Mark 6

Yɛsə kwa Nazarɛt

(MAT 13.53-58; LWK 4.16-30)

1Pa Yɛsə slənyɛ te nyagha ŋkwa kalə kadzembe meleme nya kele ŋkɛ, pa mbeli nyi ketəkwə təkwə begheghe ŋkɛ. 2Ma te veci kezhɛne mpi ne, ntake ŋkɛ kateke nda wəshi ke mbeli mbe cɛ kesəkwə ghə. Mbeli kwele kwele nyi kefate ghena ta ŋkɛ ne, heheɓake hɛ. Ma ke hɛ: «Tema seke nda se ntsehwele nyi wa? Wa nde ndeke nda ntsehwele ba'a berete kemene wəshi meŋele nyi wa? 3Ashɛ gheŋkɛ ya kande feɗe sheghwə, wəzege ta Mari, menəyɛa Zhake, Zhozɛs, Zhəwde ba'a Simon wəka? Ashɛ teke ŋwalea kwɛa meghekɛ hwa gheɓəmə wəka?» Gheŋkɛ nde zhɛrenyɛ kawəsə nya teɗe hɛ ve. 4Ma ke Yɛsə sha hɛ: «Kwele yave nda mbeli ke nde mɛ ŋkwa ya tema tema, ama mbe meleme nya ya ŋkɛ hwa ka menəhɛnyɛ, ki ghɛa ŋkɛ, kwele shɛ ve we.» 5Kekemave hweŋkwa kemene wəshi meŋele ŋkɛ ya kwetɛŋe we, deke kweci ka zereghwe ɓɛhwɛ yakwaɗakɛ hɛ ŋkɛ le dzeve kambete hɛ. 6Heɓake ŋkɛ va nya ɗema yɛ va hɛ.

Yɛsə kaghwene ka təkwə təkwə meŋe bakeghəmbe bake bake

(MAT 10.5-15; LWK 9.1-6)

Pa Yɛsə lə kateke nda wəshi ke mbeli mbe kweci meleme nyi dzeyi yite. 7Pa ŋkɛ tsenete mbelia ŋkɛ meŋe bakeghəmbe, pa ŋkɛ ndeke nda berete te ghəa 'yi'yɛghwə ke hɛ, pa ghwenakɛ hɛ bake bake. 8Ma ke gezete nda ke hɛ: «Mba yɛ kekele kwete wəsə yitea dzeghwa shɛ deke geta, mba yɛ kekele ɗafa, ya slibə ŋkɛ, ya cɛdɛ kwa slibəa ŋayɛ. 9Seɗete mə tsahwa sla, mba yɛ kele lekwesa bake.» 10Ma ke sha hɛ zhɛkwa: «Ma kentsehe yɛ mbe meleme ne, nza mə ki ghɛa wəndə nya kekemaneve ŋayɛ, vaŋe te veci nya teslə yɛ te ŋkwa shɛ. 11Ma keɗema mbeli kekemaneve ŋayɛ ba'a keɗema hɛ kefate ghena ta ŋayɛ ne, slə ŋayɛ mə te ŋkwa shɛ, bekwemte mə keləwə nya te seɗa ta ŋayɛ, gheŋkɛ nde tencɛ nda fete ta nci ke hɛ.» 12Cape mbeli nyi ketəkwə təkwə kalə kageze nda ke mbeli kezha zhɛrete nza ta nci hɛ. 13Pa hɛ ŋkamte 'yi'yɛghwə kwele kwele shave mbe mbeli, mbete ka zereghwe kwele kwele laka sheke n'yi kənəa hɛ.

Mte ta Zhaŋe nya kemene batɛme

(MAT 14.1-12; LWK 9.7-9)

14Pa meghe Hɛrode fate zləvəa Yɛsə, kwa nza ŋkɛ na sləa ŋkɛ kentsehe te yayata ŋkwa. Ma ke kweci mbeli: «Zhaŋe Batiste nde samenyɛ kwa kwele le mpi, vatse nza berete kemene wəsə meŋele ve.» 15Ma ke kweci: «Ɛli.» Ma ke kweci zhɛkwa: «Nde mɛ ŋkwa ŋkɛ kala ka mɛ ŋkwa nyi vəashi.»

16Ma kwa fate Hɛrode, ma ke: «Zhaŋe Batiste nya slamte ghə 'ya te nde samenyɛ kwa kwele le mpi na?» 17Kwa nza ŋkɛ Hɛrode le ghəa ŋkɛ nde gezete nda ke mbeli kakese Zhaŋe ba'a kave ŋkɛ kwa daŋgayɛ tewəmbəreke Hɛrodiyade nya wəmeve ŋkɛ kamale ya tsema nza nde kamale ta Filipe, menənyɛ. 18Kwa nza ŋkɛ ma ke Zhaŋe sha Hɛrode: «Kehi na kakele male ta wəza meyɛ ŋa we.» 19Kazhɛ nda zlɛ ke Hɛrodiyade va Zhaŋe, kaɗe nde kapesle ŋkɛ, ama ŋkwa nta te we. 20Kwa nza ŋkɛ ne, kaghazlənə Hɛrode va Zhaŋe, kwa ɗepe ŋkɛ nahe ŋkɛ kenza kawəndə nya tiɗiɗi ba'a nya keveyi geva tekeleke. Tagha gɛ, pa yakɛ ŋkɛ. Ma kwa fa ghena ta ŋkɛ ŋkɛ ne, kwele kwele tazenyɛ mehele ta ŋkɛ. Ndagwara kaɗe ŋkɛ kafa ghena ta ŋkɛ.

21Pa kwete hɛ menete geva zlɛcɛ le nya ɗe Hɛrodiyade, veci kemene gəsəkəa ya ta Hɛrode. Pa ŋkɛ menete wəsə kezeme kezha mbelia jama, mbeli nyi te ghəa ka sewajɛ ba'a mbeli nyi nza zləvə te hɛ te hɛɗia Galilɛ. 22Pa wəzha ta Hɛrodiyade dzembe cɛa shɛ kawetsete wetse, gwəfə ghəa Hɛrode yite le mbeli nyi hekakɛ ŋkɛ. Ma ke meghe sha wəzha shɛ: «'Yɛwe wəsə nya ɗe na va 'ya, kave ŋa ŋkɛ 'ya.» 23Ma ke zemete nda fela: «Ma yayata nya 'yɛwe na va 'ya ne, kave ŋa wəsə shɛ 'ya, ya kwete kwa bake ta hɛɗi meghea ɗa ŋkɛ.» 24Pa wəzha shɛ shave sha meghekɛ, ma ke 'yɛwete ve: «Wa yahi 'ya ka'yɛwe wa?» Ma ke shɛ: «Ghəa Zhaŋe Batiste.» 25Pɛkwe wəzha nyagha kahe kahe zhɛneke geva sha meghe, ma ke 'yɛwete: «Kaɗe 'ya tsetsenya kandeke ɗa ghəa Zhaŋe Batiste na te parantɛ.» 26Kwele kwele zhɛ nda wənəa meghe, ama kashɛ ɗema va fela nya zemete ŋkɛ te kema ta mbeli nyi hekakɛ nyi ŋkɛ we. 27Pa ŋkɛ ghwenakɛ kwete sewajɛa ŋkɛ te ŋkwa shɛnyɛ le ghena kalə kasla ghəa Zhaŋe. Cape sewajɛa shɛ lə kadzawa daŋgayɛ kasla ghəa Zhaŋe. 28Pa ŋkɛ keleke ghəa shɛ te parantɛ kandeke nda ke wəzha shɛ, pa wəzha shɛ ndeke nda ke meghekɛ. 29Ma kwa fate mbeli nyi ketəkwə təkwə Zhaŋe ne, pa hɛ se kakelete geva ta ŋkɛ kaveyi kwa kwele.

Yɛsə kabehe mbeli slibə mcɛfe

(MAT 14.13-21; LWK 9.10-17; ZHŊ 6.1-14)

30Pa ka ghwene ta Yɛsə zhɛneke geva kase shɛ ba'a gezete nda pɛtɛa wəshi nyi menete hɛ ba'a nyi tekete nda hɛ ke mbeli pɛtɛ. 31Kase nyighɛ ne, kaslə nyighɛ mbeli kwele kwele sha Yɛsə shaŋe hɛ kakemave və kezeme wəsə kezeme. Vatse gɛ, ma ke sha hɛ: «Mbi ɓəmə kalə te ŋkwa nya ɗema mbeli kezha zhɛne mpi ɓɛhwɛ.» 32Cape hɛ kwa kwambelə kaghəa nci kalə kadzete ŋkwa nya ɗema mbeli. 33Ama kwele kwele mbeli nyi kenakɛ nda lə ŋkɛ. Nahe hɛ keɗepete ŋkwa shɛ, kwesayɛ hɛ le hwɛ kalə le seɗa shave mbe meleme pɛtɛ kadzete ŋkwa shɛ, mpelɛa ma hɛ ke yɛ Yɛsə le mbelia ŋkɛ.

34Ma kwa same Yɛsə kwa kwambelə ne, pa nakɛ mbeli tetsene kwele kwele. Ntake helia ŋkɛ kazhɛ nda yitea hɛ, kwa tsenete geva hɛ kala timɛti nyi ɗema wəndə keya hɛ shɛ. Ntake ŋkɛ kateke nda wəshi ke hɛ kwele kwele. 35Ma kwa se tɛhwɛɗi ne, pa mbeli nyi ketəkwə təkwə se sha Yɛsə, ma ke hɛ shɛ: «Hetɛhwɛɗi ŋkwa, ŋkwa nya ne, hwa gamba ŋkɛ.» 36Geze nda ke mbeli nyi kaslə hɛ kazele wəsə kezeme dzeyi mbe meleme ba'a yɛ ghedəkwə nyi dekwede teke. 37Ma ke Yɛsə sha hɛ: «Ɗave nda mə wəshi kezeme ke hɛ le ghəa ŋayɛ.» Ma ke hɛ sha Yɛsə: «Kaɗe na kalə ghen'yɛ kapave ɗafa te slibə bakemsə kezha ve nda ke hɛ kazeme na?» 38Ma ke Yɛsə sha hɛ: «Ŋkwini 'yɛmbe dəghwəa ɗafa va gheyɛ wa? Kwiɗi mə newakɛ mə.» Ma kwa neweve hɛ ne, ma ke hɛ shɛ: «Deke 'yɛmbe dəghwəa ɗafa mcɛfe ba'a kelepe bake ya va ghen'yɛ.»

39Ma kwa sebe ta ŋkɛ, pa geze nda ke hɛ kezha geze nda hɛ ke mbeli kantishɛnji kewəvəsə kewəvəsə te gwəzə nyi menjaɓa tagha. 40Pa hɛ ntishɛ gwəmsə kweci, mcɛfemsə kweci. 41Pa Yɛsə kelete 'yɛmbe dəghwəa ɗafa nyi mcɛfe ba'a kelepe nyi bake. Pa ŋkɛ kafete kema yitea ghweme, tsate nda ŋ'wese ke Shala, neheve ɗafa shɛhɛ mbe ba'a ndeke nda ke mbeli nyi ketəkwə təkwə kezha nehe nda ke mbeli. Pa ŋkɛ neheve nda kelepe nyi bakea shɛhɛ ke hɛ pɛtɛ. 42Pa yayata wəndə zehwe behe. 43Pa mbeli pɛrekɛ kwaciga meŋe bakeghəmbe le kwetiɓəa ɗafa ba'a kelepe nyi ketene. 44Ma mbeli nyi kezehwe ɗafa shɛ ne, zhili slibə mcɛfe.

Yɛsə kadzeghwa te ndərə

(MAT 14.22-33; ZHŊ 6.15-21)

45Te ŋkwa shɛnyɛ kwa sebe ta ŋkɛ ne, pa Yɛsə veyi mbeli nyi ketəkwə təkwə kwa kwambelə kezha jive kema ta ndərə hɛ mpelɛa ma, laka meleme Bɛtesayida, vəa ŋkwa nya geze nda ŋkɛ ke mbeli kalə sha ghɛ. 46Ma kwa beghemte mbeli ŋkɛ ne, pa dzemenyɛ hwa ghweme kezha səkwə Shala. 47Ma kwa se tɛhwɛɗi, nahe kwambelə kenza te tepe ta ndərə, mba Yɛsə pelɛke te hɛɗi kwetɛŋenyɛ. 48Newe ke ne, ka'yɛ mbelia ŋkɛ sefə le kwambelə kwa vɛ ŋkɛ kadzeghəa hɛ. Ma takwa ŋkwa kakiɗi, pa ŋkɛ lə sha hɛ le dzeghwa te yɛmə le seɗa, weli kezlakemte hɛ ŋkɛ. 49Ma kwa nakɛ ŋkɛ hɛ kadzeghwa te yɛmə, mte ke hɛ sha ŋa nci, kɛake hɛ sha lewela. 50Kwa nza ŋkɛ pɛtɛa nci kenakɛ, benake hɛ va ghazlənə. Ama kahe kahe ŋkɛ gezete nda ghena ke hɛ, ma ke sha hɛ: «Hwepete mə ghə, 'ya ŋkɛ, ghazlənəma yɛ ma!»

51Pa dzawa kwambelə yitea hɛ, gweɗakwe sefə. Heheɓake mbeli nyi ketəkwə təkwə, kwele kwele bezenji mehele ta nci. 52Kwa nza ŋkɛ ne, kefave wəsə meŋele nya menete ŋkɛ le ɗafa hɛ we, ntɛaŋe ntɛaŋe ghəa nci.

Yɛsə kambe ka zereghwe te hɛɗia Zhɛnɛzarɛt

(MAT 14.34-36)

53Pa hɛ zlakemte ndərə ba'a ntsehe te hɛɗia Zhɛnɛzarɛt, te ŋkwa nya hwepeyi kwambeləa nci hɛ. 54Samema ta nci kwa kwambelə tsagha ne, nahe mbeli keɗepete Yɛsə. 55Pa hɛ dzeyi mbe pɛtɛa hɛɗia shɛ ba'a fəke ka zereghwe te gezle ta nci, te ŋkwa nya fate hɛ tagha Yɛsə. 56Mbe meleme nyi jama jama, nyi ɓɛhwɛ ɓɛhwɛ ba'a ghedəkwə nyi dzembe ŋkɛ ne, katsene nda ka zereghwe mbeli, kasəkwə hɛ ve kezha kwaɗe ya deke mɛa lekwesa ta ŋkɛ hɛ. Ma yayata wəndə nya kekwaɗakɛ ne, pələsə ŋkɛ.

നിലവിൽ തിരഞ്ഞെടുത്തിരിക്കുന്നു:

Mark 6: BEKDC12

ഹൈലൈറ്റ് ചെയ്യുക

പങ്ക് വെക്കു

പകർത്തുക