Matiu 13

Itẹ rẹ Ọkekankọn na

(Mak 4.1-9; Luk 8.4-8)

1Vwẹ ẹdẹ yena Jesu de vrẹn kpo otafe, o de tidia vwẹ orhoma rẹ abadi. 2Ihwo buebu de koko bro rhe, ọ da ro evun rẹ okọ o de tidia; ihwo na ejobi de mudia vwẹ orhotọ. 3Ọ da ta ota buebu kẹ ayen vwẹ itẹ, ọ da ta nẹ, Nighe, ọkekankọn ọvo yanran ra kọn. 4Rọ vwọ kọn na, emamọ evo de she phihọ orhoma rẹ idjerhe, emephran da sohrọ ayen re. 5Ẹvo de she phihọ enu rẹ oragha, asan ro vwo ekpẹn buebu-u; o ji kri na-a e da ghwa djẹ, kidie ekpẹn na kodori-i; 6Ọke rẹ ọnre vwọ varhe, o de vwioro, fikiridie ọ vwo owọ-ọ o de ghwu. 7Ẹfa de she phihọ ohri rẹ inwe; inwe na dje rhe i de duvwu ayen hwe. 8Ẹfa de she phihọ otọ esiri, e da djẹ e da mọ emamọ, evo ujori, evo ujorha, evo ọgban. 9Ọ ro vwo erhọn, e jo nyo.

Obo re Sorọ re vwo kpe Itẹ na

(Mak 4.10-12; Luk 8.9-10)

10Idibo rọye de bro rhe, ayen da ta kẹ nẹ, Die nẹrhẹ owẹ kpe itẹ kẹ ayen? 11Ọ da kpahe kẹ ayen nẹ, Ovwan a tare nẹ e riẹn odjahọ rẹ uvie rẹ odjuvwu, ẹkẹvuọvo ihwo efa itẹ kọye a vwọ ta kẹ ayen. 12Kidie kohwo kohwo ro vwori, ọye a vwọ kẹ, ko vwo buebu, kohwo kohwo ro vwori-i, emerha ro vwori na ka rhoma mie. 13Fiki rẹ ọtiọye na mi vwo kpe itẹ kẹ ayen, fikiridie ayen mrẹ orẹ yẹ ayen se vughe-e, ayen nyo ẹme yẹ ayen riẹn otọ rọye-e. 14Kẹ ọna aroẹmrẹ rẹ Aizaya vwọ sẹ rọ tare nẹ,

Ovwan se nyo, yẹ ovwan riẹn otọ rọye-e,

Ovwan sa mrẹ, yẹ ovwan se vughe-e.

15Kidie udu rẹ ihwo nana figberi,

Erhọn rayen diri;

Ẹro rayen ji ghwe rhu;

Re ayen jẹ orẹ ẹmrẹ,

Rere ayen vwo jẹ ẹme enyo;

Udu rayen de rhe roro;

Ayen de rhe kurhẹriẹ,

E de rhe sivwi ayen.

16Ebruba kẹ ẹro rẹ ovwan, kidie ayen sa mrẹ; ebruba kẹ erhọn rẹ ovwan, kidie ayen se nyo. 17Uyota me ta kẹ ovwan nẹ, emraro buebu kugbe evwata buebu re guọnọre nẹ ayen mrẹ emu rẹ ovwan mrẹre na, yẹ ayen sa mrẹ-ẹ; re ayen ji nyo obo rẹ ovwan nyori na, yẹ ayen se nyo-o.

Jesu fan Otọ re Itẹ rẹ Ọkekankọn na

(Mak 4.13-20; Luk 8.11-15)

18Ovwan gbe kerhọn rẹ itẹ na. 19Ọke rẹ ohwo de nyo ikun rẹ uvie rẹ odjuvwu rọ gbe riẹn otọ rọye-e, idẹbono kọ cha, ọ me rhe kọrọ ota na nẹ udu rọye. Edje nana họhọ emamọ ri she phihọ orhoma rẹ idjerhe ye. 20Ena hẹ edje ra kọn phihọ otọ rẹ oragha, eye hẹ edje ri nyo ota na, ayen da vwẹ aghọghọ reyọ. 21Ẹkẹvuọvo ayen ghwa riẹn otọ rọye-e, o rhi vwo kri emerha, ọdavwini vẹ ukpokpogho vwọ rhe ayen de she. 22Enana hẹ i ri she phihọ ohri rẹ inwe, ena hẹ edje ri nyo ota na; ẹnwan rẹ akpọ kugbe ophiẹvwe rẹ efe mi rhi keke ota na, ọ gbe sa mọ emamọ-ọ. 23Ọ ra kọn phihọ otọ rẹ esiri na, eye hẹ edje ri nyo ota na, re riẹn otọ rọye, e da ghene mọ emamọ, evo ujori, evo ujorha, evo ọgban.

Itẹ rẹ Ẹgo na

24O de ji kpe itẹ ọfa kẹ ayen nẹ, uvie rẹ odjuvwu hohọ ohwo rọ kọn emamọ esiri phihọ udju rọye. 25Ẹkẹvuọvo ọke rẹ asọn re ihwo vwọ vwerhẹ nu, ọvweghrẹ rọye da rhe kọn ego kugbe irosu na, ọ da yanran. 26Ọke rhi vwo te, ego na vẹ irosu na de rhi gro kugbe. 27Idibo rẹ ohwo na da rhe vuẹ nẹ, Ọga, ọ dia irosu wọ kọn phihọ udju wẹ-ẹn? Komavọ ego rha vwọ djẹ vwọ? 28O da ta kẹ ayen nẹ, Ọvweghrẹ ri ru emu na. Idibo rọye da ta kẹ nẹ, Avwanre gbe re ghwie ayen kufia? 29Ọ da sen ta nẹ, we de ghwie ego na kẹ ovwan vwẹ irosu na ba ghwie. 30We jẹn ayen ivẹ na rho kugbe tavwe. Orhọ de te re, ke me ta kẹ otu ri vuẹ nẹ, Ovwan ka ghwẹ ego na koko, wa gba ayen ẹkuẹko rere a torhẹ ayen; ẹkẹvuọvo irosu mẹ ri chekọ na we gbeje ayen kpo erhu.

Itẹ rẹ Ubi rẹ Uyerhie na

(Mak 4.30-32; Luk 13.18-19)

31O de ji kpe itẹ ọfa kẹ ayen nẹ, Uvie rẹ odjuvwu họhọ ubi rẹ uyerhie ra kọn phihọ udju; 32Ẹsosuọ o da dia yẹyẹghẹ; ẹkẹvuọvo ukuko rọye ọ da rhe rho nọ ekankọn re hẹ udju na ejobi, o de rhi hirhe phihọ okpurhe, emephran da rhe bọn ẹho phihọ enu rọye.

Itẹ rẹ Iphuephu na

(Luk 13.2o-21)

33Ọ da rhoma kpe itẹ ọfa kẹ ayen nẹ, Uvie rẹ odjuvwu họhọ ekuọka rẹ aye phare phihọ ọko erha, i de rhi phu tututu.

Itẹ ekpe ri Jesu

(Mak 4.33-34)

34Itẹ nana ejobi eye Jesu kperi kẹ ihwo buebu na, ọ dia itẹ-ẹ a gbe ta ota kẹ aye-en.

35Rere ota rẹ ọmraro na tare vwọ gba nẹ,

Ki mi rhie unu mẹ vwo kpe itẹ;

Eta re djahere nẹ ẹtuọhọ rẹ akpọ na rhe,

keye me cha ta.

Jesu fan Otọ rẹ Itẹ rẹ Ẹgo na

36Ọ da yan jẹ ihwo na vwo, ọ da ro evun rẹ uwevwi; idibo rọye de bro rhe rhe nọ otọ rẹ itẹ na nẹ, Gbe dje otọ rẹ ite rẹ ego na kẹ avwanre. 37Ọ da ta nẹ ohwo rọ kọn emamọ esiri na vwenẹ ọye Ọmọ rẹ ohwo; 38Udju na vwenẹ kẹ akpọ na; emamọ esiri na kọye hẹ emọ rẹ uvie na; ẹgo na kẹ emọ rẹ idẹbono; 39Ọvweghrẹ na kẹ idẹbono; orhọ na kẹ oba rẹ akpọ na, ihwo ri vuẹ na kẹ emakashe. 40Kirobo ra gba ego na koko ra da torhẹ ayen na, ọtiọye ọba rẹ akpọ na cha dia. 41Ọmọ rẹ ohwo ko che ji emakashe rọye ro akpọ na, ayen kẹ cha sanọ ihwo ri kpokpo uvie rọye nẹ akpọ na kugbe ihwo ri ruẹ imwemwu koko, 42Ka ghwẹ ayen phihọ erhanre ri bẹdẹ; kẹ etiyin ayen da reako kugbe oviẹ. 43Otu rẹ evwata ki che lo kerẹ ọnre vwẹ uvie rẹ Ọsẹ na. Ọ ro vwo erhọn e jo nyo.

Itẹ rẹ Efe re Sinu

44Uvie rẹ odjuvwu họhọ igho rẹ ohwo tọn phihọ otọ; rẹ ohwo ọfa mrẹre o de sionu; o de kpo vẹ aghọghọ ra shẹ obo ro vwori ejobi, ọ da rhe dẹ oto na kẹ oma rọye.

Itẹ rẹ Irhu rọ Ghare Gangan

45Ọfa, uvie rẹ odjuvwu họhọ ọneki rọ guọnọ irhu oyoyovwi. 46Rọ vwọ mrẹ irhu na re, o de kpo ra she emu ro vwori ejobi, ọ da dẹ.

Itẹ rẹ Obriki

47Ọfa rọye, uvie rẹ odjuvwu họhọ ọbriki re phi phihọ ame, o de mu kemu kemu; 48Ọke rọ vwọ vọn nu, e de siọ phihọ otọ, ayen de tidia, nabọ sanọ omamọ rẹ iyeri re herọ phihọ okọ, asihọ vẹ ehẹbe re herọ e de ku ayen kufia. 49Ọtiọye ọ cha dia vwẹ oba rẹ akpọ na; emakashe ke cha rhe, ke cha sanọ evwata nẹ ohri rẹ iruimwemwu. 50Ka cha ghwẹ ayen phihọ erhanre rode; etiyin ayen da viẹ reako rayen.

Uyono Kpokpọ vẹ ọ rẹ Awanre

51Ovwan je riẹn otọ rẹ imu nana-a? Ayen da rhọvwe kẹ nẹ, E. 52Ọ da ayen nẹ, kosiọbe kosiọbe re vwọ ru odibo rẹ uvie rẹ odjuvwu, ọ họhọ ohwo ro vwo uwevwi, rọ reyọ emu ọkpokpọ kugbe e rẹ awanre nẹ evun rẹ ighẹn rọye cha.

A Siẹn Jesu vwi Nazarẹt

(Mak 6.1-6; Luk 4.16-30)

53Ọke rhi vwo te, ri Jesu vwo kpe itẹ rọye ejobi nu, o de vrẹn nẹ etiyin. 54Ro rhi vwo te orere rẹ obọ rọye, o de yono vwi senagọg, o de gbe ayen unu, ayen da ta nẹ, Tivọ ohwo nana de vwo eghwanre nana kugbe iruo ride nana. 55Ọna dia ọmọ rẹ ọwena na-a? re se oni rọye Meri? rọ vẹ Jems, Josẹf, Saimọn kugbe Judas gba hẹ imoni? 56Rẹ iniọvo rẹ emetẹ rọye vẹ avwanre gba herọ na-a? Ki tivọ o de yono imu nana? 57Ivun ko miovwo ayen. Ẹkẹvuọvo Jesu da ta kẹ ayen nẹ, Ọbo se vwo ọghọ vwẹ orere rẹ obọ roye-e, eyẹ uwevwi rọye-e. 58Ọ gbi se ru iruo ride vwẹ etiyi-in, fiki ri je segbuyota rayen.

നിലവിൽ തിരഞ്ഞെടുത്തിരിക്കുന്നു:

Matiu 13: UBV77

ഹൈലൈറ്റ് ചെയ്യുക

പങ്ക് വെക്കു

പകർത്തുക