Devidi-Anume 41
41
Obiarị ḅọ Tẹkẹ Mẹ
1Igoin-apụ ma balarị apụ ma ḅioḅẹlẹ sime ịn pịrịm;
KỊNỊNYANAḄỌ ḅe ḅarasụa ịn pịrị ḅa, ḅụụ-fụka ịn la sakị.
2KỊNỊNYANAḄỌ ḅe ịn gbaịn tẹ
ịna ḍumo koko kpaịnma ḅa;
ọ̀ mịẹ tẹ in ḅioḅẹlẹ ḅa amakiri mẹ ḅụ,
ori ịn kẹ gbin kuroma si kẹ ịn tọn
apụ ma kụrọ pịrị ḅịa.
3Ini obi sakị KỊNỊNYANAḄỌ ḅe
ḅarasụa ịn pịrị ḅa:
tẹ ori ịn saakịma tẹ ịna oju kụrọ ḅa.
4À ḅẹẹm, “KỊNỊNYANAḄỌ, à si kẹ ị́ mịẹ tẹ:
ọkụrụkụrụ nyana ị̀ pịrị tẹ ị̀ gwọ.”
5Si kẹ ị̀ tọn apụ ma si-aị, si-aị
ḍukoarị ì gbolomaye ḅụ.
In ḅiiarị à fịị tẹ tomi ị̀ kẹ ḅioḅọrọma.
6Ì obi kiri mẹ ḅụ ị̀ ẹrị ḅẹ ḅoarị
apụ ma ịn karakara tẹmẹ kẹ ḅo-a;
ini ì gboloma si-aị ḍọkị mu
ḍuko-ḍuko ama-kanarị.
7Ì ḍiki-ḅioḅuarị apụ mamgba ị̀ kẹ
jụmọ-jụmọ na fiearị:
si tẹịn ye mie ịn kẹ ị̀ tọmarị.
8Ini mẹẹ, “Ọ̀ fịị ḅẹ obi kọn-arị;
ori obi iḅila mẹ ọgọnọ gbala-gbala
ò jen kẹ saakị ḅịa.”
9 #
Mat 26.23; Mak 14.18; Luk 22.21; Jọn 13.18 Ị̀ iḅi tẹịn ikiaḅọ ḅe, tẹ à kẹ
ḅiokpọma tẹịn ḅọ ḅe,
ị̀ na ị̀ fịye fị-fị ḅọ ḅe sọ,
pịkị tẹ ị̀ na tụḅụrụ tẹẹ.
10KỊNỊNYANAḄỌ, ọkụrụkụrụ nyana ị̀ pịrị,
tẹ ị̀ saakịma tẹ ì oju kụrọ
anịsakị à si kẹ ị̀ tọn apụ ma kẹ
ị̀ mịẹ ye mẹ ḅẹ gbẹẹfị ḅii ḅa.
11Ini ị̀ nẹngịma ḅịa:
anịsakị à nimi ḅa mịnẹ ị̀ mịẹ ye
ị́ ḅụụ-ḅẹlẹ arị.
12Ị́ ḅarasụa ị̀ pịrị ḅa,
à kuraye mịẹarị ẹrẹsị:
ị́ ị̀ kẹ ị́ tọrọkọ wẹrị mu ḅẹẹ-sakị ḅẹẹ-sakị la ḅa.
13 #
Dev 106.48
KỊNỊNYANAḄỌ ḅe tokinii, Izirẹlịapụ tẹkẹarị Tamụnọ ḅe!
Ò tokinii, mịọkụ na pịkị ḅẹẹ-sakị ḅẹẹ-sakị na ḅụ!
Amẹnị! Amẹnị!
(C) The Bible Society of Nigeria