Matiu 5
5
Ẹtuọho rẹ Iyẹnrẹ Esiri na vwẹ enu rẹ Ugbenu
(Matiu 5–7)
1Rọ vwọ mrẹ urogho na, o de yeri kpo enu rẹ ugbenu, ro vwo tidia nu idibo rọye de bro rhe.
2O de rhie unu rọye o de yono ayen ta nẹ,
Ẹrhovwo rẹ Ebruba Na
(Luk 6.20-23)
3Ebruba kẹ igbere vwẹ erhi; kidie uvie rẹ odjuvwu kọ dia ọrayen.
4Ebruba kẹ ihwo ri muomahọ; kidie e bru ayen uche.
5Ebruba kẹ ihwo ri ruẹ dẹndẹn; kidie ayen cha reuku rẹ akpọ na.
6Ebruba kẹ ihwo rẹ owẹvwe rẹ ọvwata hwe; kidie evun cha vọn ayen.
7Ebruba kẹ ihwo ri ni aruẹdọn; kidie ihwo efa ki ji ni aruẹdọn kẹ ayen.
8Ebruba kẹ ihwo rẹ evun rẹ ayen fonro; kidie ayen cha mrẹ Ọghẹnẹ.
9Ebruba kẹ ihwo rẹ kẹ ufuoma; kidie e che se ayen emọ rẹ Ọghẹnẹ.
10Ebruba kẹ ihwo re muru ekueku fiki rẹ ọvwata; kidie uvie rẹ odjuvwu kọ dia ọrayen.
11Ebruba kẹ ovwan, vwẹ ọke rẹ ihwo da ghwọ ku ovwan, rẹ ayen de mu ovwan, rẹ ayen da ta ota ọbrabra kpahe ovwan fiki mẹ. 12Ghọghọ re oma vwerhe ovwan, kidie osa rẹ ovwan pha rhuarho vwẹ obo odjuvwu; kidie ọtiọye e ke kpokpo otu rẹ emraro re karo kẹ ovwan.
Ughweraka vẹ Urhukpẹ
(Mak 9.50; Luk 14.34-35)
13Ovwan ughweraka rẹ akpọ na. Ẹkẹvuọvo ughweraka de ku avwerhe rọye kufia, komavọ o ru vwerhe? o gbi yovwi ọfa-a, ke kuo kufia, ihwo ki chiyo wan. 14Ovwan urhukpẹ rẹ akpọ na. Orere rọ hẹ enu rẹ ugbenu ọ sa djahe-e. 15Yẹrẹ ihwo sa vwẹ urhukpẹ rhu phihọ otọ rẹ ikuru-u, ẹkẹvuọvo ke muo kpahe enu rẹ emẹjẹ, kọ la mu uwevwi na ejobi. 16Eriyin na gbe jẹ urhukpẹ wẹn la vwọ kẹ ihwo, rere ayen mrẹ iruo esiri wẹn rere ayen vwẹ ejiro kẹ ọsẹ wẹn rọ hẹ obo odjuvwu.
Uyono kpahe Urhi na
17We roro nẹ me rhere rhe guọghọ irhi na eyẹ iruo rẹ emraro na-a, me rhere guọghọ-ọ, ẹkẹvuọvo mi rhi ru ayen gba. 18Uyota me ta kẹ ovwan, bẹsiẹ rẹ odjuvwu vẹ akpọ vwọ wan, umuku rẹ ota mẹ ọvuọvo se she fia-a, rhiri bẹsiẹ rẹ imu na ejobi vwọ gba, 19Kohwo kohwo ro miovwo ọvo vwẹ irhi nana, ro de yono ihwo ghwru, ọye cha ma hanvwe vwẹ uvie rẹ odjuvwu; ẹkẹvuọvo kohwo kohwo ro ru ayen gba ro de yono ayen gba, ohwo yena re cha ma rho vwẹ uvie rẹ odjuvwu. 20Kidie me ta kẹ ovwan nẹ, jokpa nẹ uruemu rẹ ovwan yovwi nọ otu ri Farisi kugbe isiẹbe na-a, ovwan sa ro uvie rẹ odjuvwu-u.
Uyono kpahe Ophu
(Luk 12.57-59)
21We nyori ra vwọ ta kẹ ihwo rẹ awanre nẹ, wo hwe ohwo-o, kohwo kohwo ro hwe ohwo ke vwo gu ẹdjọ. 22Ẹkẹvuọvo me ta kẹ ovwan nẹ, ohwo kohwo rẹ evun rẹ omoni rọye miovwiri ekueku, ke vwo gu ẹdjọ; ohwo kohwo ro harhe omoni rọye nẹ, Eghwobi, ke vwo guẹdjọ kẹ ukoko rẹ ihwo, ohwo rọ harhere nẹ, Wẹ ẹkpa na, kọ vwẹ ẹro siẹn oja rẹ erhanre ri bẹdẹ. 23Fiki rẹ eriyin na, wo de ze izobo wẹn vwẹ enu rẹ agbada, wọ da karohọ nẹ wọ vẹ omoni wẹ vwo ota, 24yan je izobo wẹn vwo vwẹ enu rẹ agbada na, rere wọ yanran, re wọ vẹ omoni wẹ na rhuẹrẹ kugbe tavwe rere wo ki rhi ze izobo wẹn. 25Wọ vẹ ọvweghre wẹn fobo rhuẹrẹ kugbe siẹ wọ da ghwọ nu; ọ dia ọtiọye-e, ọvweghrẹ wẹn na ko siọbe se we, enọkpa ki mu we rhe oguẹdjọ, oguẹdjọ ko mu we kpo uwodi; 26Uyota me ta kẹ wẹ, wo se nẹ uwodi na rhe-e, bẹsiẹ wọ vwọ hwa osa re wọ rere nu.
Uyono kpahe Igberadja
27Ovwan nyori re vwo ji urhi nẹ, Wo gbe igberadja-a; 28ẹkẹvuọvo me ta kẹ wẹ nẹ, kohwo kohwo ro ni aye rẹ ohwo ọfa opharo ro de je, yẹ o duro vwẹ udu rọye nure. 29Ẹro wẹn da nẹrhẹ owẹ she, rhuo nu ro nẹ uwe oma; kidie oyoma kẹ wẹ rere ẹro wẹ rhu, nọ rẹ ekroma wẹn ejobi de ghwru. 30Obọrhe wẹn da nẹrhẹ owẹ she, bro nu ro nẹ uwe oma; kidie oyoma kẹ wẹ rere obọ wẹn kru, nọ rẹ ekroma wẹn ejobi de kpo orho rẹ igbẹphẹre.
Uyono kpahe Obọesiono
(Matiu 19.9; Mak 10.11-12; Luk 16.18)
31A je ta nẹ, kohwo kohwo ro siobọ nẹ aye rọye, e jo siọbe rẹ obọesiono vwọ kẹ; 32ẹkẹvuọvo me ta kẹ ovwan nẹ, ohwo kohwo ro siobọ nẹ aye rọye, jokpa nẹ o gbe ọfarhiẹ, yo gbe igberadja; ohwo kohwo rọ reyọ aye re siobọ nu yo ji gbe igberadja.
Uyono kpahe Iyori eduvwo
33Ọfa we ji nyo re vwo ji urhi kẹ ihwo rẹ awanre nẹ, Wo duvwu iyori-i, ẹkẹvuọvo ive wẹ ejobi Ọrovwohwo wo ve ayen kẹ; 34ẹkẹvuọvo me ta kẹ wẹ nẹ, Wo duvwu iyori-i, wo se odjuvwu duvwẹ-ẹ, kidie oboyi hẹ ekete rẹ Ọghẹnẹ; 35wọ je vwẹ akpọ duvwẹ-ẹ, kidie ọye hẹ asan rẹ Ọghẹnẹ ghwẹ awọ rọyẹ phihọ; wọ fa odẹ ri Jerusalẹmu-u, kidie ọye hẹ orere rẹ Ivie. 36Wọ fa odẹ rẹ uyovwi-i, Kidie wo se ru ogẹto ọvo fo-on, siẹvo kẹ ebio-o. 37Ẹkẹvuọvo jẹ Ẹjo wẹn dia Ẹjo, ji E wẹn dia E; ọ da vrẹn enẹ kẹ efian.
Uyono kpahe Orukeri
(Luk 6.29-30)
38Wo ji nyo ra vwọ ta nẹ, a vwẹ ẹro hwa osa rẹ ẹro ako hwa osa rẹ ako; 39ẹkẹvuọvo me ta kẹ wẹ nẹ, Wọ vẹ ohwo umwemwu sioma-a, ẹkẹvuọvo ohwo da teye owẹ ọhwa rẹ obọrhe, rhẹriẹ orivẹ kẹ. 40Ohwo de kpono uwe kpo ẹguare fiki rẹ ikotu wẹ, gba je ghwiẹ adagba wẹn kẹ. 41Ohwo da gba wẹ nẹ, wọ vẹ ọyẹ yan uroko ọvo, nene yan ivẹ. 42Ohwo da yare owẹ vwọ kẹ, ohwo de bru uwe rhe ri momo wọ sia kẹ-ẹ.
Guọnọ Ivwighrẹ wẹn
(Luk 6.27-28, 32-36)
43Wo ji nyo ra vwọ ta nẹ, guọnọ igbeyan wẹn, rere wọ vẹ ivwighrẹ wẹn ghwọ. 44Ẹkẹvuọvo me ta kẹ wẹ nẹ, guọnọ ivwighrẹ wẹn, nẹ ẹrhovwo kẹ ihwo ri kpokpo uwe, 45ke se ovwan emọ rẹ ọsẹ rọ hẹ ọbo odjuvwu, kidie uvo rọye muẹ ọbo vẹ ogbori, osio rọye hwe ọvwata vẹ oruimwemwu. 46Wọ da guọnọ igbeyan wẹ ọvo ki didi erere ri te we? Otu rẹ imiarhọghọ na rhe ji ru ọtiọye rhe-e? 47Wọ da sanọ imoni wẹ ọvo yeri, kidie wo rhe vwo yovwi nọ ihwo efa vwo? Otu rẹ ikeferi na ji ruẹ ọtiọye rhe? 48Ọtiọye na ovwan gba fon kirobo rẹ Ọsẹ rẹ ovwan rọ hẹ obo odjuvwu fonro na.
നിലവിൽ തിരഞ്ഞെടുത്തിരിക്കുന്നു:
Matiu 5: UBV77
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible in Urhobo © United Bible Societies, 1977.
