Ka Lɛvi 24
24
Wəsə kentare yɛ paterela
1Ma ke Mahwətə sha Moyize: 2«Geze nda ke ka Israyɛl kezha keleke ŋa n'yia bekele nya ganyɛ ma hɛ kezha meha ghwə kwa paterela kala tɛhwɛɗi. 3Kateve wəsə kentare yɛ paterela Aron mbe cɛ lekwesa kebegeme geva, te kema ta mayafe nya kewəfərə səndəkwəa jikə geva. Katetse ghwə kwa yɛ paterela se mɛa tɛhwɛɗi pa va masheke kwa kema ta ɗa, 'ya Mahwətə. Kawəsə mahalegə nya kaghala ghala tenza ŋkɛ sha gheyɛ keshi keshi. 4Katentare yɛ paterela Aron te kema ta ɗa te wəsə kentare yɛ paterela nya le mze kwa tere tere nya wɛŋe, kezha tse ghwə kwa hɛ hwencɛke ncɛke keviɗi keviɗi.
Ɗafa nyi kendeke nda geva ke Shala
5Ntave hə shɛ na takɛ 'yɛmbe dəghwəa ɗafa meŋe bakeghəmbe nya nza yayata ŋkɛ kakiləwə ŋkwaŋe. 6Katebete hɛ na kwa kema ta ɗa, 'ya Mahwətə te tabele nya le mze kwa tere tere nya wɛŋe kazəɗə bake, ŋkwaŋe nya, ŋkwaŋe nya. 7Ma te yayata zəɗəa shɛ ne, katekwərə kwərə 'wərdə kwa hə hə nya ganyɛ na. Kwa sebe ta ŋkɛ ne, katetere ɗa 'wərdəa shɛ mbeli, 'ya Mahwətə te ŋkwa ɗafa ‹kawəsə kezəzə.› 8Ma te yayata veci kezhɛne mpi kaghala ghala ne, katebete ɗafa mbeli kwa kema ta ɗa, 'ya Mahwətə. Shave hwa ŋa ka Israyɛl nta hɛ mbeli. Kajikə geva nya kaghala ghala tenza ŋkɛ. 9Kaŋa yɛ Aron le ka shihɛnyɛ tenza ɗafa shɛhɛ. Ghenci ka tezeme hɛ mbe ŋkwa nya keveyi geva tekeleke, kwa nza ŋkɛ wəsə nya keveyi geva tekeleke tsape ŋkɛ kaŋa nci hwa wəshi nyi ketere nda geva ke Mahwətə. Kawəsə mahalegə nya kaghala ghala tenza ŋkɛ.»
Ɗa nya te wəndə nya keŋele Shala
10Ma te kwete veci ne, pa mɛ tsehate geva kwelɛ yɛ nde Israyɛl le wəzege ta wəzha ta ka Israyɛl nya kaŋa nde Ɛzhipte nya kese kanzanyɛ hwa ka Israyɛl mbe ghedəkwə. 11Pa wəzege ta wəzha ta ka Israyɛl kelemte zləvə te sləa Shala ba'a ŋelekɛ ŋkɛ. Pa mbeli keleke nda ŋkɛ ke Moyize. Ma sləa meghekɛ ne, Shelomit, wəzha ta Dibri, kwa yita ta Dan. 12Ntake mbeli kaya ŋkɛ megela kezha neghe ghena nya ketese va Mahwətə le ghəa ŋkɛ.
13Tagha gɛ, ma ke Mahwətə sha Moyize: 14«Kelakave mə wəndəa shɛ shave mbe ghedəkwə. Katedape dzeve mbeli nyi kefate kaŋele ɗa ŋkɛ kwa ghəa ŋkɛ, tagha gɛ, katebeza ŋkɛ pɛtɛa ka Israyɛl le pelɛ. 15Wa nyi ghena nyi tegeze nda na ke ka Israyɛl nyi:
Ma keŋelekɛ Shala ta ŋkɛ wəndə ne, kwa ghəa ŋkɛ tenza jaɗafa ta ŋkɛ. 16Ma yayata wəndə nya kekelemte zləvə te sləa Mahwətə ne, katepesle ŋkɛ mbeli: jikə ta ka Israyɛl nde tebeza ŋkɛ le pelɛ. Ya gheŋkɛ nza kande se se keɗema kande Israyɛl ne, katepesle ŋkɛ mbeli va nya kelemte zləvə ŋkɛ te sləa Shala.
17Ma kepeslekɛ wəndə wəndə ne, katepesle ŋkɛ mbeli perə. 18Ma kepeslekɛ wəsə keseɗa ta wəndə ŋkɛ ne, katekese wəsə keseɗa nya le mpi ŋkɛ kase kadzete ŋkwa ŋkɛ. 19Ma keɗakɛ wəndə wəndə le zhi ne, kateɗa ŋkɛ mbeli le zhi kala nyagha shɛ perə: 20ɓele te ɓele, ntsə te ntsə, slene te slene. Wəsə kwa ndiremi nya menete nda ŋkɛ ke wəndə yatemene nda mbeli. 21Ma wəndə nya kepeslekɛ wəsə keseɗa ne, katekese kwete ŋkɛ kase kadzete ŋkwa ŋkɛ. Ma wəndə nya kepeslekɛ wəndə ne, katepesle ŋkɛ mbeli. 22Wəsə mahalegə nya kwetɛŋe nde tenza kaŋa nde se se ba'a kaŋa nde Israyɛl, kwa nza ŋkɛ ne, 'ya ya kaMahwətə Shala ta ŋayɛ.»
23Pa Moyize gezave nda ghena shɛhɛ ke ka Israyɛl. Tagha gɛ, pa hɛ kelakave wəndə nya keŋelekɛ Shala shɛ shave mbe ghedəkwə ba'a peslekɛ ŋkɛ le pelɛ. Tsagha gɛ ne, nahe hɛ kemenete kala nya gezave nda Mahwətə ke Moyize.
നിലവിൽ തിരഞ്ഞെടുത്തിരിക്കുന്നു:
Ka Lɛvi 24: BEKDC12
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Bible en langue Kapsiki avec les livres deutérocanoniques © Alliance Biblique du Cameroun 2012.