Jobu 35
35
Elihu Tẹra Sakị Karamaye Kẹ Ẹkwẹnm:
2 Ọ̀ Kẹ Jobu Ḅiokoromam Mịnẹ Tamụnọ Ḅe Anie Karakara Ḅẹrẹkọnḅọ
1Elihu nwẹnị pịkị ḅẹẹ:
2Í kuroma miemẹ karakaram aro?
Ị́ ḅẹẹm: Miemẹ anie ị̀ karakara Tamụnọ tọrọkọ
Miemẹ anie à nyana na-iḅi ye Tamụnọ tọrọkọ.
3Tẹ í gbelam: À tọ iḅi nyana?
À tọ-ḅara kẹ iḅi tẹịn à nwẹnị si mịẹ ọkụma?
4Àrị ị́yẹrị na,
ị́ ikiapụ na kẹ sụa pakịrị ḅa.
5So ma ḍikii, tẹ arị ẹrịị;
tẹ kpiti So-tọrụ tẹ gele ị́ nẹngị aị ma ḍikii.
6 #
Job 22.2,3 Í si mịẹ kụma, ị́ kẹ ọ̀ mịẹ ye tiye?
Anịsakị í oloko kan-kan sara kụma, ị́ kẹ ọ̀ mịẹ ye tiye?
7Ị́ karakara kụma, í tiye kẹ ḍie ọ̀ pịrị;
anịanịa ị́ ḅara ò tiye daa-ọkị?
8Í si-sịḅịḅio mẹ í sime-ḅara sime tomḅọ mie anị gboloma ye
anịsakị ị́ karakara mẹ tomḅọ tụḅọ ḅe gbolomam.
9“Ponoma ma sara la ḅara mie tomi gotẹ owu pakamarị;
opuḅọ ḅe ḅara-kọngọ mẹ mie ịn gotẹ ḅarasụa ḅiiarị.
10Kụma gbọrụḅọ-sọ ḅẹẹ-a: Ndẹẹ ị̀ Tẹmẹ wararị Tamụnọ ḅe mọ,
ori ḅe tẹ ḍin ḅụ mịẹ tẹ ḅioḅẹlẹ nume paka-ḅoarị ḅọ ḅe;
11oriḅe tẹ ye kẹ wa toluma tomikiri ḅẹ anama ma nẹngịma ḅọ ḅe, tẹ mịẹ tẹ wa ye-nimi fiin-arị afeni ma nẹngị ḅọ ḅe?
12Anịjụ ini owu pakamam, kụma ọ̀ pakịrị-a,
si-mịẹapụ opu amịẹaị ma gotẹ.
13Tụkụma ḅara ḅụ Tamụnọ ye ḅio ḅụ ofori owu naa-a,
anịanịa Kụrọmamgba Nyanaḅọ ḅe anị kẹ ye sịn.
14Matrụma, ị́ ḅẹẹm mịnẹ í ori ẹrị-a ḅẹẹ sakị,
mịnẹ ḅẹrẹ mẹ ọ̀ tọrọkọ emii, tẹ í ò koruarị!
15Anịsakị gbala Tamụnọ ịganị kịnị fomu-a
tẹ ọ̀ kpọma gburo-gburo ḅara kẹ oloko kan ḍiki-a
16Papaa ẹkwẹn mie Jobu ḅịḅị finjitẹ kọn-arị,
ori ẹkwẹn-ẹkwẹn sararị kụma nimi arị ḅio ofori.”
(C) The Bible Society of Nigeria