Ka Lɛvi 9
9
Dzembe slene ta yɛ Aron le ŋwalea ŋkɛ
1Ma te kwa deghese ta hɛ ne, pa Moyize hekake yɛ Aron le ŋwalea ŋkɛ ba'a mbelia jama ta ka Israyɛl. 2Ma ke sha Aron: «Kelete leve ta sla kezha dzeghe melɛ keyaɓe jaɗafa ba'a game kezha dzeghe melɛ kwa tere tere, nyi ɗema beze te hɛ bake nci. Katedzeghe nda melɛ na le hɛ ke Mahwətə. 3Kwa sebe ta ŋkɛ, ma pa na sha ka Israyɛl: Kelete mə zhɛfa kase kezha dzeghe melɛ keyaɓe jaɗafa, tsagha mca ba'a game nyi keva kwetɛŋe, nyi ɗema beze te, kezha dzeghe melɛ kwa tere tere. 4Kakwa keɗaŋe ne, keseve mə mca ba'a game kezha dzeghe nda melɛ kejikə ghə ke Mahwətə, zlaɓe le wəsə gəməa hə nya kehwaɗe hwaɗe le n'yi. Kwa nza ŋkɛ ma ɓeshi nya ne, katencɛ ŋayɛ ghəa ŋkɛ Mahwətə.»
5Pa hɛ fəke wəshi nyi ɓelate Moyize kase kadzemɛa cɛ lekwesa kebegeme geva, kwa sebe ta ŋkɛ, pa pɛtɛa ka Israyɛl hendeke geva ba'a ghereŋenji kwa kema ta Mahwətə. 6Ma ke Moyize: «Wa nya wəsə nya gezave ŋayɛ Mahwətə kamene, yitea ncɛ ŋayɛ geva zləvəa ŋkɛ nya.» 7Kwa sebe ta ŋkɛ, ma ke sha Aron: «Hendave nda geva ke reghwetɛ shɛ na dzeghekɛ melɛ kekelemte jaɗafa ta ŋa te wənə ba'a melɛ kwa tere terea ŋa. Zhɛne ne, ɓelate gəsəkəa kele jaɗafa seyi te wənə kezha ghəa ŋa ba'a kezha mbeli. Ɓiyitsa ne, dzeghekɛ melɛ kezha mbeli ba'a ɓelate gəsəkəa kele jaɗafa seyi te wənə, kala ghena nya gezete Mahwətə.»
8Pa Aron hendave nda geva ke reghwetɛ ba'a sleyite ghə yitea mca kedzeghe melɛ kezha jaɗafa ta ŋkɛ. 9Pa ŋwale ŋkɛ ndeke nda mimia wəsə keseɗa shɛ. Pa ŋkɛ hahwe wəzege ta dzeve hwe ba'a menate te tereme nyi te reghwetɛ, kwa sebe ta ŋkɛ, pa shekeyi mimi nya ketene yitea seɗa ta reghwetɛ. 10Pa ŋkɛ teremte bela nyi nza merege te, yɛ ghwelese ba'a bela ganyɛ ta mene ta wəsə keseɗa shɛ te reghwetɛ, kala nya gezave nda Mahwətə ke Moyize. 11Ma kaŋa yɛ sli le hweta ne, pa mbeli beteyi hɛ te ghwə, pelɛke te wəmbəa ghedəkwə.
12Pa Aron sleyite ghə yitea game kedzeghe melɛ kwa tere tere. Pa ŋwalea ŋkɛ ndeke nda mimia wəsə keseɗa shɛ, pa yisəyi dzeme vare yɛ bela ta reghwetɛ. 13Pa hɛ fəave nda yɛ ghə le kweci zhɛzhi. Pa ŋkɛ teremte hɛ te reghwetɛ. 14Pa ŋkɛ yaɓemte wəshi nyi kwa hwə ba'a yɛ jajɛghwa, pa teremte hɛ te reghwetɛ, kənəa kweci zhɛzhi.
15Kwa sebe ta ŋkɛ, pa Aron dzeghekɛ melɛ kezha mbeli. Laŋe ŋkɛ te zhɛfa nya keleke mbeli kezha dzeghe melɛ keyaɓe jaɗafa, pa sleyite ghə yite ba'a dzeghekɛ melɛ le, kala nya dzeghekɛ ŋkɛ le mca. 16Pa ŋkɛ fəke wəshi keseɗa nyi bake kezha dzeghe melɛ kwa tere tere ba'a dzeghekɛ le hɛ kala ghena nya kegezete geva. 17Pa ŋkɛ kelete wəsə gəməa hə: pa ntave demake mbe dzeve ba'a teremte te reghwetɛ, kadzevare melɛ kwa tere tere nya kala kiɗi ta ŋkwa. 18Pa ŋkɛ slesleyite ghə yitea yɛ mca le game nyi fəke mbeli kezha dzeghe melɛ kejikə ghə. Pa ŋwalea ŋkɛ ndeke nda mimia wəshi keseɗa shɛhɛ ba'a pa yisəyi dzeme vare yɛ bela ta reghwetɛ. 19Pa hɛ fəave nda bela nyi nza merege te hɛ te mca ba'a te game, geze ta ŋkɛ, dəŋərə, merege nya kənəa wəshi nyi kwa hwə, yɛ ghwelese ba'a bela ganyɛ ta mene. 20Pa hɛ veveyi wəshia shɛhɛ te yɛ medzeŋezle ta wəshi keseɗa nyi bake nyi, kwa sebe ta ŋkɛ, pa Aron teremte bela nyi nza nyi merege te hɛ te reghwetɛ. 21Pa Aron fəke yɛ medzeŋezle ba'a seɗa kwa zeme ke Mahwətə le ɓela gəsəkəa ve nda wəsə, kala ghena nya gezete Moyize.
22Ma kwa kiɗimte dzeghe melɛ keyaɓe jaɗafa, melɛ kwa tere tere ba'a melɛ kejikə ghə Aron ne, pa kafete dzeve kənəa mbeli ba'a wəpikɛ hɛ. Kwa sebe ta ŋkɛ, ɓərəkwə ŋkɛ sawanyɛ pelɛ reghwetɛ. 23Cape yɛ Moyize le Aron kadzembe cɛ lekwesa kebegeme geva. Ma kwa shave hɛ mbe ne, pa hɛ wəpikɛ mbeli. Tagha gɛ, pa zləvəa Mahwətə ncɛte nda geva ke ka Israyɛl. 24Deɗamə ghwə tsete geva kwa kema ta Mahwətə ba'a teremte melɛ kwa tere tere ba'a bela nyi nza nyi merege te hɛ te reghwetɛ. Pɛtɛ ka Israyɛl kenakɛ wəsəa shɛ, ntake hɛ katsa gaghwe ba'a kagwəɗəŋə ntiŋə ghə mbe hɛɗi.
നിലവിൽ തിരഞ്ഞെടുത്തിരിക്കുന്നു:
Ka Lɛvi 9: BEKDC12
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Bible en langue Kapsiki avec les livres deutérocanoniques © Alliance Biblique du Cameroun 2012.