Slene 18

Pol mbe Korɛnte

1Ma kwetere wəmbəa ŋkɛ ne, ntəŋə Pol slə mbe Atɛne kalə kadzembe Korɛnte. 2Pa ŋkɛ begeme le kwete nde Zhəwif nya nza sləa ŋkɛ kaAkilas mbe, te hɛɗia Poŋe ya ŋkɛ. Sawa pelɛ Itali ŋkɛ le male ta ŋkɛ Prisile, va nya gezete nda Sɛzar Klode ke pɛtɛa ka Zhəwif kaslə mbe Rome. Pa Pol jikəte geva le hɛ. 3Ma kwa nza ŋkɛ slene nya kwetɛŋe yamene ŋkɛ le Pol, zlave kemene cɛ lekwesa yamene hɛ, ntishɛ ŋkɛ ki ghɛ nci kezha mene slene. 4Ma mbe yayata veci kezhɛne mpi ne, kageze ghena Pol mbe cɛ kesəkwə ghə ba'a kakese mehele ta Zhəwif ba'a ka Grɛk ŋkɛ.

5Ma kwa same yɛ Silas le Timotɛ kwa Masɛdowane ne, pa Pol kelete vəa ŋkɛ kezha geze ghena ta Shala sərə kweci slene, kancɛ nda ŋkɛ ke ka Zhəwif tsema tsema nza Yɛsə kaMɛsi nya neghe hɛ. 6Ma kwa ɗema ghena ta ŋkɛ ka Zhəwif ba'a kwa ŋele ŋkɛ hɛ ne, pa ŋkɛ seɗemte dzeve ta ŋkɛ hwa ghena ta nci. Ma ke sha hɛ: «Ma keza yɛ ne, kenza ŋkɛ kafete ta ɗa we, kenza mimia ŋayɛ kənəa 'ya we. Ma tsetsenya tse ne, 'ya katelə sha kweci hwelefefi.» 7Cape ŋkɛ slə te ŋkwa shɛ kadzeki ghɛa kwete wəndə nya nza sləa ŋkɛ kaTitiyəs Zhəstəs, kande hawe va Shala wəndəa shɛ, terasle ghɛa ŋkɛ yitea cɛ kesəkwə ghə. 8Pa Krispəs, wəndə nya kwele mbe cɛ kesəkwə ghə yɛhwe Nde sleke ŋkwa, tsagha mbeli nyi ki ghɛa ŋkɛ pɛtɛ. Kwele kwele kweci ka Korɛnte nyi kefa ghena ta Pol nyi keyɛte ghena ta Yɛsə perə, pa mbeli menete nda batɛme ke hɛ.

9Ma heviɗi ne, pa Pol nakɛ kwete wəsə laka kelɛŋə, ma ke Nde sleke ŋkwa shɛ: «Ghazlənəma na ma, geze yageze nda ghena ta ɗa na ke mbeli, nzama na bivə ma. 10Kwa nza ŋkɛ nahe 'ya kenza le gha. Wəndə shɛ kakeseve ŋa kamenete ŋa wəsə kwa ndiremi we, kwa nza ŋkɛ kwele kwele mbeli nyi kaŋa ɗa mbe meleme nya.» 11Pa Pol menete va kwetɛŋe ba'a tere ŋkwaŋe mbe Korɛnte, kateke nda ghena ta Shala ke mbeli.

12Ma te va nya nza Galiyon#18.12 Galiyon: ŋgwamna ta ka Rome nya te ghəa hɛɗia ka Grɛk mbe va 51-52 kwa sebe ta Yɛsə Kriste. kaŋgwamna ta ka Rome nyi te hɛɗia Akay ne, pa ka Zhəwif tsenete geva yitea Pol. Pa hɛ keleghe ŋkɛ kalə sha mbeli nyi kemeha ghwə. 13Ma ke hɛ: «Ma wəndə nya ne, mbeli yaghwete kahawe va Shala tekeleke le nya ɗe wəsə mahalegə.»

14Kaɗe Pol kageze ghena, ama ma ke Galiyon sha ka Zhəwif: «Ma kenza nde ghena ndiremi keɗema fete nya dzawe yamenete ŋayɛ wəndə nya ne, nza katemeha ŋayɛ ghwə ta ŋayɛ 'ya, gheyɛ ka Zhəwif. 15Ama va nya nza ŋkɛ kaghəpə te ghəa geze ta ghena, yɛ slə ba'a wəsə mahalegəa ŋayɛ ne, gheyɛ ka geze wəsəa ŋayɛ, kantsehe 'ya hwa hwelefe nya ghena ta ŋayɛ we.» 16Pa ŋkɛ ŋkamte hɛ shave mbe cɛ kemeha ghwə. 17Pa hɛ keseve Sostɛne, wəndə nya te ghəa cɛ kesəkwə ghə, pa hɛ pesleve ŋkɛ mɛa cɛ kemeha ghwə. Ama kese Galiyon kaɓela ghena shɛ we.

Pol kazhɛne geva kadzembe Antiyoshe

18Kwele kwele Pol teməakɛ temə mbe Korɛnte. Kwetere wəmbəa ŋkɛ, pa ŋkɛ slənyɛ yitea hɛ ba'a dzawa kwambelə kadzawa Siri le Prisile ba'a Akilas. Ma vəashi ne, nahe ŋkɛ keŋsəmte ghəa ŋkɛ mbe Saŋkerɛ, kwa nza ŋkɛ nahe ŋkɛ kemenete meɗe mɛ. 19Hwa'a hɛ mbe Ɛfɛze nya sərəakɛ yɛ Akilas le Prisile Pol. Ntəŋə Pol le ŋa ŋkɛ kadzembe cɛ kesəkwə ghə, ntake ŋkɛ kaghəpə mbe le ka Zhəwif. 20Kasəkwə Pol hɛ kezha temə kwele kwele le hɛ, ama pa ŋkɛ ɗema. 21Pa ŋkɛ slənyɛ yitea hɛ, ma ke sha hɛ: «Katese 'ya sha gheyɛ zhɛkwa keɗe Shala.» Ntəŋə ŋkɛ slə mbe Ɛfɛze le kwambelə.

22Ma kwa ntsehe hɛ mbe Sɛzarɛ, cape ŋkɛ kadzeme Zhɛrəzalɛm kezha njiŋwe Jikə ta ka Kriste nya kwa, zhɛne ne, pa ŋkɛ dzawa Antiyoshe. 23Pa ŋkɛ teməakɛ temə kwagha. Ntəŋə ŋkɛ jive mbe hɛɗia ka Galate ba'a ŋa ka Frizhi kezha mtsehe nda berete ke pɛtɛa ka təkwə təkwə Yɛsə.

Apolos mbe Ɛfɛze ba'a Korɛnte

24Pa kwete nde Zhəwif nya yake mbeli mbe Alɛgezandri, nya nza sləa kaApolos, dzembe Ɛfɛze. Megela geze ghena ŋkɛ, ndeɗekə ɗepe ghena ta Ghena ta Shala ŋkɛ perə. 25Nahe mbeli kencɛte nda hweŋkwa ta Nde sleke ŋkwa. Tiɗiɗi ba'a megela teke nda ghena ta Yɛsə ŋkɛ ke mbeli le zlama. Ama deke batɛmea Zhaŋe yaɗepe ŋkɛ. 26Kageze nda ghena ta Shala ŋkɛ ke mbeli le berete mbe cɛ kesəkwə ghə. Kwa fate ghena ta ŋkɛ yɛ Prisile le Akilas ne, pa hɛ hekaghe ŋkɛ kadzeki ghɛa nci ba'a ncɛte nda hweŋkwa ta Shala fate fate ɓiyitsa. 27Kaɗe Apolos ɓiyitsa kadzembe Akay. Pa ka kesaka ma mtsehete nda berete ba'a rafete nda palepa ke ka təkwə təkwə Yɛsə nyi te hɛɗia shɛ, kezha kemaneve ŋkɛ hɛ le megela. Ma kwa ntsehe ŋkɛ ne, kwele kwele kemanakɛ mbelia Yɛsə Kriste ŋkɛ laka zlaɓa ta Shala. 28Kwa nza ŋkɛ le ghena nyi zlahe zlahe ne, kazhɛne nda ghə ŋkɛ ke ka Zhəwif kwa ntsə ta mbeli. Ma laka ghena nya mbe Ghena ta Shala ne, kancɛ nda ŋkɛ ke hɛ Yɛsə ya kaMɛsi.

നിലവിൽ തിരഞ്ഞെടുത്തിരിക്കുന്നു:

Slene 18: BEKDC12

ഹൈലൈറ്റ് ചെയ്യുക

പങ്ക് വെക്കു

പകർത്തുക