Matiu 21

Udje-ẹne kpo Jerusalẹm vẹ Aghọghọ

(Mak 11.1-11; Luk 19.28-40; Jọn 12.12-19)

1Rẹ ayen rhi vwo si kẹrẹ Jerusalẹm, rhi te asan re sẹ Bẹtfag, vwẹ ugbenu rẹ Oliv, Jesu de ji idibo rọye ivẹ, 2ọ da ta kẹ ayen nẹ, wa yanran kpo evun rẹ ọko rọ hẹ obaro rẹ ovwan na, wa da ruọ ovwan cha mrẹ ẹkẹtẹkẹtẹ vẹ ọmọ re churu; wa rhan rere we vwo rhe vwe. 3Ọ da dianẹ ohwo da nọ ovwan ota, wa ta kẹ nẹ, Ọrovwohwo re guọnerọ; kọ yan jẹ ovwan vwo. 4Ọnana ruru rere obo rẹ emraro na tare vwọ gba nẹ,

5Ta kẹ ẹmẹtẹ ri Zayọn,

Nighe, ovie rẹ ovwan bru ovwan cha,

Fuefu, ọ rọ gua vwẹ enu rẹ ẹkẹtẹkẹtẹ,

upene rọyẹ.

6Idibo na da yanran, ayen da mrẹ kirobo ri Jesu dje kẹ ayen na. 7Ayen da reyọ ekẹtẹkẹtẹ na vwo rhe kugbe upene rọye na, ayen da vwẹ iwun rayen hwa; o de tidia enu rọye. 8Ihwo buebu da riẹn iwun rayen vwọ hwa idjerhe; evo da nyavwe ewanvwe vwọ hwa idjerhe na. 9Usun rẹ ihwo ri nenire vwẹ obaro vẹ obuko, de kuvwie, Hozana kẹ Ọmọ ri Devid; Ebruphihọ kẹ ohwo rọ rhere vwẹ odẹ rẹ Ọrovwohwo; Hozana vwẹ asan ro kpenu. 10Ọke ro rhi vwo te Jerusalẹm, orere ejobi ko muẹ kpogho, ayen ke nọ nẹ, Ọna ono vwo? 11Ihwo na da ta nẹ, Ọnana ọmraro na, Jesu rẹ ohwo ri Nazarẹt ri Galili.

Ephorho rẹ Uwevwi rẹ Ẹga na

(Mak 11.15-19; Luk 19.45-48; Jọn 2.13-22)

12Jesu da ro evun rẹ uwevwi rẹ Ọghẹnẹ, ọ da djẹ ihwo buebu re she kugbe e re dẹ vwẹ evun uwevwi rẹ ẹga, o de geri imeje rẹ otu ri wene igho she, kugbe egbara rẹ otu re shẹ ilekuku; 13Ọ da ta kẹ ayen nẹ, e siro nẹ, Uwevwi mẹ e se nẹ uwevwi rẹ ẹrhovwo; ẹkẹvuọvo we vwi ro ru unu rẹ iji. 14Te irhuẹro te ikpono de bro rhe evun rẹ uwevwi rẹ ega na; o de sivwi ayen. 15Ẹkẹvuọvo ọke rẹ ilori rẹ irherẹn kugbe isiẹbe vwọ mrẹ emu rẹ igbunu ro ruru, kugbe imitete ri kperẹ Hozana kẹ ọmọ ri Devid vwẹ evun rẹ uwevwi rẹ ẹga na, ivun de miovwo ayen gangan. 16Ayen da ta kẹ nẹ, Wo nyo obo rẹ imitete na ta na? Jesu da ta kẹ ayen nẹ E; ovwan ji se dẹvo nẹ, Unu rẹ imitete ejiro da gba? 17Ọ da yan jẹ ayen vwo, o de vrẹn nẹ orere na kpo Bẹtani, kẹ oboyi o wo phihọ.

Eharho rẹ Urhe rẹ Owe na

(Mak 11.12-14, 20-26)

18Vwẹ irhiọke ro vwo rhivwi kpo orere na, owẹvwe de hwe. 19Rọ vwọ mrẹ urhe rẹ owe vwẹ orhoma rẹ idjerhe, o de te esiri rọye, ọ mrẹ emuọvo vwẹ enu rọye-e; jokpa rẹ ẹbe ọvo; ọ da ta kẹ nẹ, Ohwo ọvuọvo gbe sa re ubi wẹn bẹdẹ-ẹ. 20Ọke rẹ idibo na vwọ mrẹ, o de gbe ayen unu nẹ, Mavọ urhe rẹ owe na ghwe vwioro nu nanana? 21Jesu da kpahe ọ da ta kẹ ayen nẹ, Uyota me ta kẹ ovwan, We de vwo esegbuyota, we rhe vwo iroro ivẹ-ẹ, ọ dia obo re phia kẹ urhe rẹ owe na ọvo ovwan ru-u, ẹkẹvuọvo ke wa ta kẹ ugbenu nana nẹ, ghwie re she phihọ urhie, kọ dia ọtiọye. 22Kemu kemu ejobi rẹ ovwan nọre vwẹ esebuyota, ovwan ke mrẹ ayen.

Enanọ kpahe Ogangan ri Jesu

(Mak 11.27-33; Luk 20.1-8)

23Ọke ro rhi vwo te evun rẹ uwevwi rẹ ẹga, ilori rẹ irherẹn kugbe ekpako na de bro rhe, ro vwo yono ayen na, ayen da ta nẹ, Didi ogangan wo vwo ruẹ imu nana? Ono kẹ wẹ ogangan nana? 24Jesu da kpahe ọ da ta kẹ ayen nẹ, Me je nọ ovwan enanọ ọvo tavwe, ovwan da sa kpahọ kẹ vwẹ, Ke me je ta ogangan ri mi vwo ruẹ imu nana kẹ ovwan. 25Ame ẹreyọ ri Jọn ri Baptist tivọ o nurhe? obo odjuvwu gbenẹ ọ rẹ ihwo? Ayen ki roro ota na vwẹ udu rayen nẹ, avwanre da ta nẹ obo odjuvwu; kọ ta kẹ avwanre nẹ, Kidie ovwan gbi segbuyota-a. 26Ẹkẹvuọvo avwanre da ta nẹ, Ọ rẹ ihwo, ọshọ rẹ ihwo buebu na mu avwanre, kidie ihwo na ejobi rhọvwere nẹ Jọn ghine hẹ ọmraro. 27Ayen da kpahe kẹ Jesu nẹ, Avwanre riẹnre-e. Ekpuyovwi rọye da kpahe kẹ ayen nẹ, ye me gbe je ta ogangan ri mi vwo ruẹ imu nana kẹ ovwa-an.

Itẹ rẹ Emọ Ivẹ na

28Ẹkẹvuọvo die ovwan rori vwọ? Ọshare ọvo de vwo emọ ivẹ; ọ de se ọ rẹsosuọ ọ da ta kẹ nẹ, Mọmẹ, yanran kpo obo udju rere wo re ru iruo. 29Ọ da kpahe ọ da ta nẹ, me cha ra-a: ẹkẹvuọvo ukuko rọye ọ da rhoma ra. 30Ọ de rhe se ọrivẹ ọ da ta kẹ nẹ, yanran kpo obo udju mẹ. Ọ da kpahe ọ da ta nẹ me ra, yọ rare-e. 31Kọrhọ vwẹ usu rẹ emọ na ivẹ na ri ru ẹguọnọ rẹ ọsẹ rọye? Ayen da ta nẹ Ọ rẹsosuọ na, Jesu da ta kẹ ayen nẹ, Uyota me ta kẹ ovwan, otu rẹ imiarhọghọ kugbe igberadja na cha karo kẹ ovwan ra ro uvie rẹ Ọghẹnẹ. 32Kidie Jọn bru ovwan rhe vwẹ ọ rẹ ọvwata, ovwan sere gbuyota-a, ẹkẹvuọvo otu rẹ imiarhọghọ kugbe igberadja na sere gbuyota; ovwan re mrẹrẹ dede na se kurhẹriẹ we de segbuyota-a.

Itẹ rẹ Urhe rẹ Vain kugbe Ihwo rẹ yara otọ na

(Mak 12.1-12; Luk 20.9-19)

33Ovwan gbe rhoma kerhọn rẹ itẹ ọfa. Ọghwẹrẹ ọvo herọ rọ kọn ogba ri vain, ọ da nabọ gba ogba phihọ, ọ da bọn asan re de miẹ vain, ọ da bọn uwevwi rẹ enu phihọ, eghwẹrẹ efa da yaro ogba na mie tavwe ro ki kpo isiorho. 34Ọke rẹ ororo vwo te re, o de ji odibo rọye bru ayen ra ra kọrọ emamo rẹ udju na rhe. 35Eghwẹrẹ na de mu idibo na, ayen da fa ọvo ayen hwe ọfa, ayen de phi ọ ro chekọ na ghwu. 36Ọ da rhoma ji idibo rọye efa, buebu nọ e rẹsosuọ; ayen de ji ru ayen kerẹ e rẹsosuọ. 37Ẹkẹvuọvo ukuko rọye o de ji ọmọ re obọ rọye nẹ, ayen vwẹ ọghọ kẹ ọmọ mẹ na. 38Ẹkẹvuọvo, eghwẹrẹ na vwọ mrẹ ọmọ na ayen da ta kẹ omoma rẹ ayen nẹ, Ọnana re cha reuku na; yanrhe re avwanre hwe, re avwanre reyọ uku rọye na. 39Ayen de muo, ayen de kpono nẹ evun rẹ ogha na ra teyọ hwe. 40Ọke rẹ ọ ro vwo ogba na de nyo komavọ o ru otu rẹ eghwẹrẹ na? 41Ayen da ta kẹ nẹ, Kọ guọghọ eghwẹrẹ na ibribro, kọ reyọ ogba na vwọ kẹ ihwo efa, re sa reyọ emamọ vwo rhe vwẹ ọke ororo rọye. 42Jesu da ta kẹ ayen nẹ, Ovwan ji se vwẹ ẹbe ọfuanfon na, Oragha rẹ ihwo re bọn uwevwi senre,

Kọye ri hirhe phihọ omamọ rẹ uchivwo vwẹ ubienyẹ.

Ọnana iruo rẹ Ọrovwohwo,

Ọ da dia igbunu vwẹ ẹro re avwanre.

43Eriyin na me ta kẹ ovwan nẹ, Ke che mie ovwan uvie rẹ Ọghẹnẹ na, ka vwọ kẹ ẹgborho ọfa, ro sa vwẹ emamo esiri phia vwẹ ọke rọye.

44Ohwo ro she teyọ oragha nana kọ guọghọ yẹghẹyẹghẹ; ẹkẹvuọvo oragha na de she nyẹ ohwo kọ guọghọ ivwivwuvwu.

45Ọke rẹ ilori rẹ irherẹn na kugbe otu ri Farisi vwo nyo itẹ nana, kẹ ayen roro nẹ ayen ọ ta kẹ. 46Ayen da guọnọ muo, yẹ oshọ rẹ otu buebu na gbi jẹ ayen ruo-o, kidie ayen riẹnre nẹ ọmraro o ruẹ.

നിലവിൽ തിരഞ്ഞെടുത്തിരിക്കുന്നു:

Matiu 21: UBV77

ഹൈലൈറ്റ് ചെയ്യുക

പങ്ക് വെക്കു

പകർത്തുക