Matiu 23
23
Jesu harhe Isiẹbe kugbe Farisi
(Mak 12.38-40; Luk 11.37-52; 20.45-47)
1Jesu da ta kẹ ihwo buebu na kugbe idibo rọye nẹ, 2Otu rẹ isiẹbe kugbe otu ri Farisi na mia tidia umukpe ri Mosis; 3Kemu kemu rẹ ayen tanẹ ovwan ru, we ru ayen, wa nabọ vwẹ ẹro te ayen; ẹkẹvuọvo wa vwẹ ẹro kere aye-en, kidie obo rẹ ayen ta san, yẹ ọ rẹ ayen ruẹ san. 4Nighe, ayen mi kru oghwa ọhọhọhọ kpahe igabọ rẹ ihwo efa, yẹ ayen cha vwẹ obọ te-e. 5Kidie ayen di ruẹ ọnana ghevweghe rere ihwo vwọ mrẹ ayen; kidie ayen ruẹ igbabọ hẹhẹre, ayen mi rhe ko iwun rẹ ayen reghereghe. 6Ayen mia guọnọ asan ro kpenu tidia, kugbe agbara ro yoma vwẹ evun rẹ Sinagọg, 7kugbe uyere vwẹ afieki, rere ihwo mrasan se ayen iyono. 8Ẹkẹvuọvo we jẹ ohwo se ovwan iyono-o; kidie ohwo ọvuọvo ọye hẹ oyono, otu ri chekọ kẹ imoni. 9Ovwan sẹ ohwo ọvuọvo ọsẹ vwẹ akpọ na-a; Kidie ohwo ọvo ọye ọsẹ rẹ ovwan rọ hẹ obo odjuvwu. 10We jẹ ohwo se ovwan onini-i; Kidie ohwo ọvo ọye hẹ onini rẹ ovwan, ohwo yena hẹ Kristi. 11Ẹkẹvuọvo ohwo rọ rhoro vwẹ uherevie rẹ ovwan e gbe jo gbe odibo. 12Kohwo kohwo ro kpare oma kpenu, ke vwo kpotọ; ọ rọ vwẹ oma kpotọ ke vwo kpenu.
13Ẹkẹvuọvo ekan kẹ ovwan, isiẹbe kugbe Farisi, evworọn efian! kidie we huhu ẹchẹ rẹ uvie rẹ odjuvwu gbe ihwo; ovwan guọnọ ruọ-ọ, yẹ ihwo efa re guọnọ ruọ ovwan da ayen ji.
14Ekan kẹ ovwan, isiẹbe kugbe Farisi, evwọrọn efian! ovwan mia guọghọ uwevwi rẹ eyauku, ovwan me vwẹ omeru nẹ ẹrhovwo rẹ efian grogro, eriyin na ovwan cha reabe rode. 15Ekan kẹ ovwan isiẹbe kugbe Farisi, evwọrọn efian! kidie ovwan riẹriẹ ihwo vwo kugbe oma rere usun rẹ ovwan vwo bu phihọ.
16Ekan kẹ ovwan isun ihwo ri rhuẹro, re tanẹ, Ohwo da vwẹ odẹ rẹ ishọshi duvwu iyori, yo fi emuọvo-o, ẹkẹvuọvo ohwo rọ vwẹ oro rọ hẹ enu rẹ agbada duvwu iyori, yẹ ọ riosa o ruẹ. 17Ovwan ẹkpa kugbe irhuẹro na; ọrhọ re marho, oro gbinẹ ishọshi ra vwẹ oro na rhuẹre? 18Ohwo kohwo rọ vwẹ agbada na duvwu iyori, yẹ emu diodi; ẹkẹvuọvo ohwo rọ vwẹ izobo ro hẹ enu rọye duvwu iyori, yẹ ọ riosa o ruẹ. 19Ovwan irhuẹro na; ọrhọ re marho, izobo gbenẹ agbada na ra vwẹ izobo na rhuẹre? 20Ohwo rọ vwẹ agbada duvwu iyori, yo vwiro duvwu iyori kugbe obo rọ hẹ enu rọye ejobi. 21Ohwo ro vwẹ ishoshi duvwu iyori, o ji vwo duvwu iyori kugbe obo re hẹ evun rọye ejobi. 22Ohwo rọ vwẹ odjuvwu duvwu iyori, yọ vwẹ ekete rẹ Ọghẹnẹ duvwu iyori kugbe ohwo ro tidia vwẹ enu rọye.
23Ekan kẹ ovwan otu rẹ isiẹbe kugbe Farisi, evwọrọn efian! ovwan nenesi rẹ emu fanfaurhiẹ, we mi gbobọnyẹ emu ro fori, eta re urhi, ẹdjeguo, aruẹdọn kugbe esegbuyota; enana fobo ru we ru jovwo, we de gbobọnyẹ ayen. 24Ovwan isun rẹ irhuẹro ri phorho iyẹn nẹ ame da, je ro ọsoso rẹ erhuẹn.
25Ekan kẹ ovwan, isiẹbe kugbe Farisi, evwọrọn efian! kidie ovwan hworhẹ obuko rẹ uko vẹ ọsete, ẹkẹvuọvo yẹ obo evun rọyen vọnre vẹ ọghware kugbe umwemwu. 26Ovwan Farisi ri rhuẹro na, ovwan ka hworhẹ evun rẹ uko kugbe ọsete na tavwe, rere wa ke hworhẹ obuko rẹ ayen.
27Ekan kẹ ovwan, isiẹbe kugbe Farisi, evwọrọn efian! kidie ovwan họhọ ushi ra vwẹ oda ọfuanfon ghworo, rọ pha yoyovwi vwẹ uphẹnphẹn, yẹ obo evun rayen vọnre vẹ ibeku kugbe inuhu. 28Eriyin ovwan vwẹ oma phia yoyovwi kẹ ihwo vwẹ otafe, ẹkẹvuọvo obo evun rẹ ovwan vọnre vẹ efian kugbe umwemwu.
29Ekan kẹ ovwan, isiẹbe kugbe Farisi, evwọrọn efian! kidie ovwan tọn ushi rẹ emraro na, ekpuyovwi rẹ ovwan da nabọ rhuẹrẹ ushi rẹ evwata na. 30Ayen da ta nẹ, ọ diane avwanre herọ vwẹ ọke rẹ esẹ rẹ avwanre vwenẹ, avwanre e koko hwe emraro na-a. 31Fiki rẹ ọtiọye na, ovwan ọvo kọye ri se iseri hwe oma rẹ ovwan nẹ, esẹ rẹ avwanre ri hwe emraro na. 32Ovwan gbe ru kirobo rẹ esẹ rẹ ovwan ruru. 33Ovwan eredekọ na, uvwiẹ rẹ ọrobiebi na, komavọ ovwan ru se nabọ rẹ ẹdjeguo rọ cha na? 34Fiki re eriyin na, mi de ji emraro mẹ kugbe evwaghwanre, kugbe isiẹbe, we hwe evo, wa kanre evo mu agbagba; we che ru evo oja vwẹ evun rẹ Sinagọg rẹ ovwan, we mi rhe mu ayen nẹ orere kpo orere. 35Rere osa rẹ evwata rẹ ovwan hweri vwẹ akpọ na vwọ dia uyovwi rẹ ovwan, nẹ ọbara rẹ Ebẹl rẹ ọvwata, re te ọbara ri Zakaraya rẹ ọmọ ri Barakaya rẹ ovwan hweri vwẹ enu rẹ agbada. 36Uyota me ta kẹ ovwan, osa rọye ọ hẹ enu rẹ uyovwi rẹ ovwan.
Jesu viẹ kẹ Jerusalẹm
(Luk 13.34-35)
37E Jerusalẹm, Jerusalẹm, ro hwe otu rẹ emraro na, rọ vwẹ elalọ phiẹ ihwo re ji bru ovwan rhe na! mavọ mi se ovwan koko te kerẹsiẹ rẹ ọhọ a da vwẹ ibekpe rhurhu emọ rọye, yẹ ovwan je rhọvwe-e. 38Nighe me yan jẹ uwevwi rẹ ovwan vwo ofefe. 39Kidie me ta kẹ ovwan nẹ, Ovwan gbe cha mrẹ vwẹ ọfa-a, bẹsiẹ rẹ ovwan vwọ ta nẹ, Ebruphihọ kẹ ọ rọ cha vwẹ odẹ rẹ Ọrovwohwo.
നിലവിൽ തിരഞ്ഞെടുത്തിരിക്കുന്നു:
Matiu 23: UBV77
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible in Urhobo © United Bible Societies, 1977.
