2 Paka-aị 18
18
Ịkịankoro Mayịkaya Ehabụ Ḅeri Nụnụm
(1 Ama 22.1-28)
1Mịọkụ Jehosafatị gburo-gburotẹ ngọ na kụn na nyanam, tẹ ọ̀ nwẹnị ere-sime kẹ Ehabụ na gboloma. 2Kụra kẹlẹ ḅọrọ tẹso, ọ̀ nwẹnị Sameriya ḅụ Ehabụ ḍọkụma-mu. Ehabụ nwẹnị anana, na pootẹ-anambulo na ḅaa sara kẹ igoni kẹ ori na inima tẹ ori na simearị tomi ma na kọn, tẹ ò toluma mịẹ tẹ ọ̀ Ramọtị-giliyadị si anga ḅụ sịẹ ḅẹ ḅara. 3Izirẹlị ḅẹ amadaḅọ Ehabụ ḅe nwẹnị Juda ḅẹ amadaḅọ Jehosafatị ḅe ḅẹẹ, “í gbeke ị̀ na Ramọtị-giliyadị mu ḅẹ?” Jehosafatị nwẹnị ọ̀ pakịrị, “Yẹrị na ị́yẹrị na gberie, ị̀ atomi na ị́ atomi na gbọrụ atomi. Wa ị́ ḅụụ sọ tẹ ọmụ mẹ mu ḅa.” 4Jehosafatị nwẹnị Izirẹlị ḅẹ amadaḅọ ḅe ḅẹẹ, “tarị KỊNỊNYANAḄỌ ḅe ḅịḅị ḅii.” 5Anịtẹso Izirẹlị ḅẹ amadaḅọ ḅe nwẹnị ịkịankoroapụ ma kobiri gboloma, inimgba kịnị ẹndẹ (400), tẹ nwẹnị in gbela, “wa mu Ramọtị-giliyadị na owu sọ ḅẹ mụnọọ arị inoma fị mọ?” Ịn nwẹnị ḅẹẹ, “Muu, gbala Tamụnọ anị kẹ amadaḅọ ḅe ḅara-ḅio ḅụ ọ̀ pịrị ḅa.” 6Kụma Jehosafatị nwẹnị ḅẹẹ, “Mịanga ḅụ KỊNỊNYANAḄỌ ḅe ịkịankoro jụmọ tẹ wa gbela ḅẹ ḅọ ofori”? 7Izirẹlị ḅẹ amadaḅọ ḅe nwẹnị Jehosafatị ḅẹẹ, “Gbọrụ tomḅọ paa emi, wa ḅụụ ḅụ KỊNỊNYANAḄỌ ḅe gbela ḅarị ḅọ, anie Imila owiḅọtụḅọ Mayịkaya, kụma àrị ò ḍiki ḅioḅẹlẹ-a, ọ̀ gbala-gbala ì gboloma ye ḅụ iḅi ịkịan koro-koro-a, kụma siye-siye ẹrẹsị” Tẹ Jehosafatị nwẹnị ḅẹẹ, “yee amadaḅọ ḅe amụ ọkọ ḅẹẹ ma.” 8Anịtẹso Amadaḅọ Ehabụ, Izirẹlị ḅẹ amadaḅọ ḅe nwẹnị ọ̀ fịrịmẹnjị gbọrụ opuḅọ sịn tẹ ḅẹẹ, “Fọnya mu Mayịkaya Imila owiḅọtụḅọ ḅe ọkị-ḅoo” 9Mịọkụ Izirẹlị ḅẹ amadaḅọ na, Jehosafatị Juda ḅẹ amadaḅọ ḅe na ịna ama-da opu akapa sụa tẹ ịna emine ọgọnọ lẹgị-sime wararị, mẹnjị Sameriya sọ-muarị anga mẹ ḅẹ ogigo-ḅọkọ mẹ ḅụ; tẹ ịkịankoroapụ mamgba ịna tọrọkọ sime tẹ ịkịankoroarị. 10Tẹ Zẹdẹkaya, Kenana owiḅọtụḅọ ḅe nwẹnị tọnwa ikulele ịfalị tẹmẹ, tẹ ḅẹẹ, “Mịẹ KỊNỊNYANAḄỌ ḅe ḍuko yee, ‘Mịna aị ma mie ị́ kẹ Siriya ḅẹ apụ ma sukuruma nwenii in fịị fama ḅarịye.’ ” 11Ịkịankoroapụ mamgba nwẹnị ọkọ kẹ ịkịan mẹ kuro tẹ ḅẹẹ, “Ramọtị-giliyadị mu tẹ owu-ḅara-iḅi nyana-a, KỊNỊNYANAḄỌ ḅe anị kẹ amadaḅọ ḅe ḅara ọ̀ pịrị ḅa.” 12Fịrịmẹnjịḅọ ḅe tẹ Mayịkaya sịn ḅẹ mu ḅọ ḅe nwẹnị ọ̀ ḅẹẹ, “Ḍikii, ịkịankoroapụ ma gbọrụ pọkọ ḅụ kọn-arị ẹkwẹn-aḅịḅị ma amadaḅọ ḅe ḅụụ iḅi wararị; yee í ẹkwẹn-ḅịḅị ịna ḅụụ ḅẹ gbọrụḅọ ẹkwẹn-ḅịḅị na kịka, tẹ ị́ ọ̀ ḅụụ ḅẹ iḅiye ḍuko.” 13Kụma Mayịkaya nwẹnị ḅẹẹ, “KỊNỊNYANAḄỌ ḅe ḍumo wararị ogbo, ị̀ Tamụnọ ḍuko ye, anie à kọn ḅarị ẹkwẹn.” 14Ò ḅo amadaḅọ ḅe la tẹso, Amadaḅọ ḅe nwẹnị ọ̀ ḅẹẹ, “wa Ramọtị-giliyadị mu tẹ owu sọ mụnọọ arị inoma fị mọ?” Ọ̀ nwẹnị pakịrị, “muu, tẹ owu-ḅara-iḅi nyana-a, ini ịn kẹ ị́ ḅara-ḅio ḅụ ị́ pịrị ḅa.” 15Kụma Ehabụ nwẹnị ọ̀ ḅẹẹ, “Àrị nda sakị kẹ ị́ ḅara ḅii ḅa mịnẹ ị́ KỊNỊNYANAḄỌ ḅe ẹrẹ mẹ ḅụụ ẹkwẹn ị̀ pịrịarị sakị goyegoye karakara ye sikima jen ḍuko ma?” 16#Kịẹ 27.17; Izi 34.5; Mat 9.36; Mak 6.34Tẹ Mayịkaya nwẹnị ḅẹẹ, “Àrị ẹrịm, Izirẹlị mẹmgba tụndụ ma ọgọnọ ḍikiḍikiḅọ ofori anana ogbo gala-gala ḅara kẹ gala-gala wararị, tẹ KỊNỊNYANAḄỌ ḅe nwẹnị ḅẹẹ, ‘mịna apụ ma ịn sịḅịdaḅọ nyana-a; yee ọrụḅọ-ọrụḅọ dein ḅụ pịkịma-so mḅọ ama mu.’ ” 17Izirẹlị ḅẹ amadaḅọ ḅe nwẹnị Jehosafatị ḅẹẹ, “À ḍuko ị́ pịrị-a mịnẹ siye sikima, ì gboloma ye ḅụ ori iḅi ịkịan kuro ḅịa?” 18Mayịkaya nwẹnị ḅẹẹ, “Anịẹrẹsị ọ́ KỊNỊNYANAḄỌ ḅe ẹkwẹn-ḅịḅị naa! À KỊNỊNYANAḄỌ ḅe ẹrịm ori ori emine ọgọnọ ḅụ lẹgị-sime wararị, tẹ So-ḅio simearị apụ mamgba ori ama-ḅara na, ori ere-ḅara na ḅụ sịẹsime wararị.” 19KỊNỊNYANAḄỌ ḅe nwẹnị gbela, “Tụḅọ Ehabụ, Izirẹlị ḅẹ amadaḅọ ḅe toluma tẹ ọ́ Ramọtị-giliyadị mu tẹ fịị ḅụ ḅịkị ḅẹ?” Gbọrụḅọ nwẹnị gberie ḍuko, jụmọ nwẹnị pịkị jen ḍuko. 20Anịtẹso gbọrụ tẹmẹ nwẹnị mẹnjị sọma tọrọkọ ḅo tẹ KỊNỊNYANAḄỌ ḅe tọrọkọ sịẹsime tẹ ḅẹẹ, “Àrị ò toluma ḅa.” KỊNỊNYANAḄỌ ḅe nwẹnị ò gbela, “Ndẹẹ ị́ kẹ ò toluma ḅarị ḅara?” 21Ọ̀ nwẹnị pakịrị, “À mu ḅa tẹ iruo tẹmẹ sọ ḅa ori ịkịankoroapụ mamgba ḅịḅị-ḅio ḅụ.” KỊNỊNYANAḄỌ ḅe nwẹnị ḅẹẹ, “Ị́yẹrị mie ò toluma ḅarị ḅọ, anịsakị ị́ mịẹ suma ḅa; muu, tẹ ọkọ mịẹẹ.” 22Ḍikii, anị ẹrẹsị KỊNỊNYANAḄỌ ḅe mịọkụ iruo tẹmẹ mẹ kẹ mịna ị́ ịkịankoroapụ ma ḅịḅị-ḅio suu tẹẹ; í gboloma ye ḅụ KỊNỊNYANAḄỌ ḅe siye ẹkwẹn tẹẹ. 23Anịtẹso Zẹdẹkaya, Kenana owiḅọtụḅọ ḅe nwẹnị sọma Mayịkaya kpeki tẹ ḅara finji ọ́ ḅọrọ ori amgba ḅụ, tẹ ḅẹẹ, “Tọ ḅọkọ ḅụ KỊNỊNYANAḄỌ ḅe Tẹmẹ ḅe ị̀ wẹrịso tẹ ḅo ẹkwẹn ị́ pịrị?” 24Mayịkaya nwẹnị pakịrị, “Ḍikii, ị́ anị ẹrị ḅa anị ene mẹ ḅụ tẹ í mu kala-ḅio ị́ ḅụụ ḅọị ḅarị sakị mẹ.” 25Anịtẹso Izirẹlị ḅẹ amadaḅọ ḅe nwẹnị tọn, “Ọ́ Mayịkaya kuun, tẹ ọ̀ kẹ pịkị mu Amọnị ḅụ opu ama mẹ ḅẹ ḅẹrẹtọnḅọ ḅe na, Johasị amadaḅọ owiḅọtụḅọ ḅe na pịrị tẹ ḅẹẹ, 26Mie amadaḅọ ḅe ḍuko yee, ‘Ó ḅieḅe kẹ ikoli ḅio suu, tẹ furo ḅin ḅịa fịye kalịye na minji na kẹ ò koko nwenii à dein ḅụ pịkịma-ḅo sakị la.’” 27Mayịkaya nwẹnị ḅẹẹ, “Ị́yẹrị nwẹnị dein ḅụ pịkịma-ḅo ḅo, KỊNỊNYANAḄỌ ḅe ḅarị ị̀ ḅụụ ḅụ ḅọrọtẹ ẹkwẹn-a.” Ọ̀ nwẹnị pịkị ḅẹẹ, “Ọ́ naa, ọmịnị tomi mamgba!”
Ehabụ Fịịm
(1 Ama 22.29-35)
28Anieḅụ Izirẹlị ḅẹ amadaḅọ ḅe na, Jehosafatị Juda ḅẹ amadaḅọ ḅe na nwẹnị Ramọtị-giliyadị mu. 29Izirẹlị ḅẹ amadaḅọ ḅe nwẹnị Jehosafatị ḅẹẹ, “Àrị ị̀ ḅụụ ḍima tẹ owu mẹ ḅio sọ-mu ḅa, kụma ị́ ama-da opu akapa ma sụa.” Izirẹlị ḅẹ amadaḅọ ḅe ọ̀ ḅụụ ḍima tẹ ịn nwẹnị owu mẹ ḅio sọ-mu. 30Mịọkụ Siriya ḅẹ amadaḅọ ḅe tọn ò kirimẹnjị-ọmụarụ ma ḅẹ ọmụ alapụ ma pịrị tẹ, “Izirẹlị ḅẹ amadaḅọ ḅe ngẹrị mịẹ ọ́ tọrụ kẹ da-a ḅarị ḅọ, kalaḅọ, anịanịa opuḅọ na owu sọ ma.” 31Ọmụ alapụ ma Jehosafatị ẹrị tẹso, ịn nwẹnị ḅẹẹ, “Anie Izirẹlị ḅẹ amadaḅọ ḅee.” Anieḅụ ịn nwẹnị ori na owu mẹ sọ ḅẹ tẹ tọrụ pịkị ọ̀ da; tẹ Jehosafatị nwẹnị oloku pakama tẹ KỊNỊNYANAḄỌ ḅe ḅarasụa ọ̀ pịrịm. Tamụnọ nwẹnị ọ̀ ḅụụ ḅụ in nụnụ ḅelema. 32Kirimẹnjị-ọmụarụ ma ḅẹ ọmụ alapụ ma ẹrịm mịnẹ Izirẹlị ḅẹ amadaḅọ ḅe ori-a tẹso, ịn nwẹnị ò ḍuka ḅụ ọḅụ-na-isema. 33Kụma gbọrụ owiḅọ nwẹnị paa ori iboli tẹịn ḍiki, tẹ okoro-ḍiein mẹ nwẹnị mu Izirẹlị ḅẹ amadaḅọ ḅe kpara ọ̀ sụa wararị owu aị ma na, ori ekpe gbaịn ye mẹ na ogboku ḅụ; ọ̀ nwẹnị anị ẹrẹsị ò kirimẹnjị-ọmụarụ dọkụḅọ ḅe ḅẹẹ, “vuunma pịkị tẹ owu mẹ ḅio ì dogi pakamaa, kẹ gotẹ ọkọ ḅẹẹarị, ye ị̀ la tẹ ẹrẹsị.” 34Anị ene ḅụ owu mẹ ọfịrịm, tẹ ịn nwẹnị tọrụ kẹ Siriya ḅẹ apụ ma da tẹ anga-anga ḅụ amadaḅọ ḅe palị sịẹma ò kirimẹnjị-ọmụarụ mẹ ḅio nwenii ḅoḅiri-so la; anịtẹrẹmẹ ọ̀ fịịm ịrụa tuuideri ḅụ.
(C) The Bible Society of Nigeria