानी पियांव।” 38असेईं कैखन परदेशी सेमझ़तां तू अपने घरे मां रख्खो, या तू नग्गो थियो, ते असेईं तीं लिगड़ां दित्तां? 39ते अस कताली तीं बिमार या कैद लेइतां तीं सेइं मिलने आए? 40तैखन राज़ो यानी अवं जुवाब देलो, “कि अवं तुसन सेइं सच़ ज़ोताईं कि ज़ैखन तुसेईं इन लोकन सेइं ज़ैनेईं मीं पुड़ विश्वास कियो एक्‍की सेइं भी एरो बर्ताव कियो त एन बुझ़ा कि एन तुसेईं मीं सेइं कियूं।”

41तैखन तै बांए पासे बालन सेइं ज़ोलो, “हे लानती लोकव मेरे तुत्तरे अगरां तैस हमेशारी बैलती अग्गी मांजो गाथ, ज़ै परमेशरे, शैतान त कने शैतानेरे दूतां केरे लेई तियार कियोरीए। 42एल्हेरेलेइ ज़ैखन अवं नियन्नो थियो, ते तुसेईं मीं रोट्टी न खुवाई अवं ट्लिशोरो थियो, ते तुसेईं मीं पानी न पियांव। 43अवं परदेशी थियो, ते तुसेईं अवं अपने घरे मां न रख्खो, अवं नग्गो थियो, ते तुसेईं मीं लिगड़ां न दित्तां, ते अवं बिमार ते कैद थियो, ते तुस मीं सेइं मिलने न आए।”

44तैखन तैना लोक भी ज़ोले, “हे प्रभु असेईं कताली तू नियन्नो या ते ट्लिशोरो या परदेशी ते नग्गो या बिमार या कैद लाव ते असेईं तेरी सेवा न की?” 45तैखन अवं अपने बांए पासेरे लोकन जुवाब देलो, “अवं तुसन सेइं सच़ ज़ोताईं कि ज़ैखन तुसेईं मेरे इन निकड़े करां निकड़े लोकन पुड़ ज़ैना मीं पुड़ विश्वास केरतन एक्‍की सेइं भी एरो ज़ेरो बर्ताव कियो त एन बुझ़ा कि एन मीएं सेइं कियूं। 46एल्हेरेलेइ एन लोकन हमेशारे लेई सज़ाह भोल्ही, पन धर्मी लोकन हमेशारी ज़िन्दगी मैल्हेली।”

നിലവിൽ തിരഞ്ഞെടുത്തിരിക്കുന്നു:

मत्ती 25: BHDNT

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക