1 Samụẹlị 8
8
Tomi Ma Gbọrụ Amadaḅọ Ḅiim
1Samụwẹlị ḅo omongi tẹso, ọ̀ nwẹnị ori owiapụ-awọmẹ kẹ ḅẹrẹkọn-apụ mịẹ Izirẹlị ḅụ. 2Ori mgbe ḅe ẹrẹ anie Jowẹlị, anịsakị ò gbolo ḅe ẹrẹ Abija; ini anie Biyasẹba ḅụ ḅẹrẹkọn sime apụ. 3Anịsọ ori owiapụ-awọmẹ ma ori etela ma ḅụ mẹnjị-a, kụma tọrụ pịkị akaka-ḅio sọye fị ḍọkịm; ini ọḅụ-fịm, tẹ karakara ḅẹrẹ pịkị iḅom. 4Anịtẹso Izirẹlị ḅẹ omongiapụ mamgba nwẹnị ḅo kobiri gboloma tẹ Rama ḅụ Samụwẹlị dama-ḅo, 5#Dit 17.14tẹ ọ̀ ḅẹẹ, “ḍikii ị́ omongi tẹẹ, anịsakị í owiapụ-awọmẹ ma í etela ma ḅụ mẹnjị-a; anịẹrẹsị mịọkụ ḅẹrẹtọn wa pịrị ḅẹ gbọrụ amadaḅọ tọn wa pịrịị, anị opu asịẹ mamgba ḅụ sime-ḅara pembema ḅara.” 6Kụma ye mẹ Samụwẹlị ḅụụ ḅẹlẹ-a, ịn “ḅẹrẹtọn wa pịrị ḅẹ gbọrụ amadaḅọ kẹ wa pịrịị,” ḅẹẹ tẹso. Tẹ Samụwẹlị nwẹnị KỊNỊNYANAḄỌ ḅe tẹkẹ. 7KỊNỊNYANAḄỌ ḅe nwẹnị Samụwẹlị ḅẹẹ, “Tomi ma kẹ ị́ ḅẹẹ ye mẹmgba ḅụ ịna pọkọ pokii; kẹ gotẹ ọkọ ḅẹẹarị, ini amụ ị́ sịkị-a, kụma yẹrị mie in sịkị ḅọọ, ama-da ịn pịrị ḅụ. 8Ijiputi ḅụ arị ịn pakama-ḅo ene mẹ ḅụ ọkị-ḅo mịmgba mẹ sọ la, mịẹ-aị ma tẹ in wẹrịtẹ kẹ ị̀ mịẹ tẹ ḅara mẹ ini ị̀ sịkịarị tẹ fịrịmẹnjị oru-atamụnọ pịrịarị ḅara mẹ, mie in pịkị kẹ ị́yẹrị sọ mịẹarị ḅara. 9Mịọkụ anie mịẹtẹ ịna pọkọ pokii, ị́ ị́ tẹmẹ-la ḅara ngẹrị kẹ ịna ḅeri nụnụ ḅa tẹ ama mẹ da ịn pịrị ḅarị amadaḅọ ḅe etela ma kẹ in ḍie ḅa.” 10Anieḅụ Samụwẹlị KỊNỊNYANAḄỌ ḅe ẹkwẹn-aḅịḅị mamgba ḍuko tomi ma tẹ ọ̀ ḅara ḅụ amadaḅọ ḅiiarị apụ ma pịrịm. 11Ori ḅẹẹm, “Mịna aḅara ma mie amadaḅọ ḅe tẹ ama mẹ da ọ́ pịrị ḅarị ḅọ ḅe etela ma sime ḅarị ḅara: ori ọmịna owiapụ-awọmẹ ma ọkị tẹ in tọn ò kirimẹnjị-ọmụarụ pịrị na, ori asụ-dọkụ-ọmụapụ na, ori kirimẹnjị-ọmụarụ ma tọrọkọ mangị-na-koro-na apụ mịẹ ḅa; 12anịsakị ọ̀ ḅẹrẹtọn kịnị maa ẹndẹ oyia asi finji-finji na, kịnị amesi oyi finji-finji na pịrị apụ tọn ọ̀ ḅụụ pịrị ḅa, tẹ jen-apụ ori afịaị ḍiḅi kiri soku-ḅẹ apụ na, ori afịaị soku-ḅẹ apụ na, ori ọmụgbin aị tẹmẹ ḅẹ apụ na, ò kirimẹnjị-ọmụarụ ma ḅio kẹ ye mịẹ na-iḅi aị mịẹ karakarama ḅẹ apụ mịẹ ḅa. 13Ori ọmịna eremịna-awọmẹ kẹ sẹntị sọ apụ na, fịye sọ apụ na, ịrụa anịanịa fịnị ọfịrị kẹ fịye fọị apụ na mịẹ ḅa. 14Ori ọmịna iḅitẹịn aḍụọ na, kụrọ aḍụọ na, olivu aḍụọ na ọkị tẹ arị kẹ ori afịrịmẹnjịapụ pịrị ḅa. 15Ori ọmịna sịnmgbọlị na, kụrọ aḍụọ na kẹ oyia akiri ḍiya ḅẹ gbọrụ kiri mẹ ọkị tẹ anị kẹ ọ̀ fịrịmẹnjị-opuapụ na, ori afịrịmẹnjịapụ na pịrị ḅa. 16Ori ọmịna fịrịmẹnjị-ereme na, ọmịna anambulo ma ḅẹ iḅitẹịn aị ma ọkị tẹ kẹ ọ̀ kọrịnama ḅụ suu ḅa. 17Ori ọmịna anana-ogbo ma kẹ oyia akiri ḍiya ḅẹ gbọrụ kiri ọkị ḅa, tẹ ọmịnị ori omoniapụ sọ ḅa. 18Anịsakị anị ene mẹ ḅụ ọmịnị ọmịna amadaḅọ gotẹ peema owu pakama ḅa, oriḅe tẹ ọ́ sẹlẹ-ọkị ọmịna aḅụụ pịrị ḅọ ḅe; kụma KỊNỊNYANAḄỌ ḅe ọ́ pakịrị ḅịa anị ene mẹ ḅụ.” 19Kụma tomi ma Samụwẹlị pọkọ poki ḍụkụ-a tẹ in nwẹnị ḅẹẹ, “Ẹn-ẹn, kụma wa amadaḅọ nyana wamịna-aḅụụ pịrị ḅa, 20mịẹtẹ wamịnị sọ opu asịẹ mamgba sime-ḅara sime ḅẹ ḅara, tẹ mịẹtẹ wamịna amadaḅọ ḅẹrẹtọn wa pịrị, tẹ wamịna tọrọkọ tarị, tẹ wamịna owu ma sọ ḅẹ ḅara.” 21Samụwẹlị tomi ma ẹkwẹn-aḅịḅị mamgba naa fama tẹso, ọ̀ nwẹnị pịkị siin anị ḍuko KỊNỊNYANAḄỌ ḅe aḅeri ḅio suu. 22KỊNỊNYANAḄỌ ḅe nwẹnị Samụwẹlị ḅẹẹ, “ịna pọkọ pokii, tẹ amadaḅọ pakama-ḅo in pịrịị.” Samụwẹlị nwẹnị anịtẹrẹmẹ Izirẹlịapụ ma ḅẹẹ, “ọrụḅọ-ọrụḅọ so amịna opu ama muu.”
(C) The Bible Society of Nigeria