Roma 6
6
Anti pohintuwuta hai Yesu, tekabahamoke hangko i kuasa dosa
(6:1–8:39)
Barapoke mohintuwu hai dosa, mohintuwumoke hai Kerisitu
1Pue Ala moampungi dosanta anti kabulana laluNa irikita. Agaiana inee tapehangu ane mobabehi liliuke dosa ina katetetambaiari ahina Pue Ala moampungike. 2Inee tapehangu nodo halalu! Bara hintoto ane mobabehi liliuke dosa, lawi matemoke hihimbela hai Kerisitu bona dosa barapi makuasa irikita. 3Bara pae niisa halalu, rariumoke i lalu hangana Kerisitu Yesu, hai bara wori pae niisa i karariunta iti, lempona, matemoke hihimbela hai Kerisitu Yesu? 4I karariunta iti, nodoke tauna au mate hai ratawu himbela hai Kerisitu bona nodo Kerisitu rapatuwo hule hangko i kapate anti kuasana Pue Ala Umanta, nodo wori ikita, molambike katuwo au wou hai mobabehike apa au manoto i peitaNa.
5Mewali, ane mohintuwu mpuuke hai Yesu i lalu kapateNa, ina mohintuwu worike hai Ia i tempota rapatuwo hule himbela hai Ia. 6Taisa halalu, katuwonta au hangkoia rapapatemi hihimbela hai Kerisitu i kau mombehape bona dosa barapi makuasa i lalu katuwonta hai barapoke napohawi dosa. 7Lawi ikita, himbelake hai tauna au matemi, au tekabahami hangko i dosa. 8Mewali, ane matemoke hihimbela hai Kerisitu, tapoinalai kaina tuwonta wori hihimbela hai Ia. 9Lawi taisa halalu, Kerisitu au rapatuwo hulemi hai barapi ina mate. Kapate barapi makuasa Iria. 10Yesu mate monangimi kuasa dosa, hambela pea i hae-haena. Hai ide-ide, Ia tuwo mampeulai peundeana Pue Ala. 11Nodo wori ikita, hangangaa tauli, “Matemona hihimbela hai Kerisitu Yesu; barapona mohintuwu hai dosa. Tuwomona moula peundeana Pue Ala i lalu pohintuwuku hai Kerisitu Yesu.”
12Ido hai kuweikau lolita, halalu: inee tapogiangaa dosa mokuasai katuwonta i dunia ide; inee tapeulai peundeana lalunta au kadake. 13Ineemi tahuhu watanta nakuasai dosa, au moantike mobabehi babehia au kadake. Agina tahuhu katuwonta i Pue Ala, lawi tekabahamoke hangko i katuwonta au hangkoia hai molambimoke katuwo au wou. Hangangaa tahuhu watanta i Pue Ala bona watanta ide tapake mobabehi babehia au manoto. 14Ikita, barapoke nakuasai dosa, bara anti pampeulainta Aturana Musa, agaiana anti pampeulainta kabulana laluna Pue Ala.
To sarani rapandiri nodo hawi
15Mewali noumba halalu! Ane nahoremamoke Pue Ala bara anti pampeulainta Aturana Musa, agaiana anti kabulana pea laluna Pue Ala, ba peisamoke mobabehi dosa? Inee nodo halalu. 16Niisato halalu, pandirina, ane mengkoruke i hadua tauna hai mampeulaike hawana, napohawimoke tauna iti. Nodo wori hai dosa, ane mampeulai liliuke peundeana lalunta au kadake, napohawimoke dosa. Kahopoana ina molambike kapate au mogaakike hangko i Pue Ala hawe i hae-haena. Agaiana ane mengkoruke i Pue Ala, mewalike taunana Pue Ala au mampeulai peundeaNa.
17Mangulina ngkaia kamaroana i Pue Ala, lawi hangkoia hangko damanikau mepoinalai i Yesu, napohawikau dosa. Agaiana ide-ide hangko i lalumi mpuu mampeulai paturo au rapahaweakau. 18Mewali, tekabahamokau hangko i kanapohawimi dosa, hai mewalimokau hawina Pue Ala au moula peundeaNa. 19Ngkora pandiriku ide kupake bona mamura kaniisana paturongku. Hangkoia napohawikau dosa, lawi moula peakau peundeana lalumi au kadake hai au bara hintoto, alana napohingka rumihiri kakadakena babehiami. Agaiana ide-ide, agina nihuhu watami i Pue Ala bona mewalikau hawiNa alana manoto babehiami hai malelaha tuwomi.
20Hangkoia i kanapohawimi mani dosa, barakau mampeulai peundeana Pue Ala. 21Rasi apami au nihumba hangko i katuwomi au hangkoia iti? Bara mpuu ara! Babehiami au hangkoia nipokaeami. Babehia iti moantikau i kapate au mogaakikau hangko i Pue Ala. 22Agaiana ide-ide, tekabahamokau hangko i kuasa dosa hai mewalimokau taunana Pue Ala. Itimi au moanti rasi irikamu, alana malelaha tuwomi, hai kahopoana molambikau katuwo maroa hawe i hae-haena. 23Hema au mobabehi dosa batena molambi hurungina, hai hurungina iti iami kapate au mogaakike hangko i Pue Ala. Agaiana anti kabulana laluna Pue Ala irikita, ido hai Naweike katuwo maroa au bara mokahopoa. Kabulana laluNa iti tahumba anti pohintuwuta hai Kerisitu Yesu, Amputa.
