Mak 13
13
Jesu ta Ota kpahe Ẹghwọrọ rẹ uwevwi rẹ ẹga na
(Matiu 24.1-2; Luk 21.5-6)
1Ro vwo nẹ uwevwi rẹ ẹga na cha ọvo vwẹ idibo rọye da ta kẹ, Oyono, ni, egheghẹre rẹ eragha kugbe eghẹre re ẹdovwọ! 2Jesu da ta kẹ, Wọ mrẹ ẹdovwọ ride nana? Oragha ọvuọvo ro che chekọ vwẹ enu rẹ oragha ọfa, re che je kporo she teye otọ herọ-ọ.
Etuọhọ rẹ Uvweri na
(Matiu 24.3-14; Luk 21.7-19)
3Ro vwo tidia enu rẹ ugbenu rẹ Oliv hirhe aro ku uwevwi rẹ ẹga na, Pita, kugbe Jems kugbe Jọn vẹ Andru da nọ vwẹ odjahọ, 4Ta kẹ avwanre ọke ọvo imu nana che vwo ruẹ? die re cha dia oka rẹ ọke rẹ imu nana ejobi cha vwọ gba? 5Jesu de mu ayen họ eta kẹ, Ovwan kẹnoma rere ohwo vwo jẹ ovwan esuo ghwro. 6Ihwo buebu cha rhe vwẹ odẹ mẹ, ta nẹ, Mẹvwẹ hẹ ọye, i mi sun otu buebu ghwru. 7Vwẹ ọke rẹ ovwan de che nyo ifovwi kugbe usi rẹ ifovwi, ovwan jẹ udu kpokpo ovwa-an; imu nana cha ka phia tavwe, ẹkẹvuọvo yẹ oba na ji te-e. 8Kidie ẹgborho che vrẹn vwọ so ẹgborho uvie cha vwọ so uvie, etọ che kpogho vwẹ asan buebu ewẹvwe che fi enana re cha dia ẹtuọhọ rẹ oja.
9Ẹkẹvuọvo ovwan kẹnoma rẹ ovwan. kidie ayen reyọ ovwan vwọ kẹ ediaguare, ayen che hwe ovwan vwẹ evun ri sinagọg; a cha vwẹ ovwan mudia vwẹ obaro rẹ ehọnvwọre kugbe ivie vwi fiki mẹ, re ọ dia iseri kẹ ayen. 10Iyẹnrẹ esiri na kọye e ke ghwoghwo kẹ akpọ na ejobi tavwe. 11Ra da rhe vwẹ ovwan guẹdjọ, re de mu ovwan kẹ ayen, ovwan ro ẹnwan jẹ iroro rẹ obo rẹ ovwan ta-a; ẹkẹvuọvo obo ra vuẹ ovwan vwẹ ọke yena ọye wọ ta; kidie ọ dia ovwan re ta-a ẹkẹvuọvo Erhi Ọfuanfon na. 12Oniọvo cha vwẹ oniọvo re odọvwe ra vwọ mrasan hwe ghwu, ọsẹ cha vwẹ ọmọ re ọdọvwe; emọ che vrẹn vwọ so i ri vwiẹ ayen, rere evwo hwe ayen ghwu. 13Ihwo ejobi cha jẹ ovwan eghrẹ vwi fiki rẹ odẹ mẹ; ẹkẹvuọvo ohwo ro se chirako ri te oba, ọye re cha rhọ.
Ukpokpogho Rode na
(Matiu 24.15-28; Luk 21.20-24)
14Re ovwan da ghwa mrẹ emu rẹ ẹguaegbe rọ nẹrhẹ asan vẹn ro mudia vwẹ asan rọ foro-o je jẹn ọ ro se riẹn otọ rọye, gbe jẹn otu re dia obi Judia djẹ kpo enu rẹ igbenu; 15e jẹn ohwo rọ hẹ enu rẹ uwevwi wotọ-ọ, eyẹ ọ vwẹriẹ uwevwi rọye, ra reyọ emu no-o; 16e jẹn ọ rọ hẹ evun rẹ aghwa rhivwi cha cha reyọ ewun rọye-e. 17Ẹkẹvuọvo ekan kẹ otu re mrevun kugbe otu re vwẹ ivie kẹ emọ vwẹ ẹdẹ yena! 18Ovwan nẹ ẹrhovwo re o jẹ ọke ohwahwa ẹdia. 19kidie ukpokpogho ra je mrẹ dẹvo-o nẹ ẹtuọhọ rẹ ẹma rẹ Ọghẹnẹ rhe rhi te ọke nana cha phia vwẹ ẹdẹ yena, a gbe je mrẹ oghẹre ọtiọye ọfa bẹdẹ-ẹ. 20Ọ dianẹ kẹ Ọrovwohwo gbi bru ẹdẹ na krẹ-ẹ, ohwo rọ rhọ gbe dia-a; ẹkẹvuọvo vwi fiki rẹ otu ra jẹreyọ na, ọye o vwo ru ẹdẹ na krẹ. 21Vwẹ ọtiọye na ohwo da ta kẹ ovwan, Nighe Kristi hẹ etinẹ, eyẹ, Nighe, Ọ hẹ oboyi, we segbuyota-a; 22Kidie Kristi rẹ efian kugbe emraro rẹ efian che mu, e cha vwẹ eka kugbe imuighunu phia, o de se ru dede ayen phiẹn otu ra jẹreyọ na ghwru. 23Ẹkẹvuọvo ovwan kẹnoma; nighe Me ta imu na ejobi kẹ ovwan nure.
Ẹcha rẹ Ọmọ rẹ Ohwo na
(Matiu 24.29-31; Luk 21.25-28)
24Ẹkẹvuọvo vwẹ ẹdẹ yena, rẹ ukpokpogho na de re nu, ọnre ko che mu ebri, emeranvwe gbi se lo-o. 25Isio ki che she nẹ enu rhe egangan re he obo odjuvwu ki che kpogho. 26Kẹsiẹye etiyin ayen ke cha mrẹ Ọmọ rẹ ohwo rọ cha vwẹ evun rẹ egho vẹ ogangan rode kugbe urinrin. 27Etiyin ko che ji emakashe na, re koko otu ra jẹreyọ na nẹ igogo ẹne rẹ akpọ na rhe nẹ oba rẹ akpọ na re rẹ oba rẹ odjuvwu.
Uyono rẹ Urhe rẹ Owe na
(Matiu 24.32-35; Luk 21.29-33)
28Ovwan gbe yono itẹ rẹ urhe rẹ owe na; ọkẹ rẹ eghọn rọye da hẹ eboba, re e da ghwẹ ẹbe phihọ ovwan gba ghwa riẹn nẹ ọkeuvo sikẹre re. 29Ọtiọye rhe, ọke rẹ ovwan da mrẹ imu nana re rhe phia ovwan gba riẹn nẹ o sikẹre unurhoro kpekpe re. 30Uyota Me ta kẹ ovwan, orua nana sa wan bẹsiẹ rẹ imu nana ejobi vwo ru gba-a. 31Odjuvwu kugbe akpọ cha wan ẹkẹvuọvo ota mẹ sa wa-an.
Ohwo ọvuọvo Riẹn Ẹdẹ na eyẹ Ọke na-a
(Matiu 24.36-44)
32Ẹkẹvuọvo ẹdẹ yena eyẹ ọke yena ohwo ọvuọvo riẹnrẹ-ẹ emakashe re hẹ obo odjuvwu dede sa riẹ-ẹn eyẹ Ọmọ-ọ, ẹkẹvuọvo Ọsẹ na ọvo. 33Ovwan kẹnoma, a rhẹrẹ ra nẹ ẹrhovwo; kidie ovwan riẹn ọke ro vwo te-e. 34Kẹrẹsiẹ rẹ ohwo e de kpo oyan, rọ da yan jẹ uwevwi rọye vwo, ọ da vwẹ ogangan kẹ idibo rọye, dohwo diruo rọye o de jiji kẹ ọrhẹrẹchẹ re ọ rhẹrẹ. 35Vwẹ ọtiọye na ovwan rhẹrẹ; kidie ovwan riẹn ọke rẹ ọ ro vwo uwevwi na vwo rhe-e, sẹ ovwọnvwọn, gbenẹ uherevie ason, gbenẹ ọke rẹ ọhọ de bo, eyẹ urhiọke; 36rẹ ọ da rhe orharhiri re o jẹ ovwan ẹvwa vwẹ ovwerhẹ. 37obo me ta kẹ ovwan na, ihwo ejobi mẹ taro kẹ, A rhẹrẹ.
നിലവിൽ തിരഞ്ഞെടുത്തിരിക്കുന്നു:
Mak 13: UBV77
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible in Urhobo © United Bible Societies, 1977.
