Jobu 41
41
KỊNỊNYANAḄỌ Ḅe Seki Gbolomaye Kẹ Jobu Na Ẹkwẹnm
KỊNỊNYANAḄỌ Ḅe gbelam:
1 #
Dev 74.14; 104.26; Ayị 27.1 Ị́ inetẹ inji-ḅaa-arị kẹ seki nụnụ pakama-ḅo ḅẹ,
anịanịa ḍiki kẹ ọ̀ ḅịḅị-ḅio ḅẹ ḅẹlẹ kpọ iderima ḅẹ?
2Ị́ inetẹ ḍigi kẹ ò nini ḅụ sụa ḅẹ,
anịanịa inji-ḅaa-arị kẹ ori amgba kpịra? 3Ọ̀ tọnwa sakị kẹ sisi kẹ ị́ tẹkẹ ḅe?
Ọ̀ lọkọ ẹkwẹn-aḅịḅị kọn ị́ pịrị ḅẹ?
4Ọ̀ kẹ ị́ fịrịmẹnjịḅọ sọma gbamaso gotẹ
ori ị́nịna ọḅọkụ fị ḅẹ?
5Ị́ inetẹ feni kpọọ tẹ kẹ tii ḅara kẹ ori na tii ḅẹ,
anịanịa ọ̀ kẹ kpọ ḍiki ḅio wẹrịtẹ kẹ í eremịna-awọmẹ pịrị?
6Inji ḅaa apụ ọ̀ dẹrị ḅẹ tẹ ò tuḅo ḅẹ?
Tuḅoniapụ ogboku in ò ḍie ḅẹ?
7Ị́ inetẹ ḍigi kẹ ò ḅụụ sụa tẹ kẹ ori oju akpakpa gbin toluma ḅẹ,
anịanịa inji gbin asụḅa kẹ ọ̀ sịḅị gbin ḅẹ?
8Ḅara kẹ ọ̀ lama ḍikii; paka ḅarị owu mẹ kẹ ḅiokoromaa;
anịsakị ị́ ḅarị jen-maaịn kẹ anị mịẹ ḅịa!
9Ḍikii, papaa tọrụngbọ kẹ ori ẹrị sọ, tomḅọ ḅiokpọ faam,
tẹ mḅọ ḅịkị kiri ḅio korom.
10Ọ̀ ḅalafamarị ḅara kẹ ḅalafamarị gbọrụḅọ-sọ ofori
tẹ ḅiokpọtẹ ọ̀ sịn saakị ḅẹ ḅọ.
Anị kụma anị ḅọ mẹ ḅọrọ tụḅọ tẹ inetẹ ọ̀ tọrọkọ sịẹ ḅẹ?
11Tụḅọ ye kẹ ị̀ pịrị tẹ, mịnẹ àrị anị kẹ mḅọ gbẹẹ?
Bebe So mẹ suku-ḅio simearị ye goyegoye ì nye.
12Àrị ori eleke ma gbolomaye ḅụ gbọsime ḅịa,
anịanịa ori opu ịnyọ mẹ anịanịa ori iḅi sime-ḅara mẹ.
13Tụḅọ inetẹ ori ọgọnọ ḅẹ opu kapa mẹ siin ḅẹ?
Tụḅọ inetẹ ọ̀ maa ọmụgbin akapa ma kan-tolu ḅẹ?
14Tụḅọ inetẹ ọ̀ tọrụkuḅu ḅẹ aḅọkọ ma finji ḅẹ?
Tẹmẹ-naịn-naịn mie ori aka ma ikelema-koro ḅụ simearị.
15Ekpeke ma ḅẹ ise-ise mie ịn kẹ ori oḅukulo mịẹ ye;
arị oḅoloma ḅara gbala ye ponoye kẹ arị pono ye ọkụ.
16Jen kẹ jen na oḅoloma ḅara,
fẹrụ sọ inetẹ arị ogboku sọ-ḅo ḅịa ḅara.
17Jen kẹ jen bịan ḅara ḅụ,
arị jen-jen sụka, tẹ inetẹ bele ḅịa.
18Ori aḍịsẹ ma ḅụ bele nwanam-ma pakarị
anịsakị ori atọrụngbọ ma finji ene mẹ ḅụ ḅịya
pakarị otuka mẹ kịkam.
19Ọ̀ ḅịḅị-ḅio fịnị-ḅẹlẹ kọrị-kọrị pakarị
fịnị-apumbulo polo-polo paka-ḅoarị.
20Ḍarịarị ḅẹlẹ na dọkịarị osuka na ḅụ onwi so ḅara,
mie onwi ò nini ḅio turee-tureema pakarị ḅara.
21Ọ̀ sararị ọwụ ḅio kọrịarị anyịmgbọ kpo-kpo paka-ḅoarị
anịsakị fịnị-ḅẹlẹ ọ̀ ḅịḅị-ḅio paka-ḅoarị.
22Ọ̀ kọngọ ḅio mie ori ịnyọ simearị
tẹ tẹmẹ-naịn-naịn ọ̀ tọrọkọ sẹkịarị.
23Ori oju ḅẹ meni mẹ gbolomatẹ parị ma parị ma wararị
ini anị kẹ jike jike-a ḅara kẹ ọ̀ tẹmẹ kụrọma wararị.
24Ò ḅioḅẹngbọ ḍụḅarị kụrọ-ḅara kụrọ wararị,
suku-ḅio ḅẹ ye gbẹẹ ḍụḅarị mẹ kụrọ ḅara.
25Ori ọ̀ ḅụụ saakị tẹso, kụma opu aị ma ḅalafa tẹ;
ye-yọ mẹ ḅẹ gboloki ḅụ ini ịna ḅụụ kpọm.
26Okologie mẹ ọ̀ la sọ anị ọ̀ ḅụụ sọ-a;
anịanịa sụḅa mẹ-o, ḍiein mẹ-o
kẹ ọ̀ tẹịn-o, anịanịa ḅẹkẹrẹ kẹ ò gbin sọ.
27Ọ̀ ḅụụ ikulele ḅịyatẹ asịra sime-ḅara simem,
anịsakị ojo ḅụrụtẹ sịn sime-ḅara simem.
28Ḍiein mẹ inetẹ ọ̀ mịẹ tẹ ò ḍumo-mangị kọn-a,
ḍiki ḅụ kpọọtẹ kẹ gbin-arị aḍụḅarị ma,
ọ̀ ḅụụ pịkị mbịaka pẹlẹ tẹ pẹlẹ nguma aị sọm.
29Kịnị ḅaa mgbele ma ọ̀ ḅụụ mbịaka pẹlẹ tẹ
pẹlẹ nguma aị sime-ḅara simem;
ori ịn ḅẹkẹrẹ gbin tẹ arị fịyam-ma fiearị ye mẹ ḍẹrịarị.
30Ò suku-ḅio ḅẹ pakịrị-pakịrị ma, ḅaa sara tẹ oḅuarị ḅẹlẹ apakịrị sime-ḅara simem;
ori opou mẹ ḅio mgbọlị ḅakụ ikuarị amana
finjima ḅara kẹ ọ̀ ḅụụ finjimam.
31Ọ̀ mịẹ tẹ owolo mẹ ḅẹlẹ ḍarị ḅara ḍarịarị;
ori opu tọrụ mẹ kẹ pulo ḅẹlẹ mịẹ ḅara mịẹm.
32Ori okin ḅọrọ minji tọrụ mẹ paama ḅịyarị ḅara,
kịnị koroma ḅa owolo mẹ ḅio pịna-pịna fiko emii.
33Ò sime-ḅara sime tẹ ḅalafa nyana-a tẹmẹ wararị
ye ofori tomikiri ḅụ.
34Ḅụụ saakị-gelema aị mamgba ọ̀ nwẹn ḍiki-simam;
ori anie opu amịẹaị mịẹarị aị mamgba amadaḅọ.
(C) The Bible Society of Nigeria