Ka Lɛvi 1
1
WƏSHI NYI KEHI KEZHA DZEGHE MELƐ
1–7
Melɛ kwa tere tere
1Daŋe Mahwətə hekakɛ Moyize. Shave mbe cɛ lekwesa kebegeme geva ne, ma ke shɛ: 2«Geze nda ghena ke ka Israyɛl, ma pa na sha tegeze nda ke hɛ: Ma keɗe kwete wəndəa ŋayɛ kadzeghe nda melɛ ke Mahwətə ne, katekese wəsə ŋkɛ hwa wəshi keseɗa nyi jama jama keɗema nyi ɓɛhwɛ ɓɛhwɛ.
3Ma kenza ŋkɛ wəsə keseɗa nya wəba yaɗe ŋkɛ kadzeghe melɛ kwa tere tere le ne, mca nya ɗema beze te yakese ŋkɛ. Kateŋka ŋkɛ ŋkɛ kase kadzemɛa cɛ lekwesa kebegeme geva kezha nza nde zeɗehwe nda ke Mahwətə. 4Katedape dzeve ŋkɛ kwa ghəa wəsə keseɗa shɛ. Ma tsagha ne, kateyɛ melɛa ŋkɛ ŋkɛ ba'a katekelemte jaɗafa ta ŋkɛ ŋkɛ te wənə. 5Katesla ghə ŋkɛ te mca shɛ mɛa cɛ lekwesa kebegeme geva. Tagha gɛ, kateve nda mimia ŋkɛ ka dzeghe Shala nyi kaŋwale tezhilia Aron ke Mahwətə, kwa sebe ta ŋkɛ, kateyisə mimia shɛ hɛ dzeyi vare yɛ bela ta reghwetɛ nya mɛa ŋkwa kedzembe cɛ lekwesa kebegeme geva. 6Katekwaɓe hweta wəndəa shɛ seyi te mca shɛ ba'a katesla ŋkɛ ŋkɛ kezhɛzhi kezhɛzhi. 7Katemeha ghwə ka dzeghe Shala te reghwetɛ ba'a katebete sheghwə hɛ mɛ. 8Katebete zhɛzhi nyighɛ hɛ te sheghwə nyi mɛa ghwə nya te reghwetɛ zlaɓe le ghə ba'a merege. 9Kateyaɓe yɛ heli ba'a yɛ jajɛghwa ta wəsə keseɗa shɛ wəndəa shɛ. Katetere pɛtɛa wəshia shɛhɛ nde dzeghe Shala te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.
10Ma keɗe ŋkɛ kadzeghe melɛ kwa tere tere le wəsə keseɗa nya ɓɛhwɛ ne, game keɗema zhɛfa nya ɗema beze te yakese ŋkɛ. 11Katesla ghə ŋkɛ yite kwa kema ta Mahwətə, laka bela kwa gwela ta reghwetɛ. Kateyisə mimia ŋkɛ ka dzeghe Shala nyi kaŋwale tezhilia Aron dzeyi vare yɛ bela ta reghwetɛ. 12Katesla wəsə keseɗa ŋkɛ kezhɛzhi kezhɛzhi, zlaɓe le ghə ba'a merege. Katebete hɛ nde dzeghe Shala te sheghwə nyi mɛa ghwə nya te reghwetɛ. 13Kateyaɓe yɛ heli ba'a yɛ jajɛghwa ŋkɛ. Kwa sebe ta ŋkɛ, kateve nda hɛ nde dzeghe Shala ke Mahwətə ba'a katetere hɛ ŋkɛ pɛtɛ te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.
14Ma keɗe wəndə kadzeghe nda melɛ kwa tere tere ke Mahwətə le 'yɛ ne, gheɗepe keɗema ghwəɗəŋkwə yakele ŋkɛ. 15Katekele 'yɛa shɛ nde dzeghe Shala kase kadzete reghwetɛ, katendaɗe welɛ ŋkɛ te ba'a katetere ghəa ŋkɛ ŋkɛ te reghwetɛ. Kwa sebe ta ŋkɛ ne, kateyisə mimia ŋkɛ ŋkɛ dzeyi vare yɛ bela ta reghwetɛ. 16Katekelemte wədanaka le wəshi nyi kwa ŋkɛ kezha negha laka ŋkwa kesame ta veci yitea reghwetɛ, te ŋkwa nya nza pəsəɗə nyi kededənə. 17Kateperawe 'yɛa shɛ ŋkɛ bake mbe, kaɗema kenehe hɛ rakatse. Kwa sebe ta ŋkɛ ne, katetere ŋkɛ ŋkɛ te ghwə nya te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.»
നിലവിൽ തിരഞ്ഞെടുത്തിരിക്കുന്നു:
Ka Lɛvi 1: BEKDC12
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Bible en langue Kapsiki avec les livres deutérocanoniques © Alliance Biblique du Cameroun 2012.