Devidi-Anume 64
64
Tamụnọ Tomḅọ Gbaịn Ḅẹ Tẹkẹ
1Tamụnọ, ḅụụ-fụka ị̀ la tẹẹ
à kọn-arị tẹkẹ pokii!
Si kẹ ị̀ tọn-arị apụ ma ị̀ ḅalafamarị
ì ḍumo ḅọrọma-a!
2Si-sịḅịḅio-sụa apụ ma ḅịyarị
aḅẹrẹ ma ḅụ ị̀ gbaịn,
si-mịẹapụ ogbo-ogbo ma ḅụ sọ.
3Ini okologie farị ḅara kẹ ịna
aḅẹlẹ farị oḅumarị
tẹ ḍịn kẹ ye da tẹ tẹịn ḅẹ ḅara kẹ
ịna si ẹkwẹn ma kẹ kịnị daarị.
4Ịn ḅụụ-jịrị-a tẹ sarama ịna iruo
ẹkwẹn ma kọn wasamarị;
ịn tọrụ ḅọị tẹ ọḅụ ẹkwẹn kẹ
iḅi atomi gulugulumarị.
5Ịn jụmọ-jụmọ ḅiokpọmarị
in ḅịyarị si aḅẹrẹ ma ḅụ!
Ini ịna ḍiein ma tuu wẹrị ḅẹ anga
tọn pẹlẹ tẹ ḅẹẹarị,
“Gbọrụḅọ sọ inetẹ arị ẹrị ḅịa.”
6Si aị mie ịn tọn pẹlẹ tẹ ḅẹẹarị,
“Wa wa mịẹ ḅẹ siye tọn kpaịnma tẹ.”
Tomḅọ ḅioḅẹngbọ na kuroma na anie
pokolotẹ kịnị nimi-a ḅọị ye.
7Kụma Tamụnọ ori aḍịẹịn kẹ ịn tẹịn-arị,
tẹ ḅiotọn-a ḅara kụma ye ịn la tẹ.
8Ịn kọn-arị ẹkwẹn ma ẹrẹsị ori ịn ḅaa
guluguluma ḅa;
ini ẹrị apụ mamgba amịna
asịḅị jike ḅa.
9Inimgba ḅalafa ḅa;
ịn Tamụnọ mịẹ tẹ ye mẹ kẹ ḅiokoroma ḅa,
tẹ ori amịẹaị ma gboloma ẹkwẹn kọn ḅa.
10Karakaraye-mịẹapụ mamgba ḍereku ḅa
KỊNỊNYANAḄỌ ḅe mịẹ tẹ ye mẹ ẹrẹsị.
Ini ẹrị ḅa ini ọ̀ ḅụụ emi ogbo ye ịn la ḅịa;
iḅi-apụ mamgba ò tokini ḅa.
(C) The Bible Society of Nigeria