होशे 4
4
इस्राएल कै खिलाफ परमेसवर का छो
1हे इस्राएलियों, यहोवा का वचन सुणो; इस देश के बासिन्दया कै गैल यहोवा का मुकद्दमा सै। इस देश म्ह ना तो कुछ सच्चाई सै, ना किमे करुणा अर ना कुछ परमेसवर का ज्ञान ए सै। 2उरै श्राप देण, झूठ बोल्लण, हत्या करण, चुराण, अर व्यभिचार करण नै छोड़ कुछ न्ही होन्दा; वे नियम-कायदे की हद नै लाँघकै कुकर्म करैं सैं अर खून ए खून होन्दा रहवै सै। 3इस कारण यो देश विलाप करैगा, अर मैदान के जीव-जन्तु, अर अकास के पक्षियां समेत उसके सारे बासिन्दे कुम्हळा जावैंगे; अर समुन्दर की मछलियाँ भी नाश हो जावैंगी।
4देक्खो, कोए वाद-विवाद ना करै, ना कोए उल्हाणा दे, क्यूँके तेरे माणस तो याजकां तै वाद-विवाद करण आळयां की तरियां सै। 5तू दिन-दोफारी ठोक्कर खावैगा, अर रात नै भविष्यवक्ता भी तेरे गैल ठोक्कर खावैगा; अर मै तेरी माँ का नाश करुँगा। 6मेरे ज्ञान के ना होण तै मेरी प्रजा नाश होगी; तन्नै मेरे ज्ञान ताहीं निकम्मा जाण्या सै, इस करकै मै तेरे ताहीं अपणे याजक के काम कै लायक कोनी ठहरान्दा। इस करकै के तन्नै अपणे परमेसवर के नियम-कायदे ताहीं छोड़ दिया सै, मै भी तेरे बाल-बच्यां नै छोड़ दियुँगा।
7जिसे याजक बढ़दे गये, उसे तरियां वे मेरे खिलाफ पाप करदे गये; मै उनके वैभव कै बदलै उनका अनादर करुँगा। 8वे मेरी प्रजा के पापबलियाँ नै खावैं सै, अर प्रजा के पापी होण की लालसा करैं सैं। 9इस करकै जो प्रजा की हालत होगी, उसीए याजक की भी होवैगी; मै उनके चाल चलण की सजा देऊँगा, अर उनके काम्मां के जिसा उननै बदला देऊँगा। 10वे खावैंगे तो सही, पर छिकैगें न्ही, अर वेश्यागमन तो करैंगे, पर ना बढ़ैंगे; क्यूँके उननै यहोवा की ओड़ मन लगाणा छोड़ दिया सै।
इस्राएल की मूर्तिपूजा
11वेश्यागमन अर दाखमधु अर ताजा दाखमधु, ये तीन्नु बुद्धि नै भ्रष्ट करैं सैं। 12मेरी प्रजा के माणस काठ के पुतळे तै सवाल करैं सैं, अर उनकी छड़ी उननै भविष्य बतावै सै। क्यूँके ओछापण कराण आळी आत्मा नै उन ताहीं बहकाया सै, अर वे अपणे परमेसवर की अधीनता छोड़कै ओछापण करै सैं। 13बांज, चिनार अर छोट्टे बांज दरखतां की छाया आच्छी होवै सै, इस करकै वे उनकै नीच्चै अर पहाड़ां की चोटियां पै यज्ञ करदे#4:13 वे उनकै नीच्चै अर पहाड़ां की चोटियां पै यज्ञ करदे पहाड़ां की चोटियां सुर्ग के घणी धोरै प्रतीत होवैं सैं, ओड़ै की हवा घणी साफ होवै सै, ओड़ै अदीरश्य परमेसवर की उपासना करणा प्राकृतिक भावना अर निष्कपट भगति का सुझाव देवै सै।, अर टील्यां पै धूप जळावैं सैं। इस कारण थारी बेटियाँ ओछापण अर थारी बहुएँ व्यभिचारिणी होगी सै। 14जिब थारी बेटियाँ ओछापण अर थारी बहुएँ व्यभिचार करैं, फेर मै उननै सजा न्ही देऊँगा; क्यूँके थम ए वेश्या कै गैल एक्ले म्ह जान्दे, अर देवदासियाँ के साथी होकै यज्ञ करैं सै; अर जो माणस समझ न्ही राखदे, वे नाश हो जावैंगे।
15हे इस्राएल, यद्यपि तू ओछापण करै सै, फेर भी यहूदा दोषी ना बणै। गिलगाल नै ना आओ; अर ना बेतावेन नै चढ़ जाओ; अर यहोवा के जीवन की कसम कहकै कसम ना खाओ। 16क्यूँके इस्राएल नै हठीली बछिया की तरियां हठ करया सै, के इब यहोवा उननै भेड़ के बच्चे की तरियां लाम्बे-चौड़े मैदान म्ह चरावैगा?
17एप्रैम मूर्तियाँ का संगी होग्या सै; इस करकै उसनै रहण दे। 18वे जिब दाखमधु पी चुके सैं फेर वेश्यागमन करण म्ह लाग जावैं सैं; उनके प्रधान माणस बेजती होण तै घणा प्यार राक्खैं सै। 19आँधी उननै अपणे पंखां म्ह बान्ध कै उड़ा ले जावैगी, अर उनके बलिदानां कै कारण वे लज्जित होवैंगे।
നിലവിൽ തിരഞ്ഞെടുത്തിരിക്കുന്നു:
होशे 4: BGC
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.