Shave 27
27
Reghwetɛ kedzeghe melɛ
1Ma kezha dzeghe melɛ ne, katemene reghwetɛ mbeli yitea sheghwəa gwevɛre. Yipə yipə tenza yɛ biya ta ŋkɛ le bezlea ŋkɛ, kamɛtre bake ba'a kwete gasle yite tenza ŋkɛ. Kamɛtre kwetɛŋe ba'a kwete gasle yite tenza dzeme ghweme ta ŋkɛ. 2Katemene yɛ tereme mbeli te yɛ megwekwe ta ŋkɛ nyi wəfaɗe. Kanya kwetɛŋe tenza tereme nyighɛ le. Katefi mbeli le mze kwa ghwə ghwə. 3Katevɛsə wəshi kemene slene te reghwetɛ mbeli le mze kwa ghwə ghwə: wəshi kefə pəsəɗə, yɛ pɛlə, yɛ kwenə kesheke mimi, wəshi kezhɛre sli te ghwə ba'a wəshi ketere 'wərdə. 4Katevɛsə kwete wəsə kala lɛ kepesa sli mbeli le mze kwa ghwə ghwə ba'a takase nyi wəfaɗe te yɛ megwekwe ta lɛa shɛ le mze kwa ghwə ghwə. 5Katemene wəsə nya kala lɛ kepesa slia shɛ mbeli dzeyi yitea reghwetɛ, ghala slə nde te hɛɗi hwa'a mbe tepe ta ŋkɛ. 6Katefeɗe geta mbeli bake yitea sheghwəa gwevɛre ba'a katefi hɛ mbeli le mze kwa ghwə ghwə. 7Kateha hɛ mbeli mbe takase nyi dzeyi vare yɛ bela ta reghwetɛ nyi bake kezha kele te. 8Ma reghwetɛ nya le sheghwə nyi slapesla slapesla shɛhɛ ne, ghwəarara tenza ŋkwa nya kwa hwəa ŋkɛ. Kala nya ncɛte ŋa 'ya teke pelɛ ghweme temene mbeli.
Zlave nya dzeyi yitea ŋwela
9Ma dzeyi yitea ŋkwa nya keveyi geva tekeleke ne, katesla ŋwela mbeli. Ma ŋwela shɛ ne, zlave nyi tsate mbeli le pawa nyi berete berete ka tenza kaghala ta ŋkɛ. Ma laka bela kwa zeme ne, mɛtre mcɛfemsə tenza biya ta zlavea shɛ. 10Katendɛaŋe hɛ mbeli le yɛ ndɛaŋe ba'a yɛ geta mze kwa tɛawetɛa te selə nyi le mze kwa ghwə ghwə bakemsə. Te wəshi kentare selə nyi bakemsə le mze kwa ghwə ghwə tentare seləa shɛhɛ mbeli. 11Ma laka bela kwa gwela ne, mɛtre mcɛfemsə tenza biya ta zlavea shɛ ba'a tsagha shɛ tendɛndɛaŋe hɛ mbeli. 12Ma laka ŋkwa kepəkwə ta veci ne, mɛtre bakemsə mcɛfeghəmbe tenza bezlea zlavea shɛ, laka bezlea ŋwela shɛ. Te selə meŋe nyi mentare te wəshi kentare selə meŋe tendɛndɛaŋe mbeli. 13Ma laka ŋkwa kedzembe nya laka ŋkwa kesame ta veci ne, mɛtre bakemsə mcɛfeghəmbe tenza bezlea ŋkɛ. 14Ma laka kwete bela ta ŋkwa kedzembe ne, mɛtre mberefaŋe ba'a kwete gasle yite tenza zlave, tsagha selə mahekene ba'a wəshi kentare selə mahekene. 15Ma laka kwete ɓiyitsa ne, mɛtre mberefaŋe ba'a kwete gasle yite tenza zlave, tsagha selə mahekene ba'a wəshi kentare selə mahekene. 16Ma mɛa ŋkwa kedzeki ta ŋwela shɛ ne, katehwepe mayafe nya kamɛtre meŋe mbeli, mayafe nya tsate ka tsa zlave le pawa nyi berete berete, welaɗe le shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Katehwepe mbeli te selə wəfaɗe nyi ntareyi nyi mbeli te wəshi kentare selə wəfaɗe. 17Geta nyi le mze kwa tɛawetɛa ka tejikə pɛtɛa selə nyi yitea ŋwela nyagha, le mze kwa tɛawetɛa tenza yɛ ndɛaŋea nci ba'a le mze kwa ghwə ghwə tenza wəshi kentare hɛ. 18Ma ŋwela nya yitea shɛ ne, mɛtre mcɛfemsə tenza biya ta ŋkɛ ba'a mɛtre bakemsə mcɛfeghəmbe tenza bezlea ŋkɛ. Kamɛtre bake ba'a kwete gasle yite tenza dzeme ghweme ta zlave pawa. Kamze kwa ghwə ghwə tenza wəshi kentare seləa shɛhɛ. 19Ma pɛtɛa wəshi kemene slene nyi mbe cɛ lekwesa shɛ, pɛtɛa wəshi nyi kebaŋeyi geva kwa hɛɗi dzeyi yitea ŋkwa nya keveyi geva tekeleke ba'a dzeyi yitea ŋwela nya yite ne, le mze kwa ghwə ghwə tenza hɛ.
N'yi kegə kwa paterela
20Gha Moyize, kategeze nda na ke ka Israyɛl kagə ŋa n'yi ganyɛa bekele, yitea nza ghwə kwa paterela hetɛhwɛɗi hetɛhwɛɗi. 21Kateve wəsə kentare yɛ paterela yɛ Aron le ŋwalea ŋkɛ mbe cɛ lekwesa kebegeme geva, kwa kema ta mayafe nya kewəfərəakɛ səndəkwəa jikə geva. Hwencɛke ncɛke tetse ghwə kwa yɛ paterela kwa kema ta ɗa, 'ya Mahwətə. Kawəsə mahalegə nya keɗema kazhɛre tenza ŋkɛ kezha ka Israyɛl keshi keshi.
നിലവിൽ തിരഞ്ഞെടുത്തിരിക്കുന്നു:
Shave 27: BEKDC12
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Bible en langue Kapsiki avec les livres deutérocanoniques © Alliance Biblique du Cameroun 2012.
