MGA HEBREOHANON 4
4
1Busa angay kitang mahadlok, samtang nagpadayon pa ang saad sa pagsulod ngadto sa iyang kapahulayan, tingali unya ug aduna kaninyoy maisip nga wala makakab-ot niini. 2Kay kita nasangyawan man usab sa Maayong Balita sama kanila, hinuon ang pulong nga ilang nadungog wala magpulos kanila, kay ang mga nakadungog niini wala man modawat niini uban sa pagtuo.#4:2 nakadungog…pagtuo: Ang ubang sinulat nag-ingon, sila wala makighiusa diha sa pagtuo uban niadtong mga nakadungog.
3 #
Sal. 95:11. Kay kita nga nagtuo nakasulod sa maong pahulay, sumala sa iyang gisulti,
“Ingon nga akong gipanumpa tungod sa akong kapungot,
‘Dili gayod sila makasulod sa akong pahulay,’ ”
bisan ug ang iyang mga buhat nahuman na sukad pa sa pagkatukod sa kalibotan. 4#Gen. 2:2. Kay sa usa ka dapit siya nagsulti mahitungod sa ikapitong adlaw sa ingon niini, “Ug sa ikapitong adlaw ang Dios mipahulay gikan sa iyang tanang mga buhat.”
5 #
Sal. 95:11. Ug niining dapita usab, siya nag-ingon,
“Dili gayod sila makasulod sa akong pahulay.”
6Busa kay aduna may pipila nga nakasulod pa niini, ug kay kadtong mga nasangyawan kaniadto sa Maayong Balita wala man makasulod niini tungod sa ilang pagkamasupilon, 7#Sal. 95:7-8 (LXX). nagtakda siya pag-usab ug usa ka adlaw, “Karong adlawa,” diha sa iyang pagsulti pinaagi kang David human sa dugayng panahon, sumala sa iyang nasulti,
“Karong adlawa, inigkadungog ninyo sa iyang tingog,
ayaw ninyo pagahia ang inyong mga kasingkasing.”
8 #
Deut. 31:7; Jos. 22:4. Kay kon si Josue nakahatag pa kanila ug pahulay, ang Dios dili unta maghisgot ug lain pang adlaw. 9Busa nagpabilin pa diay ang usa ka adlaw nga igpapahulay alang sa mga tawo sa Dios, 10kay ang nakasulod ngadto sa pahulay niya, mipahulay usab sa iyang mga buhat ingon nga ang Dios usab sa iyang mga buhat.#Gen. 2:2.
11Busa kinahanglan nga manglimbasog gayod kita sa pagsulod sa maong pahulay, aron walay usa kanato nga mapukan tungod sa samang panag-ingnan sa pagkamasupilon. 12Kay ang pulong sa Dios buhi ug naglihok, hait pa kay sa espada nga duhay sulab, modulot lahos ngadto sa nag-ulang sa kalag ug espiritu, sa mga lutahan ug sa mga kauyokan ug motugkad sa mga hunahuna ug katuyoan sa kasingkasing. 13Ug sa atubangan niya walay binuhat nga natago, apan ang tanang butang hubo ug dayag sa iyang mga mata nga kaniya mohatag ra unya kita ug husay.
Si Jesus ang Labawng Pari
14Kay aduna man kitay dako nga labawng pangulong pari nga nakalatas sa kalangitan, si Jesus, ang Anak sa Dios, huptan nato pag-ayo ang atong pagtuo. 15Kay ang atong labawng pangulong pari dili usa ka pari nga dili mobati ug kaluoy kanato sa atong mga kaluyahon, hinuon sa tanang paagi siya gitintal sama kanato, apan wala gayod makasala. 16Sa ingon niana, uban sa pagsalig manuol kita ngadto sa trono sa grasya, aron makadawat ug kaluoy ug makakaplag ug grasya nga makatabang kanato sa panahon sa pagpanginahanglan.
നിലവിൽ തിരഞ്ഞെടുത്തിരിക്കുന്നു:
MGA HEBREOHANON 4: ABCEB
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Philippine Bible Society, 2011