ᓇᒼᐸᕒᐢ 11
11
1ᐊᔨᓯᔨᓂᐊᐧᐠ ᒫᑲ ᑭ ᒥᐦᑕᐁᐧᑖᑯᓯᐊᐧᐠ, ᐁ ᒫᔨᐱᑭᐢᑫᐧᒋᐠ ᐁ ᐯᑖᑯᒋᐠ ᑳ ᑎᐯᔨᐦᒋᑫᔨᐟ; ᐃᐢᐱ ᒫᑲ ᑳ ᑎᐯᔨᐦᒋᑫᐟ ᐱᔦᐦᑕᕽ, ᑭ ᓴᐢᑭᑌᔨᐤ ᐅ ᑭᓯᐋᐧᓯᐃᐧᐣ; ᐅᐟ ᐃᐢᑯᑌᒼ ᒫᑲ ᑳ ᑎᐯᔨᐦᒋᑫᐟ ᑭ ᑳᐧᑯᑌᔨᐤ ᐃᑕ ᐁ ᐊᔮᒋᐠ, ᐁᑯᓯ ᐁ ᑭ ᐃᐢᑳᐧᓱᑯᒋᐠ ᒫᐊᐧᐨ ᑭᓯᐸᓄᕽ ᑲᐯᓯᐃᐧᓂᕽ ᑳ ᐊᔮᒋᐠ. 2ᐊᔨᓯᔨᓂᐊᐧᐠ ᒫᑲ ᑭ ᒪᐃᐧᒧᐢᑕᐁᐧᐊᐧᐠ ᒧᓯᓴ; ᐁᑯᓯ ᒧᓯᐢ ᑭ ᐊᔭᒥᐦᐁᐢᑕᐁᐧᐤ ᑳ ᑎᐯᔨᐦᒋᑫᔨᐟ, ᐁᑯᓯ ᐃᐢᑯᑌᐤ ᑭ ᐋᐢᑕᐁᐧᐤ. 3ᐁᑯᑕ ᒫᑲ ᑖᐱᕒᐊ ᑭ ᐃᓯᔨᐦᑳᑌᐤ; ᒋᑫᒫ ᐅᐟ ᐃᐢᑯᑌᒼ ᑳ ᑎᐯᔨᐦᒋᑫᐟ ᐁ ᑭ ᑳᐧᑯᑌᔨᐠ ᐃᑕ ᐁ ᐊᔮᒋᐠ.
4ᐊᓂᐦᐃ ᒫᑲ ᑳ ᑭᔨᑲᐁᐧᔭᑎᔨᐟ ᐊᔨᓯᔨᓂᐊᐧ ᑳ ᐃᐧᒉᐃᐧᑯᒋᐠ ᑭ ᒥᐦᑕᐁᐊᐧᐠ; ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒥᓇ ᑭ ᒫᑐᐊᐧᐠ ᒥᓇ ᑭ ᐃᑌᐧᐊᐧᐠ, ᐊᐁᐧᓇ ᑫ ᒥᔨᑯᔭᕽ ᐃᐧᔮᐢ ᑭᑕ ᒥᒋᔭᕽ? 5ᑭ ᑭᐢᑭᓯᑐᑌᓈᓇᐤ ᐁᑲᐧ ᑭᓄᓭᐊᐧᐠ ᑳ ᑭ ᒧᐋᐧᔭᑯᐠ ᐃᒋᑊᑎᕽ ᐁᑳ ᐁ ᑎᐸᐋᐧᔭᑯᐠ; ᑳ ᐊᐢᑭᐳᕽ ᓂᐦᑖᐃᐧᑭᒋᑲᓇ ᒥᓇ ᐃᐧᒉᑲᐢᑯᓯᔭ, ᒥᓇ ᑳᕒᓬᐃᐠ. 6ᒫᑲ ᐁᑲᐧ ᑭᐟ ᐊᐦᒑᐦᑯᓇᐤ ᑲᐋᐧᑲᑐᓱ ᓇᒪ ᑫᑲᐧᐩ ᐃᐦᑕᑲᐧᐣ; ᐱᓯᓯᐠ ᐅᒪ ᒫᓇ ᑭᑕ ᑲᓇᐋᐧᐸᐦᑕᒪᕽ. 7#ᐁᐠᓴᑕᐢ 16:31ᐊᓂᒪ ᒫᑲ ᒫᓇ ᑖᐱᐢᑯᐨ ᑯᕒᐃᔮᐣᑕᕒ ᑭᐢᑎᑳᒋᑲᓂᐢ, ᐁᑯᓯ ᑭ ᐃᓯᓈᑲᐧᐣ ᑖᐱᐢᑯᐨ ᑌᓬᐃᔭᒼ ᑳ ᐃᓯᓈᑲᐧᕽ. 8#ᐁᐠᓴᑕᐢ 16:13-15ᐊᔨᓯᔨᓂᐊᐧᐠ ᒫᑲ ᑭ ᐸᐸᒧᑌᐊᐧᐠ ᐁ ᒧᓴᑭᓇᑭᐠ, ᐁᑯᓯ ᑭ ᐱᓂᐳᑖᐊᐧᐠ ᐱᓂᐳᒋᑲᓂᕽ ᐊᐦᐳ ᐁ ᐱᓴᑕᐊᑭᐠ ᐱᓴᑕᐃᑳᑲᓂᕽ, ᒥᓇ ᑭ ᐸᑳᑖᐊᐧᐠ ᐊᐢᑭᑯᕽ, ᒥᓇ ᑭ ᐊᔭᑯᓈᑫᐊᐧᐠ; ᑭ ᐃᐢᐸᑲᐧᐣ ᒫᑲ ᑖᐱᐢᑯᐨ ᐅᐢᑭ ᐱᒥ. 9ᐃᐢᐱ ᒫᑲ ᑳ ᓂᐱᐊᐧᐢᑳᐠ ᐸᑭᑎᑭ ᑳᐯᓯᐃᐧᓂᕽ ᐁ ᑎᐱᐢᑳᐠ, ᐊᓂᒪ ᒫᓇ ᑭ ᑭᑭ ᐸᐦᑭᐦᑎᐣ.
10ᒧᓯᐢ ᒫᑲ ᑭ ᐯᐦᑕᐁᐧᐤ ᐊᔨᓯᔨᓂᐊᐧ ᐁ ᒫᑐᔨᐟ ᒥᓴᑳᒣ ᐁ ᐋᐃᓯ ᐋᐧᑯᑐᒋᐠ ᑲᐦᑭᔭᐤ ᐊᔨᓯᔨᓂᐤ ᐁ ᐃᐢᑳᐧᑌᒥᐊᐧᓂᔨᐠ ᐃᐧᑭ; ᐁᑯᓯ ᐅ ᑭᓯᐋᐧᓯᐃᐧᐣ ᑳ ᑎᐯᔨᐦᒋᑫᐟ ᒥᐢᑕᐦᐃ ᑭ ᓴᐢᑭᑌᔨᐤ; ᒧᓯᐢ ᒥᓇ ᓇᒪᐃᐧᔭ ᑭ ᓇᐁᔨᑕᒼ. 11ᒧᓯᐢ ᒫᑲ ᑭ ᐃᑌᐤ ᑳ ᑎᐯᔨᐦᒋᑫᔨᐟ, ᑖᓀᐦᑭ ᑳ ᑭ ᒫᔨᑐᑕᐊᐧᐟ ᑭᐟ ᐊᑐᐢᑫᔮᑲᐣ? ᒥᓇ ᑖᓀᐦᑭ ᐁᑳ ᑳ ᑭ ᒥᐢᑲᒫᐣ ᑭᑕ ᒥᔪᑲᓇᐋᐧᐸᒥᔭᐣ, ᑳ ᓇᔭᑕᐃᔭᐣ ᑲᐦᑭᔭᐤ ᐅᑭ ᐊᔨᓯᔨᓂᐊᐧᐠ? 12ᓂ ᑭ ᑭᑭᐢᑲᐋᐧᐊᐧᐠ ᒋ ᑲᐦᑭᔭᐤ ᐅᑭ ᐊᔨᓯᔨᓂᐊᐧᐠ? ᓂᔭ ᒋ ᓂ ᑭ ᓂᐦᑖᐃᐧᑭᐦᐋᐊᐧᐠ, ᑭᑕ ᑭ ᐃᓯᔭᐣ, ᐱᒧᑕᐃᐠ ᑭ ᐱᒧᔪᐃᐧᓂᕽ, ᑖᐱᐢᑯᐨ ᐁ ᑲᓄᓈᐊᐧᓱᐟ ᐅᑖᐃᐧᒫᐤ ᑳ ᐃᓯ ᐱᒥᐃᐧᔮᐟ ᑳ ᓄᓂᔨᐟ ᐊᐋᐧᓯᓴ, ᑭᑕ ᐃᑐᐦᑕᐊᑭᐠ ᐊᐢᑭᕽ ᐃᑌ ᑳ ᑭ ᐊᓱᑕᒫᒪᐟ ᐅᑖᐃᐧᐋᐧᐊᐧ? 13ᑖᓂᑌ ᓂᔭ ᑫ ᑭ ᐅᐦᑎᓇᒫᐣ ᐃᐧᔮᐢ ᑭᑕ ᒥᔭᑭᐠ ᑲᐦᑭᔭᐤ ᐅᑭ ᐊᔨᓯᔨᓂᐊᐧᐠ? ᒋᑫᒫ ᓂ ᐯ ᓈᑎᑲᐧᐠ ᐁ ᒫᑐᒋᐠ, ᐁ ᐃᑌᐧᒋᐠ, ᒥᔨᓈᐣ ᐃᐧᔮᐢ ᑭᑕ ᒥᒋᔮᕽ. 14ᓇᒪᐃᐧᔭ ᓂ ᑲᐢᑭᑖᐣ ᑭᑕ ᐯᔭᑯ ᓇᔭᑕᒫᐣ ᑲᐦᑭᔭᐤ ᐅᑭ ᐊᔨᓯᔨᓂᐊᐧᐠ ᑳ ᐃᓯᐦᒋᑫᒋᐠ, ᒋᑫᒫ ᐅᓴᒼ ᑯᓯᑲᐧᐣ ᓂᔭ ᐅᐦᒋ. 15ᑭᐢᐱᐣ ᒫᑲ ᐅᒥᓯ ᐋᐧ ᑐᑕᐃᐧᐊᐧᓀ, ᓂᐸᐦᐃᐣ ᑭ ᐸᑯᓭᔨᒥᑎᐣ ᓭᒫᐠ, ᑭᐢᐱᐣ ᑳ ᒥᔪ ᑲᓇᐋᐧᐸᒥᐊᐧᓀ; ᑭᔮᒼ ᒫᑲ ᐁᑳᐃᐧᔭ ᓂ ᑲ ᐋᐧᐸᐦᑌᐣ ᓂ ᑯᑕᑭᑖᐃᐧᐣ.
16ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᒧᓯᓴ, ᒫᐊᐧᒋᑕᒪᐃᐧᐣ ᑌᐸᑯᐦᐳᒥᑕᓇᐤ ᓈᐯᐊᐧᐠ ᐁ ᓂᑳᓀᔨᑖᑯᓯᒋᐠ ᐃᐢᕒᐁᐃᓬᐃᕽ, ᑳ ᑭᐢᑫᔨᒪᒋᐠ ᐁ ᓂᑳᓀᔨᑖᑯᓯᒋᐠ ᐊᔨᓯᔨᓂᓈᕽ, ᒥᓇ ᑭᑕ ᑭ ᑎᐯᔨᒫᒋᐠ; ᐯ ᐃᑐᑕᐃᐠ ᒫᑲ ᒫᐊᐧᒋᐦᐃᑐᐃᐧ ᒥᑭᐋᐧᐱᕽ, ᐁᑯᑕ ᑭᑕ ᐃᐧᒋᑳᐸᐃᐧᐢᑖᐢᑭᐠ. 17ᓂ ᑲ ᐯ ᔮᓯᐣ ᒫᑲ ᐁᑯᑕ ᑭᑕ ᐊᔭᒥᐃᑖᐣ; ᓂ ᑲ ᐅᑎᓈᐤ ᒫᑲ ᐊᓇ ᐊᐦᒑᕽ ᐅᐦᒋ ᑳ ᑭᑭᐢᑳᐢᐠ, ᐁᑯᓯ ᓂ ᑲ ᐸᑭᑎᓇᒪᐋᐧᐊᐧᐠ; ᑭ ᑲ ᐃᐧᒋᐦᐃᑲᐧᐠ ᒫᑲ ᐁ ᓇᔭᑕᒪᐣ ᐊᔨᓯᔨᓂᐊᐧᐠ ᑳ ᐃᓯ ᓇᔭᑕᐃᐢᑭᐠ, ᐁᑳ ᑭᑕ ᐯᔭᑯ ᓇᔭᑕᒪᐣ. 18ᐅᒥᓯ ᒫᑲ ᑭ ᑲ ᐃᑖᐊᐧᐠ ᐊᔨᓯᔨᓂᐊᐧᐠ, ᑲᓈᒋᐃᓱᑫᐠ ᐋᐧᐸᐦᑭ, ᐁᑯᓯ ᑭ ᑲ ᒥᒋᓈᐋᐧᐤ ᐃᐧᔮᐢ; ᒋᑫᒫ ᑭ ᑭ ᒫᑐᓈᐋᐧᐤ ᐁ ᐯᑖᑯᔦᐠ ᑳ ᑎᐯᔨᐦᒋᑫᐟ ᐁ ᐃᑌᐧᔦᐠ, ᐊᐁᐧᓇ ᑫ ᒥᔨᑯᔮᕽ ᐃᐧᔮᐢ ᑭᑕ ᒥᒋᔮᕽ? ᒋᑫᒫ ᓂ ᑭ ᒥᔪᐊᔮᓈᐣ ᐃᒋᑊᑎᕽ; ᐁᑯᓯ ᒫᑲ ᑳ ᑎᐯᔨᐦᒋᑫᐟ ᑭ ᑲ ᒥᔨᑯᐋᐧᐤ ᐃᐧᔮᐢ ᑭ ᑲ ᒥᒋᓈᐋᐧᐤ ᒫᑲ. 19ᓇᒪᐃᐧᔭ ᑭ ᑲ ᒥᒋᓈᐋᐧᐤ ᐯᔭᐠ ᑭᓯᑳᐤ, ᐊᐦᐳ ᓂᓱ ᑭᓯᑳᐤ, ᐊᐦᐳ ᓂᔮᓇᓄᑭᓯᑳᐤ, ᐊᐦᐳ ᒥᑖᐦᑐᑭᓯᑳᐤ, ᐊᐦᐳ ᓂᓯᑕᓇᐤ ᑭᓯᑳᐤ; 20ᒫᑲ ᐯᔭᐠ ᐱᓯᒼ, ᐱᔨᐢ ᑭᑌᔨᑯᒥᐋᐧᕽ ᑭᑕ ᐯ ᐅᐦᒋ ᐊᐧᔭᐃᐧᐸᔨᐠ, ᐁᑯᓯ ᑭᑕ ᐁᐧᐢᑖᑌᔨᑕᒣᐠ; ᒋᑫᒫ ᐁ ᑭ ᐋᑕᐁᐧᔨᒫᔦᐠ ᑳ ᑎᐯᔨᐦᒋᑫᐟ ᑳ ᐃᐧᒉᐃᐧᑯᔦᐠ ᒥᓇ ᐁ ᑭ ᒫᑐᔦᐠ ᐁ ᐋᐧᐸᒥᑯᔦᐠ ᐁ ᐃᑌᐧᔦᐠ, ᑖᓀᐦᑭ ᐃᒋᑊᑎᕽ ᑳ ᑭ ᐯ ᐅᐦᒋ ᓯᐯᐧᑌᔭᕽ? 21ᒧᓯᐢ ᒫᑲ ᑭ ᐃᑌᐧᐤ, ᐊᔨᓯᔨᓂᐊᐧᐠ ᑳ ᐃᐧᒋᐊᔮᒪᑭᐠ, ᓂᑯᑖᐧᓵᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐃᐦᑕᓯᐊᐧᐠ ᐅᒧᐢᑐᑌᐊᐧᐠ; ᑭ ᑭ ᐃᑖᐧᐣ ᒋ ᒫᑲ, ᓂ ᑲ ᒥᔮᐊᐧᐠ ᐃᐧᔮᐢ ᑭᑕ ᒥᒋᒋᐠ ᐯᔭᐠ ᐱᓯᒼ. 22ᒫᔭᑎᐦᑲᐧ ᒋ ᐊᐦᐳ ᒧᐢᑐᓴᐧ ᑭᑕ ᓂᐸᑕᒪᐋᐧᐊᐧᐠ ᑭᑕ ᑌᐱᔭᐁᐧᐃᐦᒋᐠ? ᐊᐦᐳ ᒋ ᑲᐦᑭᔭᐤ ᑭᓄᓭᐊᐧ ᑭᐦᒋᑲᒥᕽ ᑭᑕ ᒫᐊᐧᒋᐦᐃᒫᐊᐧ ᑭᑕ ᑌᐸᐅᐦᒋᐠ?
23ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᒧᓯᓴ, ᓄᐦᑌᐸᔨᔨᐤ ᒋ ᑳ ᑎᐯᔨᐦᒋᑫᐟ ᐅᒋᐦᒋ? ᐁᑲᐧ ᑭ ᑲ ᐋᐧᐸᐦᑌᐣ ᑭᐢᐱᐣ ᓂᐟ ᐃᑌᐧᐃᐧᐣ ᑫ ᑎᐱᐸᔨᑖᐧᑲᐃᐧᐊᐧᓀ ᐊᐦᐳ ᐁᑳ.
24ᒧᓯᐢ ᒫᑲ ᑭ ᐊᐧᔭᐃᐧᐤ ᒥᓇ ᑭ ᐃᐧᐦᑕᒪᐁᐧᐤ ᐊᔨᓯᔨᓂᐊᐧ ᐅᐟ ᐃᑌᐧᐃᐧᓂᔨᐊᐧ ᑳ ᑎᐯᔨᐦᒋᑫᔨᐟ; ᐁᑯᓯ ᑭ ᒫᒪᐃᐧ ᓇᑐᒣᐤ ᑌᐸᑯᐦᐳᒥᑕᓇᐤ ᑳ ᓂᑳᓀᔨᑖᑯᓯᔨᐟ ᐊᔨᓯᔨᓂᐊᐧ ᐋᐧᐢᑳ ᒫᑲ ᒥᑭᐋᐧᐱᕽ ᑭ ᐃᑕᑌᐤ. 25ᑳ ᑎᐯᔨᐦᒋᑫᐟ ᒫᑲ ᑭ ᐯ ᔮᓯᐤ ᐊᐧᐢᑯᕽ, ᐁᑯᓯ ᑭ ᐊᔭᒥᐃᐠ, ᑭ ᐅᑎᓀᔨᐊᐧ ᒫᑲ ᐊᓂᐦᐃ ᐅᐦᒋ ᐊᐦᒑᐦᑲᐧ ᑳ ᑭᑭᐢᑳᑯᐟ ᐁ ᑭ ᐸᑭᑎᓇᒪᐋᐧᔨᐟ ᒫᑲ ᐊᓂᐦᐃ ᑌᐸᑯᐦᐳᒥᑕᓇᐤ ᑳ ᓂᑳᓀᔨᑖᑯᓯᔨᐟ; ᑭ ᐃᐦᑭᐣ ᒫᑲ ᐃᐢᐱ ᐊᓂᐦᐃ ᐊᐦᒑᐦᑲᐧ ᑫᑭᐢᑳᑯᒋᐠ ᑭ ᑭᐢᑭᐁᐧᐦᐃᑫᐊᐧᐠ, ᐁᑲᐧ ᐁ ᑭ ᑭᐱᒋᒋᐠ.
26ᒫᑲ ᑭ ᐃᐢᑯᐊᐧᐠ ᓂᓱ ᓈᐯᐊᐧᐠ ᐊᓇ ᐯᔭᐠ ᐁᓬᑖᐟ ᑭ ᐃᓯᔨᐦᑳᓱ, ᐁᑯᓯ ᐊᓇ ᑯᑕᐠ ᒥᑖᐟ ᑭ ᐃᓯᔨᐦᑳᓱ; ᐁᑯᓯ ᐃᐧᔭᐋᐤ ᒥᓇ ᐊᐦᒑᐦᑲᐧ ᑭ ᐅᑎᐦᑎᑲᐧᐠ; ᐁᐊᐧᑯᓂᐠ ᒫᑲ ᑭ ᒪᓯᓇᐃᑳᓱᐊᐧᐠ, ᒫᑲ ᓇᒪᐃᐧᔭ ᐅᐦᒋ ᐃᑐᐦᑌᐊᐧᐠ ᒥᑭᐊᐧᐱᕽ; ᑭ ᑭᐢᑭᐁᐧᐦᐃᑫᐊᐧᐠ ᒫᑲ ᑲᐯᓯᐃᐧᓂᕽ. 27ᐁᑯᓯ ᑭ ᐃᐢᐸᑖᐤ ᐅᐢᑭᓂᑭᐤ ᒥᓇ ᑭ ᐃᐧᐦᑕᒪᐁᐧᐤ ᒧᓯᓴ, ᑭ ᐃᑌᐧᐤ, ᐁᓬᑖᐟ ᒥᓇ ᒥᑖᐟ ᑭᐢᑭᐁᐧᐦᐃᑫᐊᐧᐠ ᑲᐯᓯᐃᐧᓂᕽ. 28ᒑᐢᔪᐊ ᒫᑲ ᐅᑯᓯᓴ ᓇᐣ ᒧᓯᐢ ᐅᐟ ᐊᑐᐢᑫᔮᑲᓇ, ᐯᔭᐠ ᐊᓂᐦᐃ ᑳ ᑭ ᓇᐊᐧᓱᓈᐟ, ᑭ ᓇᐢᑫᐧᐊᐧᓯᐁᐤ ᒥᓇ ᑭ ᐃᑌᐧᐤ, ᓄᑭᒫᒼ ᒧᓯᐢ, ᑭᑕᐦᐊᒪᐃᐧᐠ. 29ᒧᓯᐢ ᒫᑲ ᑭ ᐃᑌᐤ, ᑭᐟ ᐃᓴᐋᐧᓇᑫᔨᒧᐣ ᒋ ᓂᔭ ᐅᐦᒋ? ᐱᑕᓀ ᐃᑌᔨᑕᕽ ᑭᓭᒪᓂᑐ ᑲᐦᑭᔭᐤ ᑳ ᑎᐯᔨᐦᒋᑫᐟ ᐅᐟ ᐊᔨᓯᔨᓂᒪ ᑭᑕ ᑭᐢᑭᐁᐧᐦᐃᑫᔨᐟ, ᑳ ᑎᐯᔨᐦᒋᑫᐟ ᒫᑲ ᑭᑖ ᐸᑭᑎᓇᒪᐋᐧᐟ ᐅᐟ ᐊᐦᒑᐦᑲᐧ! 30ᒧᓯᐢ ᒫᑲ ᑭ ᐃᑐᐦᑌᐤ ᑲᐯᓯᐃᐧᓂᕽ ᐃᐧᔭ ᒥᓇ ᑳ ᓂᑳᓀᔨᑖᑯᓯᔨᐟ ᐃᐢᕒᐁᐃᓬ.
31ᑳ ᑎᐯᔨᐦᒋᑫᐟ ᒫᑲ ᑭ ᓯᐯᐧᑎᓴᐦᐊᒼ ᔪᑎᐣ, ᐁᑯᓯ ᑭ ᐯᓯᐁᐧᐤ ᐱᔦᐊᐧ ᑭᐦᒋᑲᒥᕽ ᐅᐦᒋ ᐁᑯᓯ ᑲᐯᓯᐃᐧᓂᕽ ᑭ ᐹᐸᑭᓯᓇᐧᐠ, ᓈᐣᑕᐤ ᐯᔭᐠ ᑭᓯᑳᐤ ᐱᒧᐦᑌᐅᐃᐧᐣ ᐃᔨᑯᕽ ᐅᑌ ᐃᑌᑭ, ᒥᓇ ᐯᔭᐠ ᑭᓯᑳᐤ ᐱᒧᐦᑌᐅᐃᐧᐣ ᑫᐧᐢᑭ ᐃᑌᐦᑫ ᐋᐧᐢᑳ ᑲᐯᓯᐃᐧᓂᕽ, ᐁᑯᓯ ᓈᐣᑕᐤ ᓂᓱ ᑯᐱᑕ ᐃᔨᑯᕽ ᐁ ᑭᐢᐸᑲᐱᒋᐠ ᐊᐧᐢᑭᑕᐢᑲᒥᐠ. 32ᐊᔨᓯᔨᓂᐊᐧᐠ ᒫᑲ ᑭ ᓂᐸᐃᐧᐊᐧᐠ ᑲᐯᑭᓯᐠ ᒥᓇ ᑲᐯᑎᐱᐢᐠ ᒥᓇ ᑲᐯᑭᓯᐠ ᑭᐦᑖᐧᒼ ᐁ ᑭᓯᑳᐠ ᐁ ᒧᓴᑭᓈᒋᐠ ᐱᔦᐊᐧ; ᐊᓇ ᒫᐊᐧᐨ ᐊᐱᓯᐢ ᐁ ᒧᓴᑭᓈᐟ ᒥᑖᑕᐦᐟ ᐦᐋᒪᕒ ᐃᔨᑯᕽ ᑭ ᒧᓴᑭᓀᐤ; ᑭ ᒥᓯᑌᓯᒣᐊᐧᐠ ᒫᑲ ᒥᓯᐁᐧ ᐊᐧᐢᑳ ᑲᐯᓯᐃᐧᓂᕽ. 33ᒣᑳᐧᐨ ᒫᑲ ᑫᔮᐱᐨ ᐁ ᑖᑲᐧᑕᑭᐠ ᐊᓂᒪ ᐃᐧᔮᐢ ᒪᐧᔦᐢ ᓯᑲᐧᑕᑭᐠ, ᑳ ᑎᐯᔨᐦᒋᑫᐟ ᐅ ᑭᓯᐋᐧᓯᐃᐧᐣ ᑭ ᑳᐧᑯᑌᐸᔨᐤ ᐊᔨᓯᔨᓂᐊᐧᐠ ᐅᐦᒋ, ᐁᑯᓯ ᑳ ᑎᐯᔨᐦᒋᑫᐟ ᑭ ᐸᑲᒪᐁᐧᐤ ᐊᔨᓯᔨᓂᐊᐧ ᑭᐦᒋ ᐋᔨᒫᐢᐱᓀᐃᐧᐣ ᐅᐦᒋ. 34ᐁᑯᑕ ᒫᑲ ᑭᐸᕒᐋᐦᐟ ᐦᐋᑌᐋᐸ ᑭ ᐃᓯᔨᐦᑳᑌᐤ ᒋᑫᒫ ᐁᑯᑕ ᑭ ᓇᐦᐃᓀᐊᐧᐠ ᐊᓂᐦᐃ ᐊᔨᓯᔨᓂᐊᐧ ᑳ ᐋᐢᐳᓂᓯᔨᐟ. 35ᑭᐸᕒᐋᐦᐟ ᐦᐋᑌᐋᐸ ᒫᑲ ᐅᐦᒋ ᐊᔨᓯᔨᓂᐊᐧᐠ ᑭ ᐃᐢᐱᒋᐊᐧᐠ ᐊᓂᑕ ᐦᐋᓴᕒᐋᐦᐟ; ᐁᑯᑕ ᒫᑲ ᑭ ᐊᔭᔮᐊᐧᐠ ᐊᓂᑕ ᐦᐋᓴᕒᐋᐦᐟ.
നിലവിൽ തിരഞ്ഞെടുത്തിരിക്കുന്നു:
ᓇᒼᐸᕒᐢ 11: KKMs
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This Bible text is a corrected edition of the 1908 Western Cree Bible; it is in the public domain.