Devidi-Anume 46
46
Tamụnọ Wamịnị Na Emi
1Tamụnọ wa kikimarị, pịkị ịnyọ kẹ wa pịrịarị.
Sakị mamgba ori emi tẹ ḅarasụa wa
pịrịarị ḅụụ-fụka asakị ḅụ.
2Mie ḅụ kiri mẹ jikearị sọ wa ḅalafa ḅịa,
tẹ tụndụ ma soku mu abajị owolo ḅio koro sọ;
3opu atọrụ ma daarị tẹ ọnụngọ ḍụrụkụarị sọ;
tẹ tụndụ ma dasịẹma-a ḅara kẹ opuma jikearị sọ.
4Gbọrụ tọrụ emi tẹ sọ ḅo ḅioḅẹlẹ kẹ Tamụnọ opu ama mẹ pịrịarị;
tẹ ḅo Gele Tẹịnḅọ ḅe fịafịa warị mẹ laarị.
5Tamụnọ anị opu ama mẹ ḅio emi,
gbala-gbala anị fama-fama ye paka ḅịa;
dede-funfun ḅụ ò ḅo ḅarasụa anị pịrị ḅa.
6Ama sịẹ-sịẹ ma tẹmẹ-naịn-naịn tẹẹ, amadapụ ma daarị anga ma jike tẹẹ;
Tamụnọ so-alagba tẹịn-arị, tẹ kiri mẹ mẹnịma-faarị.
7Kụrọ mamgba nyana KỊNỊNYANAḄỌ ḅe wamịnị na emi; Jekọbụ Tamụnọ ḅe anie wamịna ḅụụ-ḅọị-yọ.
8Ọ̀ paa ḅo KỊNỊNYANAḄỌ ḅe kọrị tẹ ye mẹ ẹrị.
Ọmịnị ọ̀ mịẹ tẹ ḅalafama ḅụụ-buama-aị ma ẹrị tomikiri mẹ ḅụ.
9Bebe tomikiri mẹ kana-koro ḅụ ori ọmụ pẹlẹ-pẹlẹ-pẹlẹarị;
Ori iboli ma anyịmarị, ḅẹkẹrẹ ma gulugulumarị,
pịkị ekpeke ma kẹ fịnị ḅio dọkịmarị.
10Ọ̀ ḅẹẹarị, “Ọ́ ḅarị ọmụ gbin ma,
tẹ nimi mịnẹ yẹrị Tamụnọ;
sịẹ-sịẹ ma ogboku yẹrị tẹịnḅọ,
tomikiri mẹ kana-koro ḅụ yẹrị tẹịnḅọ.”
11Kụrọmamgba nyana KỊNỊNYANAḄỌ ḅe wamịnị na emi;
Jekọbụ Tamụnọ ḅe anie wamịna ḅụụ-ḅọị-yọ.
(C) The Bible Society of Nigeria