Devidi-Anume 147
147
Kụrọmamgba Nyana Tamụnọ Ḅe Tokini Nume!
1Ọ́ KỊNỊNYANAḄỌ ḅe tokinii!
Nume su wamịna Tamụnọ ḅe tokini mẹ iḅi;
ò tokini mẹ ḅụụ-ḅẹlẹmam, pịkị kuram.
2KỊNỊNYANAḄỌ ḅe mịẹ tẹ Jeruselemu naa-saakịarị;
ori in kun so ja sịẹ mu apụ ma pịkịma-ḅoarị.
3Ò ḅioḅẹngbọ kan-saratẹ apụ ma gwọarị
tẹ ịna aḅụụ ḅẹ ịnọ ma fịnarị.
4Ò lolia ma kịẹn-ḅịḅị tọn-pẹlẹ tẹ
tẹ ẹrẹ kẹ gberie, gberie sịn-arị.
5Wa NYANAḄỌ ḅe anie ḍụḅa na ḅaka na ḅẹ;
kịnị inetẹ ò nimi la ḅara tọn nimi ḅịa.
6Ọ̀ ḅụụ-lẹgịmarị ḅọ mẹ sakị iwomarị,
kụma ò si-sịḅịḅio-sụapụ ma gbẹẹ kọsịma kiri pịrịarị.
7Ó nume su-su tẹ kẹ KỊNỊNYANAḄỌ ḅe tokinii;
ọmịnị ọbọ ḅụ nume farị wamịna Tamụnọ ḅe pịrị;
8Ori oḅuto wasamarị So-tọrụ mẹ ḅẹ;
ọ̀ mịẹ tẹ eene koroarị kiri mẹ ọgọnọ,
tẹ tụndụ ma ọgọnọ osuka pakarị.
9Ori fịye kẹ nama ma pịrị fịarị
tẹ asambịrịma ekule afeni ma kokoarị, ini ọ̀ sịn sakị.
10Ọ̀ kụrọ wararị asụ ma ḅụ tọrụ-ḅẹlẹ nyana-a,
ḅiokpọ nyana wararị ọmụapụ sọ ò ḅioḅẹlẹma-a;
11kụma ọ̀ kụn-arị apụ ma ḅụ mie ọ̀ tọrụ-ḅẹlẹ nyanarị,
ò kuno-a ḅẹlẹma mẹ kẹ ḅiokpọmarị apụ ma.
12KỊNỊNYANAḄỌ ḅe tokinii, yei Jeruselemu!
Ị́ Tamụnọ ḅe tokini, yei Zayọnị!
13Ori í ogigo-aḅọkọ ma wẹrị kụrọmarị;
ori ị́ atomi bomarị.
14Ori ị́ angarị anga mẹ ikelema-koro mamgba wẹrị kpaịnmarị,
tẹ ị́ na iḅi ḅẹ ḅara kẹ iḅitẹịn mbịaka kẹ ị́ pịrịarị.
15Ọ̀ tọn kiri mẹ pịrịarị,
tẹ ò ḍukoarị ye mẹ anị gbọrụ kiri mịẹarị.
16Bịlangịdị ḅara kẹ kpootẹ eene kẹ kiri mẹ gbaịn-arị
tẹ kpooarị eene kẹ fọọn ḅara wasamarị.
17Ori onwin mgbọlị kịka eene kẹ fịrịmarị
gbọrụḅọ-sọ inetẹ ọ̀ fịrịmarị oḅoku mẹ inema, inema-a!
18Anịtẹso ọ̀ tọn tẹ kpootẹ minji mẹ sanịarị;
ọ̀ fẹrụ fịrịma tẹ mịẹ tẹ minji mẹ mẹnjịarị.
19Ori ori oku mẹ kẹ ori atomi pịrịarị,
ori ịn mịẹ ḅẹ tẹ ò ḍuko aị ma na oloko ma na kẹ Izirẹlị pịrịarị.
20Amụ ò miemẹ mịẹ ja sịẹ pịrị-a;
ini ma ini ori oloko ma nimi-a.
Ọ́ KỊNỊNYANAḄỌ ḅe tokinii!
(C) The Bible Society of Nigeria