निर्गमन 39
39
याजकीय पोशाक बणाणा
1फेर उननै नीले, बैंगणी अर लाल रंग की काढ़ी होई पोशाक पवित्र स्थान की सेवा कै खात्तर, अर हारुन कै खात्तर भी पवित्र पोशाक बणवाई; जिस तरियां यहोवा नै मूसा तै हुकम दिया था।
एपोद बणाणा
2अर उसनै एपोद सोन्ने, अर नीले, बैंगणी अर लाल रंग के कपड़े का, अर सूक्ष्म बटी होई सणी के कपड़े का बणाया। 3अर उननै सोन्ना पीट-पीटकै उसके पत्तर बणाए, फेर पत्तरां नै काट-काटकै तार बणाए, अर तारां नै नीले, बैंगणी अर लाल रंग के कपड़े म्ह, अर सूक्ष्म सणी के कपड़े म्ह कढ़ाई की बणावट तै मिल्या दिया। 4एपोद कै जोड़ण तक उननै उसके कंध्यां पै बन्धन बणाए, वो अपणे दोन्नु सिरयां तै जोड़या गया। 5अर उसनै कसण कै खात्तर जो काढ्या होया पटका उसपै बण्या, वो उसकै गेल्या बिना जोड़ का, अर उस्से की बणावट कै अनुसार, यानिके सोन्ने अर नीले, बैंगणी अर लाल रंग के कपड़े का, अर सूक्ष्म बटी होई सणी के कपड़े का बण्या; जिस तरियां यहोवा नै मूसा तै हुकम दिया था।
6अर उस म्ह उननै सुलैमानी मणि काटकै उन म्ह इस्राएल के बेट्याँ के नाम, जिसा छाप्पा खोद्या जावै सै उस्से तरियां ए खोद्दे, अर सोन्ने के खान्यां म्ह जड़ दिए। 7उसनै उन ताहीं एपोद के कंध्यां कै बन्धनां पै लगाये, जिसतै इस्राएलियाँ कै खात्तर याद कराण आळी मणि ठहरै; जिस तरियां यहोवा नै मूसा तै हुकम दिया था।
सीनाबन्ध बणाणा
8उसनै चपरास ताहीं एपोद की ढाळ सोन्ने की, अर नीले, बैंगणी अर लाल रंग के कपड़े की, अर सूक्ष्म बटी होई सणी के कपड़े म्ह बेलबूट्टे का काम करया होया बणाया। 9चपरास तो चकोर बणी; अर उननै उस ताहीं दोहरा बणाया, अर वो दोहरा होकै एक बित्ता लाम्बा अर एक बित्ता चौड़ा बण्या। 10अर उननै उस म्ह च्यार कतार म्ह मणि जड़ी। पैहली कतार म्ह माणिक्य, पदमराग, अर लालड़ी जड़े गए; 11अर दुसरी कतार म्ह मरकत, नीलमणि, अर हीरा, 12अर तीसरी कतार म्ह लशम, सुलैमानी पत्थर, अर नीलम; 13अर चौथी कतार म्ह फीरोजा, सुलैमानी मणि, अर यशब जड़े; ये सारे न्यारे-न्यारे सोन्ने के खान्यां म्ह जड़े गए। 14अर ये मणि इस्राएल कै बेट्याँ के नाम्मां की गिणती कै मुताबिक बारहा थी; बारहा गोत्रां म्ह तै एक-एक का नाम जिसा छाप्पा खोद्या जावै सै उस्से तरियां ए खोद्या गया। 15अर उननै चपरास पै डोरी की ढाळ गूँथे होए शुद्ध सोन्ने की बेल बणाकै लगाई; 16फेर उननै सोन्ने के दो खान्ने, अर सोन्ने की दो कड़ी बणाकै दोन्नु कड़ियाँ ताहीं चपरास के दोन्नु सिरयां पै लगाया; 17फेर उननै सोन्ने की दोन्नु गूँथी होई जंजीर ताहीं चपरास कै सिरां पै दोन्नु कड़ियाँ म्ह लगाया। 18अर गूँथी होई दोन्नु जंजीर के दोन्नु बाकी सिरयां ताहीं उननै दोन्नु खान्यां म्ह जड़ कै, एपोद कै स्याम्ही दोन्नु कंध्यां कै बन्धनां पै लगाया। 19अर उननै सोन्ने की और दो कड़ी बणाकै चपरास के दोन्नु सिरयां पै उसकी उस कोर पै, जो एपोद कै भीतरी हिस्से म्ह थी, लगाई। 20अर उननै सोन्ने की दो और कड़ी भी बणाकै एपोद के दोन्नु कंध्यां के बन्धनां पै तळै तै उसकै स्याम्ही, और जोड़कै धोरै, एपोद के काढ़े होए पटुके कै उप्पर लगाई। 21फेर उननै चपरास ताहीं उसकी कड़ियाँ कै जरिये एपोद की कड़ियाँ म्ह नीले फित्ते तै इसा बाँध्या, के वो एपोद के काढ़े होए पटुके कै उप्पर रहवै, अर चपरास एपोद तै न्यारे ना होण पावै; जिस तरियां यहोवा नै मूसा तै हुकम दिया था।
और याजकीय पोशाक बणाणा
22फेर एपोद का बागा पूरा नीले रंग का बणाया गया। 23अर उसकी बणावट इसी होई के उसके बीच म्ह बख्तर कै छेद के जिसा एक छेद बण्या, अर छेद कै चौगरदे एक कोर बणी, के वो पाट्टण ना पावै। 24अर उननै उसकै नीच्चै आळे घेरे म्ह नीले, बैंगणी अर लाल रंग के कपड़े के अनार बणाए। 25अर उननै शुद्ध सोन्ने की घंटी भी बणाकै बागै कै नीच्चै आळे घेरे कै चौगरदे अनारां कै बिचाळै लगाई; 26यानिके बागे कै नीच्चै आळे घेरे कै चौगरदे नै एक सोन्ने की घंटी, अर एक अनार फेर एक सोन्ने की घंटी, अर एक अनार लगाया गया के उननै पहरे होए सेवा-पाणी करै; जिस तरियां यहोवा नै मूसा तै हुकम दिया था।
27फेर उननै हारुन, अर उसके बेट्याँ कै खात्तर बुणी होई सूक्ष्म सणी के कपड़े के अंगरखे, 28अर सूक्ष्म सणी के कपड़े की पगड़ी, अर सूक्ष्म सणी के कपड़े की सुन्दर टोप्पी, अर सूक्ष्म बटी होई सणी के कपड़े का जाँघिया, 29अर सूक्ष्म बटी होई सणी के कपड़े की अर नीले, बैंगणी अर लाल रंग की कढ़ाई का काम करी होई पगड़ी; इन सारया ताहीं जिस तरियां यहोवा नै मूसा तै हुकम दिया था उस्से तरियां ए बणाया।
30फेर उननै पवित्र मुकुट की पटड़ी शुद्ध सोन्ने की बणाई; अर जिस तरियां छाप्पे म्ह उस्से तरियां ए ये अक्षर खोद्दे गये, यानिके “यहोवा कै खात्तर पवित्र।” 31अर उननै उस म्ह नीला फीत्ता लगाया, जिसतै वो उप्पर पगड़ी पै रहवै, जिस ढाळ यहोवा नै मूसा तै हुकम दिया था।
काम्मां का पूरा होणा
32इस तरियां मिलापआळे तम्बू के घर का सारा काम पूरा होया, अर जिस-जिस काम का हुकम यहोवा नै मूसा तै दिया था, इस्राएलियाँ नै उस्से कै मुताबिक करया।
33फेर वे निवास नै मूसा कै धोरै ले आए, यानिके घुंडियाँ, तख्ते, बेंड़े, खम्भे, पावे और भी सारी चीज सुधा तम्बू; 34अर लाल रंग तै रंगी होई मिंढयाँ की खाल का ओढ़णा, अर सुइसां की खाल का ओढ़णा, अर बिचाळै का पड़दा; 35डण्ड्याँ सुधा साक्षीपत्र का सन्दूक, अर प्रायश्चित का ढकणा; 36सारी चिज्जां सुधा मेज, अर भेंट की रोट्टी; 37सारी चिज्जां सुधा दीवट, अर उसकी सजावट कै दीवे अर चाँदणा देण कै खात्तर तेल; 38सोन्ने की वेदी, अर अभिषेक का तेल, अर खुशबुदार धूप, अर तम्बू के दरबाजे का पड़दा; 39पीत्तळ की झंझरी, डण्ड्याँ अर सारी चिज्जां सुधा पीत्तळ की वेदी; अर पाये सुधा हौदी; 40खम्भ्यां अर पावे सुधा आँगण के पड़दे, अर आँगण के दरबाजे का पड़दा, अर डोरी, अर खूँटे, अर मिलापआळे तम्बू के निवास की सेवा की सारी चीज; 41पवित्र स्थान म्ह सेवा-पाणी करण कै खात्तर बेलबूट्टे काढ़े होए कपड़े, अर हारुन याजक की पवित्र पोशाक, अर उसके बेट्याँ के कपड़े जिन ताहीं पहरकै उननै याजक का काम करणा था। 42यानिके जो-जो हुकम यहोवा नै मूसा तै दिया था, उस्से कै मुताबिक इस्राएल के माणसां नै सारा काम करया। 43फेर मूसा नै सारे काम की छाणबीन करकै देख्या के उननै यहोवा के हुकम कै मुताबिक सारा कुछ करया सै। अर मूसा नै उन ताहीं आशीर्वाद दिया।
നിലവിൽ തിരഞ്ഞെടുത്തിരിക്കുന്നു:
निर्गमन 39: BGC
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
