Roma 1
1
Paulu iami surona Pue Yesu i tauna au barahe to Yahudi
1Sura ide hangko iriko, Paulu, hawina Yesu Kerisitu, au Napilei hai Natudu mobambari Ngkora Marasa hangko i Pue Ala. 2Ngkora Marasa ide nadandimi Pue Ala hai rapahawemi nabi-nabi hangkoia, nodo au teuki i lalu Sura Malelaha. 3Ngkora Marasa iti mampololita kana i Anana Pue Ala, au rapoanaka himbela hai manusia hangko i pemuleana Datu Daudi. 4TuwoNa malelaha nodo Pue Ala hai i pearona hangko i olo tomate, mewali hambua tanda kuasa au mopatongawa, Yesu Kerisitu Amputa iti, iami Anana Pue Ala. 5Hai anti kaYesuna, Naweina Pue Ala pewati mahile, Naangkana mewali suroNa bona iko au mobambari Ngkora Marasa i tauna au barahe to Yahudi i humalele dunia. Kupaturohe bona mepoinalaihe hai mengkoruhe i Pue Yesu, duuna hangana Yesu rapomahile. 6Nodo wori ikamu to Sarani au i Roma, au kabosana barakau to Yahudi, Nakakio worikau Pue Ala mewali kirana Yesu Kerisitu. 7Ido hai kupakatu sura ide irikamu, to Sarani i Roma, lawi Pue Ala mampokaahikau hai mokakiokau mewali taunaNa au malelaha. Kuharunga Pue Ala Umanta hai Pue Yesu Kerisitu mowatikau hai moweikau roa ngkatuwo.
Paulu mampeinao mosondaki to Sarani au ara i Roma
8Ioru, mopahawena katana lalungku i Ampuku Pue Ala i lalu hangana Yesu Kerisitu, anti kaikamuna halalu, lawi tebambarimi i humalele dunia kamarohona pepoinalaimi i Pue Yesu. 9Pue Ala au kupobagoa hangko i lalungku i lalu pobambaringku Ngkora Marasa kana i AnaNa, Iami au mewali sabingku, noumba kakukabelaimi bela-belangku mekakae. 10Mekakakaena, merapi i Pue Ala bona ane Napokana, hambela tempo peisakau lao kusondaki. 11Lawi kupeinao mpuu hidupa hai ikamu bona kukira-kiraakau pewati hangko i Inao Malelaha au ina mopakaroho pepoinalaimi. 12Tunggaiaku bona tepakaroho worina anti pepoinalaimi; mewali peisake momberohongi mpolalu hadua hai hadua.
13Halalu bona niisa bosami belana ara tunggaiaku lao mosondakikau, agaiana ara liliu au mohombokina. Tunggaiaku mosondakikau bona pobagongku ara wori wuana i olomi, nodo pobagongku au arami wuana i olonda tauna au barahe to Yahudi au arahe i wanua ntanina. 14Moinda mpuuna kuhadi i ope-ope tauna, maroa to Yunani ba au barahe to Yunani, maroa au mosikolahe ba au barahe mosikola. 15Idomi hai kupeinao mpuu mopahawe wori Ngkora Marasa irikamu au i Roma.
Hangko i Ngkora Marasa, taisa noumba rarana Pue Ala moimbake manoto i peitaNa
16Barana maea mopahawe Ngkora Marasa. Lawi hema pea au mampoinalai Ngkora Marasa iti, kuasana Pue Ala mohoremahe hangko i huku dosanda, nguru-nguruna i to Yahudi, hawe-hawe wori i tauna au barahe to Yahudi. 17Hangko i Ngkora Marasa iti, taisa noumba rarana Pue Ala moimbake manoto i peitaNa, anti pepoinalainta Iria. Bara ara rara ntani, lawi i lalu Sura Malelaha teukimi node, “Tauna au manoto i peitana Pue Ala, ina molambihe katuwo maroa anti pepoinalainda.”
Ope-ope tauna madosa hai masala i peitana Pue Ala
(1:18–3:20)
Manusia moisa kaarana Pue Ala, agaiana barahe mau menomba Iria
18Hangko i suruga Pue Ala mopatongawa karumpuNa i ope-ope tauna au madosa, maroa i pekirinda ba i babehianda au kadake, lawi hinangka babehia kadake ina mohomboki tauna mampeulai paturo au manoto kana i Pue Ala. 19Katouana apa au raisa tauna kana i Pue Ala tongawami, lawi napakanotoamohe Pue Ala haduduaNa. 20Kehapiri kamakuasana Pue Ala au monono hai kamahilena tuwoNa bara peisa taita, agaiana ope-ope iti peisa taita hangko i hinangka au Napopewali hungka i pewalina dunia. Mewali, bara ara manusia au peisa manguli, “Bara wongkoia kuisa kaarana Pue Ala.” 21Raisato kaarana Pue Ala, agaiana barahe mengkoru Iria, hai bara wori raisa manguli ngkaia kamaroana Iria. Pekirinda kakakaraoari hangko i Pue Ala, alana makaindi lalunda. 22Rapehangu mapandemohe, mole ntulitorihe! 23Barahe mau menomba i Pue Ala au tuwona monono. Menombarihe i watu au rababehi himbela hai lengge pinatuwo au peisahe mate; nodo tadasi, binata au mobiti iba hai binata au mendele ba nodo manusia.
24Ido hai Napogiangaa pearaihe Pue Ala mampeulai peundeana lalunda au kadake, alana mobabehihe babehia au merikai hai hore mombedaihihe. 25Barahe mampeulai paturo au tou. Moularihe paturo au mepakanawo. Bararihe menomba i Pue Ala au mampopewali hinangkana au ara, agaiana menomba hai mengkorurihe i hinangka au napopewali Pue Ala. Moleri Pue Ala, au mampopewali hinangkana itiri, au masuka ratoia i hae-haena. Amin!
26Mewali, anti kadanda mau menomba i Pue Ala, ido hai Napogiangaamohe moula peundeana lalunda au mepakaea iti. Hawe-hawe i towawine, barapi tedii lalunda i tobalilo. Agaiana hadua-hadua towawine mampotambiarihe hangka towawinenda. 27Nodo wori tobalilo bararihe mampotambia towawine, agaiana mohaokirihe hangka tobalilonda. Tobalilo mobabehi babehia au bara hintoto hai hangka tobalilonda. Kahopoana molambihe pehuku au hintoto hai babehianda au merikai iti.
28Lawi i pekirinda barapohe paraluu moisa Pue Ala, ido hai Napogiangaami Pue Ala pekirinda mewali kadake, alana mobabehihe babehia au bara hintoto. 29Lalunda buke hai hinangka au kadake hai au bara manoto. Mehiorohe, kadakehe, mahinahe; rapeinao peami mepapate, mobungka-bungkahe, meakalangihe, mombepailaluhe, hai meuli-ulihe, 30mopakadakehe hangka ranganda, mokahihihe Pue Ala, makasarahe, barahe keada, mampemahilehe, hai mampopetoiahe. Matopahe mohaoki rara mobabehi dake. Moewahe tosaenda. 31Barahe mapande, barahe mopabukei dandinda, bara ara ahinda, bara raisa metulungi. 32Nauri moisatohe aturana Pue Ala au manguli hema-hema au mobabehi nodo hangangaa rahuku mate. Agaiana batenda mobabehi mpaliliu babehia au kadake iti, hai rapokana wori ane ara ranganda au mobabehi nodo.
