Slene 28

Pol mbe Malte nya kahɛɗi nya te tepe yɛmə

1Ma kwa mbele ghen'yɛ ne, pa n'yɛ fate Malte sləa hɛɗi nya te tepe yɛməa shɛ. 2Pa mbeli nyi mbe menete n'yɛ ganyɛ. Ma kwa nza va kame ba'a kwa nza ntasle kwele kwele ne, pa hɛ mehate ghwə nya wəba nya kemaneve n'yɛ hɛ pɛtɛ yite. 3Pa Pol kelete ghəa sheghwə kadzemɛa ghwə, ama pa mentsape shave mbe va ghyana ta ghwə ba'a ciɗəate geva te dzeve ta ŋkɛ. 4Ma kwa nakɛ shishi hɛ te dzeve ta Pol ne, ma ke hɛ kwelɛ ghəa nci: «Nde pesle ŋkwa wəndəa shɛ kaganda, nahe ŋkɛ kembele same kwa ndərə, ama kesərəakɛ ŋkɛ nza tiɗiɗia Shala kanza teghweme we.» 5Ama pa Pol yisəyi shishia shɛ mbe ghwə, wəsə shɛ kese kazhɛ nda ke Pol we. 6Ma zəzə kweci mbeli ne, katekesle geva ta ŋkɛ ba'a kateteɗe ŋkɛ kamte taghanyɛ. Ama kwa sebe ta neghakɛ hɛ kavə kwele kwele ne, pa hɛ nakɛ kaɗema wəsə kezhɛte nda ke Pol. Tagha gɛ, pa hɛ mbeɗemte zəzə ta nci, ma ke hɛ: «Nahe ŋkɛ kenza kashala.»

7Takwa takwa ŋkwa shɛ yitea ghɛa wəndə nya kesleke hɛɗi nya te tepe yɛməa shɛ, nya nza sləa ŋkɛ kaPəbliyəs. Pa ŋkɛ keleghe n'yɛ kadzeki ghɛa ŋkɛ le ɗe, mahekene hɛa n'yɛ ki ghɛa ŋkɛ. 8Shewə yitenyɛa Pəbliyəs va ɗawa ba'a metse kwa mimi. Pa Pol lə kanewe ŋkɛ, səkwəte Shala kezha gheŋkɛ, veyi dzeve kənə ba'a mbete ŋkɛ. 9Ma kwetere wəmbəa ŋkɛ ne, pɛtɛ kweci ka zereghwe nyi te hɛɗia shɛ se shɛ, pa Pol mbelete hɛ. 10Nahe mbelia shɛhɛ kevate kwele tsape te ghen'yɛ. Ma kaslə ghen'yɛ kadzawa kwambelə ne, pɛtɛa wəshi nyi kehi ɗave n'yɛ hɛ kezha dzeghwa ta n'yɛ.

Pol kentsehe mbe Rome

11Ma kwetere wəmbəa tere mahekene, ntəŋə ghen'yɛ le kwambeləa ka Alɛgezandri nya heka mbeli kayɛ Diyoskəre, nya kekiɗimte feghwe te ŋkwa keghereŋe kwambelə nya te hɛɗia shɛ. 12Pa ghen'yɛ ntsehe mbe Sirakəze. Hɛ mahekene menete ghen'yɛ tagha. 13Ma slə ta n'yɛ tagha ne, ntəŋə ghen'yɛ dzeyi n'yɛ vare hələbə kezha dzembe Regiyo. Ma te hendɛ ta ŋkwa ne, ntake sefə kavɛ same laka bela kwa zeme, bake hɛa n'yɛ kwa hweŋkwa nda ntsehe n'yɛ mbe Pəwzolɛs. 14Ma mbe melemea shɛ ne, pa ghen'yɛ sləyi ka kesaka ma nyi ke'yɛwete kezha temə ghen'yɛ le hɛ kashikwə kwetɛŋe. Tsetse menete ghen'yɛ nda ntsehe ghen'yɛ mbe Rome. 15Nahe ka kesaka ma nyi mbe Rome kefate se ta n'yɛ, pa hɛ se kaneghe n'yɛ te shikwəa Apiyəs ba'a te ŋkwa nya nza Cɛ kehɛ mahekene. Ma kwa nakɛ hɛ Pol ne, pa ŋkɛ tsate nda hana ke Shala, fare fare wənəa ŋkɛ. 16Ma kwa ntsehe ghen'yɛ mbe Rome, pa mbeli pelave nda hweŋkwa ke Pol kanza ki ghɛ nya ɗe ŋkɛ le kwete sewajɛ nya keya ŋkɛ.

Pol kazlape ghena ta Shala mbe Rome

17Ma kwa sebe ta hɛ mahekene ne, pa Pol hekakɛ mbeli nyi te ghəa ka Zhəwif nyi mbe Rome kase shɛ. Ma kwa tsene hɛ ne, ma ke sha hɛ: «Ka kesaka meyɛ ɗa, ya 'ya ɗema kebezemte nda ghena ci'a ke hwelefe ta ɓəmə ba'a wəshi keshia ɓəmə ne, nahe mbeli kekeseve ɗa pelɛ Zhɛrəzalɛm ba'a kendeke nda ɗa ke ka Rome. 18Ma kwa 'yɛwakɛ ghena ka Rome va 'ya te ghwə ne, kaɗe hɛ kapele ɗa, va nya ɗema hɛ kenakɛ fete va 'ya gare pesle ɗa. 19Ama kaɗe ka Zhəwif we. Tagha gɛ, pa 'ya 'yɛwete se kadzawa kema ta Sɛzar; Ndagwara kaɗe 'ya kave nda fete ke hwelefe ta ɗa we. 20Vatse 'yɛwete hweŋkwa kenewe ŋayɛ 'ya kezha geze ŋayɛ ghena shɛ. Kwa nza ŋkɛ tewəmbəreke wəndə nya neghe ka Israyɛl nda nza 'ya kwa zewe lɛ.» 21Ma ke hɛ shɛ: «Ghen'yɛ le ŋa n'yɛ ne, kekemave palepa ghen'yɛ same kwa Zhəwdɛ te ghəa ŋa we. Kwete hwa mbelia ɓəmə shɛ nya kesawa pelɛagha nya kegezete n'yɛ wəsə kwa ndiremi nya menete na we. 22Ama kwa mɛa ŋa ɗe n'yɛ kafa wəshi nyi zəzə na, kwa nza ŋkɛ nahe n'yɛ keɗepe kaɗema mbeli kaɗe wəvəsə nya nza nya na mbe ta yayata ŋkwa.»

23Pa hɛ sləyi veci le Pol. Ma te vecia shɛ ne, kwele kwele hɛ se sha Pol te ŋkwa nya hɛ ŋkɛ. Ghala kiɗi ŋkwa pa va tɛhwɛɗi ne, kanegha fete Pol te Meghea Shala ba'a kakese mehele ta nci ŋkɛ laka geze nda ghena ta Yɛsə ke hɛ shave mbe wəsə mahalegəa Moyize ba'a palepa ta ka mɛ ŋkwa. 24Nahe kweci mbelia keyɛte ghena nya gezete ŋkɛ, ama keyɛte ghena shɛ kweci we. 25Ma vəa ŋkwa nya slə hɛ ne, kenza hɛ kanya kwetɛŋe kwelɛ ghəa nci we, ma ke Pol sha hɛ: «Nda kaganda ghena ta Sefəa Shala kwa geze nda ghena ŋkɛ ke ka shihɛ ŋayɛ laka mɛa nde mɛ ŋkwa Ɛzayi. 26Ma ke gezete:

Kwiɗi sha mbeli nyi, ma pa na sha hɛ:

Katefa ghena yɛ megela, ama katefa ghena nya mbe yɛ we,

katenewe ŋkwa yɛ megela, ama kateneweve yɛ we.

27Kaganda ne, ntɛaŋe ntɛaŋe ghəa mbelia shɛhɛ.

Nahe hɛ kezhiɓəte sleme ta nci,

keŋzlete ntsə ta nci,

kezha ɗema ntsə ta nci kanakɛ ŋkwa,

kezha ɗema sleme ta nci kafa ghena.

Tagha gɛ, katezhɛre geva hɛ kase sha Shala.

Tagha gɛ, katembele hɛ 'ya.

28Ɗepete mə megela: ke kweci hwelefefi ghweneghe nda ghena ta mbele Shala perə, katefa hɛ ghena shɛ kwa ŋa nci.» 29Ma kwa gezete ghena nya Pol ne, cape ka Zhəwif kalə kaghəpə kwelɛ ghəa nci le berete.

30Bake va ta Pol ki ghɛ nya kelete ŋkɛ kaŋki te tere. Nahe ŋkɛ kekemaneve pɛtɛa mbeli nyi kese shɛ ŋkɛ. 31Kazlape nda Meghea Shala ŋkɛ ke mbeli ba'a kateke nda ghena ta Nde sleke ŋkwa Yɛsə Kriste ŋkɛ le gezleŋema ghə ba'a waɗe.

നിലവിൽ തിരഞ്ഞെടുത്തിരിക്കുന്നു:

Slene 28: BEKDC12

ഹൈലൈറ്റ് ചെയ്യുക

പങ്ക് വെക്കു

പകർത്തുക