यहेजकेल 45
45
धरती का पवित्र हिस्सा
1“जिब थम चिट्ठी गेरकै देश नै बाट्टो, फेर देश म्ह तै एक हिस्सा पवित्र जाणकै यहोवा नै चढ़ाणा; उसकी लम्बाई पच्चीस हजार बाँस की अर चौड़ाई दस हजार बाँस की हो; वो हिस्सा अपणे च्यांरु ओड़ की हद ताहीं पवित्र ठहरै। 2उस म्ह तै पवित्रस्थान कै खात्तर पाँच सौ बाँस लाम्बी अर पाँच सौ बाँस चौड़ी चौकोणी धरती हो, अर उसके च्यांरु ओड़ पचास-पचास हाथ चौड़ी धरती खाल्ली पड़ी रहवै। 3उस पवित्र हिस्सा म्ह थम पच्चीस हजार बाँस लाम्बी अर दस हजार बाँस चौड़ी धरती नै मापणा, अर उसे म्ह पवित्रस्थान बणाणा, जो परमपवित्र ठहरै। 4जो याजक पवित्रस्थान की सेवा टहल करैं अर यहोवा की सेवा पाणी करण नै धोरै आवै, वो उन्हे कै खात्तर हो; ओड़ै उनके घरां कै खात्तर जगहां हो अर पवित्रस्थान कै खात्तर पवित्र ठहरै। 5फेर पच्चीस हजार बाँस लाम्बा, अर दस हजार बाँस चौड़ा एक हिस्सा, भवन की सेवा पाणी करण आळे लेवियाँ की बीस कोठड़ियाँ कै खात्तर हो।”
6“फेर नगर कै खात्तर, चढ़ाए होए पवित्र हिस्से कै धोरै, थम पाँच हजार बाँस चौड़ी अर पच्चीस हजार बाँस लाम्बी, खास धरती ठहराणा; वो इस्राएल के सारे घरान्ने कै खात्तर हो।”
प्रधानां कै खात्तर धरती
7“प्रधान का अपणा हिस्सा पवित्र चढ़ाए होए हिस्से अर नगर की खास धरती की दोन्नु ओड़ यानिके दोनुआ की पश्चिम अर पूर्व दिशा म्ह दोन्नु हिस्यां कै स्याम्ही हों; अर उसकी लम्बाई पश्चिम तै लेकै पूर्व ताहीं उन दो हिस्यां म्ह तै किसे भी एक कै बराबर हो। 8इस्राएल के देश म्ह प्रधान की योए खास धरती हो। अर मेरे ठहराए होए प्रधान मेरी प्रजा पै फेर अंधेर ना करै; पर इस्राएल के घरान्ने नै उसके गोत्रां कै मुताबिक देश मिलै।”
प्रधान कै खात्तर नियम
9“परमेसवर यहोवा न्यू कहवै सै: हे इस्राएल के प्रधानों! बस करो, हुड़दंग अर उत्पात नै दूर करो, अर न्याय अर धर्म के काम करया करो; मेरी प्रजा के माणसां नै लिकाड़ देणा छोड़ द्यो, परमेसवर यहोवा की याए वाणी सै।”
10“थारे धोरै सच्चा तराजू, सच्चा एपा, अर सच्चा बत रहवै। 11एपा अर बत दोन्नु एके नाप के हों, यानिके दोन्नु म्ह होमेर का दसमां अंश समावै; दोन्नु का नाप होमेर के हिसाब तै हो। 12शेकेल बीस गेरा का हो; अर थारा माना बीस, पच्चीस, या पन्द्रह शेकेल का हो।”
13“थारी ठाई होई भेंट या हो, यानिके कणक के होमेर तै एपा का छठवाँ अंश, अर जौ के होमेर म्ह तै एपा का छठवाँ अंश देणा। 14तेल का नियत अंश किनारा म्ह तै बत का दसमां अंश हो; किनारा तो दस बत यानिके एक होमेर के बराबर सै, क्यूँके होमेर दस बत का होवै सै। 15इस्राएल की बढ़िया-बढ़िया चराईयाँ तै दो-दो सौ भेड़-बकरियाँ म्ह तै एक भेड़ या बकरी दी जावै। ये सारी चीज अन्नबलि, होमबलि अर मेलबलि कै खात्तर दी जावै जिसतै उनके खात्तर प्रायश्चित करया जावै, परमेसवर यहोवा की याए वाणी सै। 16इस्राएल के प्रधान कै खात्तर देश के सारे माणस या भेंट देवैं 17त्यौहारां, नये चाँद के दिनां, विश्रामदिनां अर इस्राएल के घरान्ने के सारे सही बखतां म्ह होमबलि, अन्नबलि, अर अर्घ देणा प्रधान का ए काम#45:17 प्रधान का ए काम माणसां की भेंट प्रधानां के हाथां म्ह देणी होवै थी के एक साँझा सामान हो जावै जिस म्ह तै प्रधान हर एक बलिदान कै खात्तर जरूरी सामान ल्यावै। हो। इस्राएल के घरान्ने कै खात्तर प्रायश्चित करण नै वो पापबलि, अन्नबलि, होमबलि, अर मेलबलि त्यार करै।”
त्यौहार
18“परमेसवर यहोवा न्यू कहवै सै: पैहले महिन्ने के पैहले दिन नै तू एक निर्दोष बाछड़ा लेकै पवित्रस्थान नै पवित्र करणा। 19इस पापबलि के लहू म्ह तै याजक कुछ लेकै भवन की चौखट के खम्भयां, अर वेदी की कुर्सी के च्यांरु कुण्यां, अर भीतरी आँगण के फाटक कै खम्भयां पै लगावै। 20फेर महिन्ने के सातवें दिन नै सारे भूल म्ह पड़े होया अर भोळयां कै खात्तर भी योए करणा; इस्से तरियां तै भवन कै खात्तर प्रायश्चित करणा।”
21“पैहले महिन्ने के चौदहवें दिन नै थारा फसह होया करै, वो सात दिन का त्यौहार हो अर उस म्ह अखमीरी रोट्टी खाई जावैं। 22उस दिन प्रधान अपणे अर प्रजा के सारे माणसां के बारै म्ह एक बाछड़ा पापबलि खात्तर त्यार करै। 23त्यौहार के सातों दिन वो यहोवा कै खात्तर होमबलि त्यार करै, यानिके हर एक दिन सात-सात निर्दोष बाछड़े अर सात-सात निर्दोष मिंढे अर हर दिन एक-एक बकरा पापबलि खात्तर त्यार करै। 24हर एक बाछड़े अर मिंढे कै गैल वो एपा भर अन्नबलि, अर एपा पाच्छै हीन भर तेल त्यार करै। 25सातवें महिन्ने के पन्द्रहवें दिन तै लेकै सात दिन ताहीं यानिके त्यौहार के दिनां म्ह वो पापबलि, होमबलि, अन्नबलि, अर तेल इसे विधि कै मुताबिक करया करै।”
നിലവിൽ തിരഞ്ഞെടുത്തിരിക്കുന്നു:
यहेजकेल 45: BGC
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.