Shave 30
30
Reghwetɛ ketere 'wərdə
1Ma kezha tere 'wərdə ne, katemene reghwetɛ na yitea sheghwəa gwevɛre. 2Yipə yipə tenza yɛ biya ta ŋkɛ le bezlea ŋkɛ, kadzeghe kwetɛŋe slə yitea fegwele hwa'a mɛa ŋwalea dzeve. Kadzeghe bake tenza dzeme ta ŋkɛ yitea ghweme. Jikə tenza tereme nyi te sleme ta ŋkɛ le. 3Katefi mze kwa tere tere nya wɛŋe na pɛtɛ: ŋkwa nya te le tereme nyi te yɛ sleme ta ŋkɛ ba'a bela ta ŋkɛ nyi wəfaɗe. Katemene ŋkwa nya dzeyi mɛa mɛa ŋkɛ na dzasle le mze kwa tere tere. 4Katevɛsə yɛ takase na yitea mze kwa tere tere ba'a katebete hɛ na bake laka nya, bake laka nya te bela ta reghwetɛ, kwayite ta ŋkwa nya dzeyi mɛa mɛa ŋkɛ. Mbe hɛ teha yɛ geta mbeli kezha kele te. 5Katefeɗe geta na bake yitea sheghwəa gwevɛre ba'a katefi mze kwa tere tere na kənəa hɛ. 6Kwa kema mayafe nya kefɛake səndəkwəa jikə geva teve reghwetɛa shɛ na. Tagha tebegeme 'ya le gha Moyize. 7Kala kiɗi ta ŋkwa ne, katetere ɗa 'wərdə Aron te, vəa ŋkwa nya sehwe yɛ paterela ŋkɛ. 8Kala pəkwə ta veci ne, katetere 'wərdə ŋkɛ vəa ŋkwa nya telə ŋkɛ kandə ghwə te yɛ paterela. Katefɛa mbeli yitea tere ɗa 'wərdə tɛape we. 9Katekele 'wərdə nya keɗema kehi mbeli kase kadzete we, ya melɛ kwa tere tere, ya wəshi nyi kese te wəve. Kateɓasle tɛ mbeli te reghwetɛa shɛ we. 10Kwetɛŋe zhigə mbe va teyaɓe reghwetɛa shɛ Aron. Katefi mimia wəsə keseɗa nya dzeghekɛ melɛ mbeli kezha kelemte jaɗafa ŋkɛ te tereme nyi te sleme ta reghwetɛ. Keva keva temene geva gəsəkəa shɛ, keshi keshi. Ma reghwetɛa shɛ ne, kateve geva ŋkɛ tekeleke kaŋa ɗa ba'a deke kezha slene ta ɗa tenza ŋkɛ.
Jaɓeregwale kezha ŋkwa nya keveyi geva tekeleke
11Ma ke Mahwətə sha Moyize zhɛkwa: 12«Ma te veci nya terafe sləa ka Israyɛl na ne, yayata wəndəa nci kateŋki wəsə kezha mbeɗe mpia ŋkɛ. Ma tsagha ne, ndiremi shɛ katekwaɗe ŋayɛ vəa ŋkwa ɓela ŋkwa we. 13Ma yayata za nya ɓelate mbeli ne, kateŋki dəɓərəa mze kwa tɛawetɛa nya ɓɛhwɛ ŋkɛ, geze ta ŋkɛ, kwa bake ta bela ta wəsə kedzeghe ɗaŋeɗa ta wəshi nya mene slene mbeli le mbe ŋkwa nya keveyi geva tekeleke. Kaŋa ɗa tenza wəsə nya ŋkikɛa shɛ mbeli 14Yayata wəndə nya keɓelate geva, se te va bakemsə kajive mbe kema ne, kateŋki wəsə nya tsehe nda mbeli ke Mahwətə ŋkɛ. 15Kanya kwetɛŋe teŋki wəsə yɛ nde mcɛlə le nde titikwə: dəɓərəa mze kwa tɛawetɛa nya ɓɛhwɛ, mbake yite we, ntamte yite we. Yayata wəndə kateŋki ɗa wəsə nya kesləyi geva kezha mbeɗe mpia ŋkɛ. 16Ma vəa nya tetseheke dəɓərəa mze kwa tɛawetɛa nya na pɛtɛ va ka Israyɛl ne, katehi ŋkwa nya mbe cɛ lekwesa kebegeme geva na le. Tsagha ne, katezəzə ka Israyɛl 'ya ba'a kateya mpia nci 'ya.»
Kwenə kepɛ ŋkwa
17Ma ke Mahwətə sha Moyize zhɛkwa: 18Ma kezha pɛ ŋkwa ne, katevɛsə kwenə mze kwa ghwə ghwə ba'a wəsə kentare ŋkɛ nya le mze kwa ghwə ghwə na. Kateve na kwelɛ yɛ cɛ lekwesa kebegeme geva le reghwetɛ ba'a katepɛre na le yɛmə. 19Yɛ Aron le ŋwalea ŋkɛ ka tepɛ yɛ dzeve le seɗa le yɛməa shɛ. 20Ma vəa ŋkwa nya tedzembe cɛ lekwesa kebegeme geva hɛ ne, katepɛ hɛ le yɛməa shɛ kezha ɗema hɛ kampə. Ma vəa ŋkwa nya tehende nda geva hɛ ke reghwetɛ kezha dzeghe melɛ ba'a kezha tere ɗa wəshi gəmə ne, 21katepɛ yɛ dzeve le seɗa hɛ kezha ɗema hɛ kampə. Kawəsə mahalegə nya kaghala ghala tenza ŋkɛ kezha hɛ ba'a kezha hwelefefia nci, keshi keshi.
N'yi keve ŋkwa tekeleke
22Ma ke Mahwətə sha Moyize zhɛkwa: 23Fəte 'wərdə ganji: kiləwəa 'wərdə ganyɛ kwa yɛmə yɛmə mcɛfe, kiləwəa sinamome nya kezəŋwə bake ba'a kwete gasle yite, kiləwəa kanɛle nya kezəŋwə bake ba'a kwete gasle yite 24ba'a kiləwəa kase mcɛfe, kala wəsə kedzeghe ɗaŋeɗa ta wəshi mbe ghɛa Shala. Fəte litrəa n'yia bekele ŋkwaŋe perə. 25Katejikə hɛ nde ɗepe ta 'wərdə kezha nza nde kan'yi keve ŋkwa tekeleke. 26Katefi cɛ lekwesa kebegeme geva, səndəkwəa jikə geva, 27tabele kebete ɗafa ba'a wəshi nyi te, wəsə kentare yɛ paterela ba'a wəshi nyi te, reghwetɛ ketere 'wərdə, 28reghwetɛ kedzeghe melɛ ba'a wəshi nyi yite, kwenə ba'a wəsə kentare na kezha ve hɛ tekeleke. 29Ma nahe keveyi hɛ na tekeleke ne, deke kezha slene ta ɗa tenza hɛ. Ma yayata wəndə keɗema yayata wəsə nya ketekwaɗe ne, kateme ɗa te wəndəa shɛ. 30Katesheke n'yia shɛnyɛ na kənəa yɛ Aron le ŋwalea ŋkɛ kezha ve hɛ tekeleke, yitea nza hɛ kaka dzeghe ɗa melɛ.
31Ma kwa sebe ta ŋkɛ ne, ma pa na sha ka Israyɛl: «Wa nya n'yi keve ŋkwa tekeleke nya. Deke gheŋkɛ yatemene nda slene yɛ le ke Mahwətə, keshi keshi. 32Wəndə shɛ kateɗa kezha fi geva we, wəndə shɛ kateta kwete kala nyagha we. Kwa nza ŋkɛ ne, n'yi keve ŋkwa tekeleke nde, kan'yi nya keveyi geva tekeleke tenza nde kezha gheyɛ. 33Ma ketakɛ 'wərdə kwete wəndə kala nyagha ba'a keɗate ŋkɛ te geva ta wəndə nya keɗema kande dzeghe Shala ne, ŋkwase tenza ŋkɛ shave hwa ka Israyɛl.»
Ta ta 'wərdə nya keveyi geva tekeleke
34Ma ke Mahwətə sha Moyize zhɛkwa: «Meneve wəfe nyi kezəŋwə megela. Gweɗəte hɛ kwa sebe ta nya dzegheve 'wərdə kwa hə hə nya ganyɛ na yipə yipə le hɛ. 35Kategweɗə hɛ nde ta 'wərdə le ghwene kezha nza ŋkɛ kawəsə ganyɛ ba'a kawəsə nya keveyi geva kaŋa slene ta ɗa. 36Katehə kwete bela ta 'wərdəa shɛ na kwerɗike ɗike. Kateve na mbe cɛ lekwesa kebegeme geva, te kema ta səndəkwəa jikə geva, te ŋkwa nya tebegeme 'ya le gha. Kaŋa ŋayɛ ne, kawəsə nya keveyi geva tekeleke tenza ŋkɛ. 37Wəndə shɛ kateta kwete 'wərdə kala nya we. Katemene nda slene yɛ le ke ghəa ŋayɛ. Deke kezha slene ta ɗa tenza ŋkɛ. 38Ma ketetakɛ 'wərdə kwete wəndə kala nyagha kezha fa zəŋwəa ŋkɛ ne, kateŋkamte geva ŋkɛ shave hwa ka Israyɛl.»
നിലവിൽ തിരഞ്ഞെടുത്തിരിക്കുന്നു:
Shave 30: BEKDC12
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Bible en langue Kapsiki avec les livres deutérocanoniques © Alliance Biblique du Cameroun 2012.
