Zẹkaraya 13
13
1Kụrọmamgba nyana KỊNỊNYANAḄỌ ḅe ḅẹẹarị, “Anị ene mẹ ḅụ, ngụngụḅa finji ḅa, kẹ Devidi furo-ḅẹ-apụ ma na Jeruselemu ḅẹ apụ ma na sịkịrị fịafịama ịna si na oru-afụḅara tẹkẹ na ḅụ. 2Anị ene mẹ ḅụ, àrị amakiri mẹ ḅụ oru-afụḅara ẹrẹ ma saakị siin ḅa, tẹ gbọrụḅọ-sọ ḅarị jen kẹ ịn kẹ ḅiokoroma ḅịa. Ịkịankoroḅọ kẹ amịna ḅụụ ọkịarị ḅọ goḅọ-goḅọ, arị mḅọ na mịẹ ye nyana ḅịa, tẹ oru-afụḅara tẹkẹ ḅioḅẹngbọ mẹ ọkị so ḅa. 3Anịtẹso gbọrụḅọ paa ḅiiarị mḅọ ịkịankoro ḅẹḅẹ, ò soku-ḅẹ ḍaḅọ na iyingiḅọ na ḍuko ọ̀ pịrị ḅa mịnẹ ini ọ̀ ḅaa ḅa, ori ọ̀ ḅụụ ọkịm ọ̀ KỊNỊNYANAḄỌ ḅe ẹkwẹn kọn-arị, kụma iruoye mie ò ḍuko ye anị kiri ḅụ, ori ịkịankoroarị ogbo ọ̀ ḍa na ò iyingi na ogie kẹ ò temi ḅaa ḅa. 4Anị ene mẹ ḅụ, gbọrụ ịkịankoroḅọ sọ mḅọ ẹrị ịkịan ma kẹ ḅụụ-tọn ḅịa, anịanịa ịkịankoroḅọ kịka ḅara kẹ ye mịẹ, anịanịa ịkịankoroḅọ kụrọtẹ ḅịtẹ paka sụa tẹ kẹ oḅori kẹ kịnị sịn. 5Anie nakara ọ̀ ḅẹẹ ḅa, ‘Yẹrị ịkịankoroḅọ-a. Yẹrị ḍụọ-kọrịḅọ — ì ḍumo mamgba à kẹ kiri kẹ ye ḍiḅi tẹẹ.’ 6Anịtẹso gbọrụḅọ ò gbela-gbela, ‘Í ekpe la wararị aị ma ḅọrọ tọ-aị?’ ọ̀ pakịrị ḅa, ‘Ì ikiaḅọ warị ḅụ arị ị̀ lam.’ ”
Ịn tọnm Tamụnọ Anana-ḍikiḍikiḅọ Ḅaa
7 #
Mat 26.31; Mak 14.27 Kụrọmamgba nyana KỊNỊNYANAḄỌ ḅe ḅẹẹarị, “Mono ḅụ saakị, okologie, tẹ owu kẹ namakọrị ị̀ pịrịarị anana-ḍikiḍikiḅọ ḅe paka! Ọ̀ ḅaa, tẹ anana ma gala-gala ḅa. Yẹrị owu kẹ ị̀ atomi paka ḅa, 8tẹ bebe amakiri mẹ kana-koro ḅụ tomi ma kẹ tẹra anga ḍie ḅẹ maa anga fịị ḅa. 9Anịsakị à fịịa-so gbọrụ anga mẹ daaḍiki ḅa. Àrị ịn daaḍiki ḅa golu daaḍiki ḅara. Anịtẹso ini ị̀ tẹkẹ ḅa, tẹ àrị ịn pakịrị ḅa. À ḍuko ịn pịrị ḅa mịnẹ ini ị̀ atomi, tẹ ini nwẹnị ḍuko pakama ḅa mịnẹ yẹrị ịna Tamụnọọ.”
(C) The Bible Society of Nigeria