ᐁᐠᓴᑕᐢ 28

1ᐅᑎᐣ ᒫᑲ ᐁᕒᐊᐣ ᑭᒋᐋᐧᒼ, ᐊᓯᒋ ᐅᑯᓯᓴ, ᐃᑕ ᐁ ᐊᔮᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐅᐦᒋ, ᑭᑕ ᐊᑐᐢᑲᐃᐧᐟ ᐊᔭᒥᐦᐁᐃᐧᔨᓂᐃᐧ ᐊᑐᐢᑫᐃᐧᓂᕽ, ᐁᕒᐊᐣ ᐅᑎ, ᓀᑖᑊ ᒥᓇ ᐊᐸᐃᔪ, ᐁᓬᐃᐁᓴᕒ ᒥᓇ ᐃᐦᑌᒫᕒ, ᐁᕒᐊᐣ ᐅᑯᓯᓴ. 2ᐁᑯᓯ ᒫᑲ ᑭ ᑲ ᐅᓯᐦᑕᒪᐋᐧᐤ ᑲᓈᒋ ᑭᑭᐢᑳᒋᑲᓇ ᐁᕒᐊᐣ ᑭᒋᐋᐧᒼ, ᑭᑕ ᑭᐦᒋᓈᑲᐧᑭ ᒥᓇ ᑭᑕ ᒥᔪᓈᑲᐧᑭ. 3ᑭ ᑲ ᐃᐧᐦᑕᒪᐋᐧᐊᐧᐠ ᒫᑲ ᑲᐦᑭᔭᐤ ᑳ ᐃᔨᓂᓯᐃᐧᑌᐦᐁᒋᐠ, ᐊᓂᑭ ᑳ ᑭ ᓵᑲᐢᑭᓇᑐᐊᐧᑭᐠ ᐃᔨᓂᓯᐃᐧ ᐊᐦᒑᐦᑲᐧ, ᑭᑕ ᐅᓯᐦᑖᐋᐧᒋᐠ ᐁᕒᐊᓇ ᐅ ᑭᑭᐢᑳᒋᑲᓂᔨᐊᐧ ᑭᑕ ᑲᓈᒋᐦᐃᑯᐟ, ᑭᑕ ᐊᑐᐢᑲᐃᐧᐟ ᐊᔭᒥᐦᐁᐃᐧᔨᓂᐤ ᐊᑐᐢᑫᐃᐧᓂᕽ. 4ᐁᐊᐧᑯᓂ ᒫᑲ ᐅᐦᐃ ᑭᑭᐢᑳᒋᑲᓇ ᑫ ᐅᓯᐦᑖᒋᐠ; ᐋᐧᐢᑭᑲᓈᐱᐢᐠ, ᒥᓇ ᐁᐦᐸᐟ, ᒥᓇ ᒥᐢᑯᑖᑲᐩ, ᒥᓇ ᐱᐦᑕᐃᐧᑭᑭᐢᑭᑲᐣ ᐁ ᒪᓯᓂᑳᐧᑌᐠ, ᒥᓇ ᐊᐢᑐᑎᐣ, ᒥᓇ ᐸᑲᐧᑌᐦᐅᐣ; ᐁᑯᓯ ᒫᑲ ᑲᓈᒋ ᑭᑭᐢᑳᒋᑲᓇ ᑭᑕ ᐅᓯᐦᑕᒪᐁᐧᐊᐧᐠ ᐁᕒᐊᓇ ᑭᒋᐋᐧᒪ, ᒥᓇ ᐅᑯᓯᓴ, ᑭᑕ ᑭ ᐊᑐᐢᑲᐃᐧᐟ ᐊᔭᒥᐦᐁᐃᐧᔨᓂᐃᐧ ᐊᑐᐢᑫᐃᐧᓂᕽ. 5ᑭᑕ ᐅᑎᓀᐊᐧᐠ ᒫᑲ ᐅᓵᐃᐧᓱᓂᔮᐊᐧ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔮᐧᓯᐠ ᐋᐧᐱᐢᑫᑭᐣ.

6ᑭᑕ ᐅᓯᐦᑖᐊᐧᐠ ᒫᑲ ᐊᓂᒪ ᐁᐦᐸᐟ ᐅᓵᐃᐧᓱᓂᔮᐤ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ ᑭᑕ ᐋᐸᑕᑭ, ᐁ ᒪᒥᔪᐟ ᐅᑕᑐᐢᑫᐤ ᑭᑕ ᐅᓯᐦᑖᐟ. 7ᓂᓱ ᐊᐢᐱᑎᑎᒪᓀᑳᐧᒋᑲᓇ ᑭᑕ ᐊᔮᐊᐧ ᐋᔨᑕᐤ ᐁ ᓵᑭᐢᑕᐃᑳᑌᐠ ᐁ ᑭᓯᐯᑲᕽ; ᑭᑕ ᐃᓯ ᒫᒪᐊᐧᕽ. 8ᐊᓂᒪ ᒥᓇ ᐁ ᒪᒫᑖᐊᐧᐢᑌᐃᑳᑌᐠ ᓇᐸᑭ ᑕᐦᑯᐱᒋᑲᐣ, ᑳ ᑭᑲᒧᐠ ᑭᑕ ᐅᐦᒋ ᐸᑲᐧᑌᐦᐅᑐᑕᒥᕽ, ᐁᑯᓯ ᑫᔮᐱᐨ ᑭᑕ ᐃᓯᒋᑳᑌᐤ ᒥᓇ ᑭᑕ ᒫᒪᐊᐧᐣ; ᐅᓴᐃᐧᓱᓂᔮᐤ, ᒋᐯᑕᑫᐧᑭᐣ, ᒋᐯᑕᑯᒥᐦᑫᐧᑭᐣ, ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ ᐁ ᐋᐸᑕᑭ. 9ᑭ ᑲ ᐅᑎᓈᐊᐧᐠ ᒫᑲ ᓂᓱ ᐋᓂᐠᐢ ᐊᓯᓂᔭᐠ, ᐁᑯᓯ ᐁᑯᑕ ᑭ ᑲ ᒪᓯᓈᐱᐢᑲᐊᒫᐧᐣ ᐅ ᐃᐧᔪᐃᐧᓂᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 10ᓂᑯᑖᐧᓯᐠ ᐅ ᐃᐧᔪᐃᐧᓂᐋᐧᐊᐧ ᐯᔭᐠ ᐊᓯᓂᕽ, ᐁᑯᓯ ᐅ ᐃᐧᔪᐃᐧᓂᐋᐧᐊᐧ ᐊᓂᑭ ᓂᑯᑖᐧᓯᐠ ᑯᑕᑲᐠ, ᐊᓇ ᑯᑕᐠ ᐊᓯᓂᕽ, ᑳᐦᑕᑊ ᐁ ᑭ ᐊᑎ ᐃᓯ ᓂᐦᑖᐃᐧᑭᒋᐠ. 11ᐅᒪᓯᓈᐱᐢᑲᐦᐃᑫᐤ ᑳ ᐃᓯ ᒪᓯᓈᐱᐢᑭᓵᐧᐟ ᐊᑯᐢᑭᐊᐧᐃᑲᐣ ᐊᓯᓂᔭ, ᐁᑯᓯ ᑫ ᐃᓯ ᒪᓯᓈᐱᐢᑭᓴᐧᒋᐠ ᐁᐊᐧᑯᓂᐠ ᓂᓱ ᐊᓯᓂᔭᐠ, ᐁ ᐋᐃᓯᔨᐦᑳᓱᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ; ᑭ ᑲ ᒥᒋᒫᐱᐢᑲᐋᐧᐊᐧᐠ ᐅᓵᐃᐧᓱᓂᔮᕽ. 12ᐁᑯᓯ ᐊᓂᑭ ᓂᓱ ᐊᓯᓂᔭᐠ ᑭ ᑲ ᑭᑲᒧᐋᐊᐧᐠ ᐊᐢᐱᑎᑎᒪᓀᑳᐧᒋᑲᓂᕽ ᐊᓂᑕ ᐁᐦᐸᑎᕽ, ᐁᐊᐧᑯᓂᐠ ᐊᓯᓂᔭᐠ ᑭᑕ ᐅᐦᒋ ᒪᓂ ᑭᐢᑭᓯᑐᑖᐦᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ; ᐁᑯᓯ ᐁᕒᐊᐣ ᑭᑕ ᐱᒥᐃᐧᑖᐁᐧᐤ ᐅ ᐃᐧᔪᐃᐧᓂᔨᐊᐧ ᐁ ᐅᑎᐢᑲᐃᐧᐢᑲᐋᐧᐟ ᑳ ᑎᐯᔨᐦᒋᑫᔨᐟ ᐊᔨᑕᐤ ᐅᑎᐦᑎᒪᓂᕽ ᑭᑕ ᒪᓂ ᑭᐢᑭᓯᑐᑖᒥᐦᐟ.

13ᑭ ᑲ ᐅᓯᐦᑖᐣ ᒫᑲ ᒥᒋᒫᐱᐢᑲᐦᐃᑲᓇ ᐅᓵᐃᐧᓱᓂᔮᐤ ᐅᐦᒋ; 14ᒥᓇ ᓂᓱ ᐱᐋᐧᐱᐢᑯᔮᐱᔮ ᒣᒧᐦᒋ ᐅᓵᐃᐧᓱᓂᔮᐤ ᐁ ᐋᐸᒋᐊᐟ; ᑖᐱᐢᑯᐨ ᐱᒪᓇᑳᐧᓂᓴ ᑭ ᑲ ᐃᓯᑖᐣ, ᐁ ᐱᒪᐃᑳᑌᑭ, ᐁᑯᓯ ᑭ ᑲ ᑭᑲᒧᑖᐣ ᐊᓂᐦᐃ ᐱᐋᐧᐱᐢᑯᔮᐱᔭ ᐁᑯᑕ ᒥᒋᒫᐱᐢᑲᐦᐃᑲᓂᕽ.

15ᐁᑯᓯ ᒥᓇ ᑭ ᑲ ᐅᓯᐦᑖᐣ ᐅᔭᓱᐋᐧᓯᐁᐧᐃᐧ ᐋᐧᐢᑭᑲᓈᐱᐢᐠ, ᐁ ᐃᓯ ᓇᑲᒋᐦᑖᐟ ᑳ ᒪᒥᔪᐟ ᐅᑕᑐᐢᑫᐤ; ᑖᐱᐢᑯᐨ ᐊᓂᒪ ᐁᐦᐸᐟ ᑳ ᐃᓯᑖᕽ ᑭ ᑲ ᐃᓯ ᐅᓯᐦᑖᐣ; ᐅᓵᐃᐧᓱᓂᔭᐤ, ᒋᐯᑕᑫᐧᑭᐣ, ᒋᐯᑕᑯᒥᐦᑫᐧᑭᐣ, ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ ᑭ ᑲ ᐋᐸᒋᐦᑖᐣ. 16ᑭᑕ ᑲᑲᑫᔮᐤ ᒥᓇ ᑭᑕ ᓇᐳᐊᔮᐤ; ᐯᔭᐠ ᑎᐱᒋᐦᒑᒋᑲᐣ ᑭᑕ ᐃᐢᑳᐧᐤ ᒥᓇ ᐯᔭᐠ ᑎᐱᒋᐦᒑᒋᑲᐣ ᑭᑕ ᐃᐢᐱᑕᔭᑲᐢᑳᐤ. 17ᐁᑯᓯ ᐁᑯᑕ ᑭ ᑲ ᐊᑯᒧᐋᐊᐧᐠ ᐊᓯᓂᔭᐠ, ᓀᐋᐧᐤ ᑭᑕ ᐱᒪᐱᐊᐧᐠ; ᐯᔭᑳᐧᐤ ᐁ ᐱᒪᐱᒋᐠ, ᓵᕒᑎᔭᐢ, ᑖᐸᐢ, ᒥᓇ ᑳᕒᐸᐣᑭᓬ, ᐁᐊᐧᑯ ᓂᐢᑕᒼ ᐁ ᐱᒪᐱᒋᐠ; 18ᐁᑯᓯ ᑭᐦᑖᐧᒼ ᐁ ᐱᒪᐱᒋᐠ, ᐁᒪᕒᐊᓬᐟ, ᓵᐦᐹᔭᕒ, ᒥᓇ ᑖᔭᒪᐣᐟ; 19ᐁᑯᓯ ᓂᐢᑖᐧᐤ ᐁ ᐱᒪᐱᒋᐠ ᒉᓯᐣᐟ, ᒥᓇ ᐋᑫᐟ, ᒥᓇ ᐋᒥᑎᐢᐟ. 20ᐁᑯᓯ ᓀᐋᐧᐤ ᐁ ᐱᒪᐱᒋᐠ ᐯᕒᐃᓬ, ᒥᓇ ᐋᓂᐠᐢ, ᒥᓇ ᒑᐢᐸᕒ; ᑲᐦᑭᔭᐤ ᑭᑕ ᒥᒋᒥᓂᑳᓱᐊᐧᐠ ᐅᓵᐃᐧᓱᓂᔮᕽ ᐃᑕ ᐁ ᑭᑲᒧᐃᐦᒋᐠ. 21ᐊᓂᑕ ᒫᑲ ᐊᓯᓂᕽ ᑭᑕ ᐊᔮᔨᐊᐧ ᐅ ᐃᐧᔪᐃᐧᓂᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒥᑖᑕᐦᐟ ᓂᓱᓵᑊ, ᐁ ᐋᐃᓯᔨᐦᑳᓱᒋᐠ, ᑖᐱᐢᑯᐨ ᑳ ᐃᓯ ᒪᓯᓈᐱᐢᑲᐦᐃᑳᑌᐠ ᐊᑯᐢᑭᐊᐧᓯᑲᐣ, ᑲᐦᑭᔭᐤ ᐁ ᐃᑕᐢᑌᔨᑭ ᐅ ᐃᐧᔪᐃᐧᓂᐋᐧᐊᐧ, ᐁᐊᐧᑯᓂᐠ ᐅᐦᒋ ᒥᑖᑕᐦᐟ ᓂᓱᓵᑊ ᑳ ᑕᐦᑐᑌᐃᐧᓯᒋᐠ.

22ᐁᑯᓯ ᐋᐧᐢᑭᑲᓈᐱᐢᑯᕽ ᑭ ᑲ ᐅᓯᐦᑖᐣ ᐱᐋᐧᐱᐢᑯᔮᐱᓴ ᑖᐱᐢᑯᐨ ᐱᒪᓇᑳᐧᓂᓴ ᐁ ᐱᒪᐃᑳᑌᑭ ᑭᑕ ᐃᓯᒋᑳᑌᐊᐧ ᒣᒧᐦᒋ ᐅᓵᐃᐧᓱᓂᔮᐤ. 23ᐁᑯᓯ ᐋᐧᐢᑭᑲᓈᐱᐢᑯᕽ ᑭ ᑲ ᐅᓯᐦᑖᐣ ᓂᓱ ᐊᔭᐹᐱᐢᑯᓴ ᐅᓵᐃᐧᓱᓂᔮᐤ, ᐁᑯᓯ ᐊᓂᐦᐃ ᓂᓱ ᐊᔭᐹᐱᐢᑯᓴ ᑭ ᑲ ᑭᑲᒧᑖᐣ ᑳᑭᓯᐸᓄᕽ ᐋᐧᐢᑭᑲᓈᐱᐢᑯᕽ. 24ᐁᑯᓯ ᐊᓂᐦᐃ ᓂᓱ ᐱᐋᐧᐱᐢᑯᔮᐱᓴ ᑳ ᑭ ᐱᒪᐃᑳᑌᑭ ᑭ ᑲ ᓵᐳᑕᐁᐧᔮᐯᑭᓀᐣ ᐊᔭᐸᐱᐢᑯᓯᕽ ᑳᑭᓯᐸᓄᕽ ᐋᐧᐢᑭᑲᓈᐱᐢᑯᕽ. 25ᐁᑯᓯ ᐁ ᑭᓯᐹᐯᑲᑭ ᐊᓂᐦᐃ ᓂᓱ ᐱᐊᐧᐱᐢᑯᔮᐱᓴ ᑭ ᑲ ᐊᐢᑖᐣ ᒥᒋᒫᐱᐢᑲᐦᐃᑲᓂᕽ ᑳ ᓂᓯᑭ, ᐁᑯᓯ ᐁᐊᐧᑯᓂ ᑭ ᑲ ᐊᐢᑖᐣ ᐊᐢᐱᑎᑎᒪᓀᑳᐧᒋᑲᓂᕽ ᐊᓂᒪ ᐁᐦᐸᐟ ᐋᐧᐢᑭᑲᓂᕽ ᐃᑌᐦᑫ.

26ᐁᑯᓯ ᑭ ᑲ ᐅᓯᐦᑖᐣ ᓂᓱ ᐊᔭᐹᐱᐢᑯᓴ ᐅᓵᐃᐧᓱᓂᔮᐤ, ᑭ ᑲ ᑭᑲᒧᑖᐣ ᒫᑲ ᑳᑭᓯᐸᓄᕽ ᐋᐧᐢᑭᑲᓈᐱᐢᑯᕽ ᐃᑕ ᐁ ᐃᓴᐁᐧᔮᐠ ᐊᑖᒥᕽ ᐁᐦᐸᑎᕽ ᐃᑌᐦᑫ. 27ᐁᑲᐧ ᒥᓇ ᑭ ᑲ ᐅᓯᐦᑖᐣ ᓂᓱ ᐊᔭᐸᐱᐢᑯᓴ ᐅᓵᐃᐧᓱᓂᔮᐤ, ᐁᑯᓯ ᑭ ᑲ ᑭᑲᒧᑖᐣ ᐊᓂᑕ ᐊᐢᐱᑎᑎᒪᓀᑳᐧᒋᑲᓂᕽ ᐁᐦᐸᑎᕽ ᐊᑖᒥᕽ, ᐋᐧᐢᑭᑲᓂᕽ ᐃᑌᐦᑫ, ᒋᑭ ᐃᑕ ᐁ ᐊᑯᐢᑕᐃᑳᑌᐠ, ᐃᐢᐱᒥᓯᕽ ᐊᓂᒪ ᑳ ᒪᒫᑖᐃᐧᐢᑕᐃᑳᑌᐠ ᐸᑲᐧᑌᐦᐅᐣ ᐁᐦᐸᑎᕽ. 28ᐁᑯᓯ ᐊᔮᐸᐱᐢᑯᓯᕽ ᐋᐧᐢᑭᑲᓈᐱᐢᑯᕽ ᑳ ᐊᔮᑭ ᒥᓇ ᐊᔭᐸᐱᐢᑯᓯᕽ ᐁᐦᐸᑎᕽ ᑳ ᐊᔭᑭ ᑭᑕ ᓵᐳᑕᐁᐧᔮᐯᑲᒧᑖᐊᐧᐠ ᒋᐯᑕᑯᔮᐱ ᑭᑕ ᐊᓯᑕᐱᑕᑭᐠ ᐊᓂᒪ ᑳ ᒪᒫᑖᐃᐧᐢᑕᐃᑳᑌᐠ ᐸᑲᐧᑌᐦᐅᐣ ᐁᐦᐸᑎᕽ, ᐁᑯᓯ ᐊᓂᒪ ᐋᐧᐢᑭᑲᓈᐱᐢᐠ ᐁᑳ ᑭᑕ ᐋᐱᑯᓂᑳᑌᐠ ᐁᐦᐸᑎᕽ ᐅᐦᒋ. 29ᐁᕒᐊᐣ ᒫᑲ ᑭᑕ ᑭᑭᐢᑲᒼ ᐅ ᐃᐧᔪᐃᐧᓂᔨᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐊᓂᑕ ᐅᔭᓱᐋᐧᓯᐁᐧᐃᐧᓇ ᐋᐧᐢᑭᑲᓈᐱᐢᑯᕽ ᐅᑌᐦᐃᕽ, ᐱᔨᑐᑫᒋ ᐃᑕ ᑳ ᑲᓈᑕᓂᔨᐠ, ᑭᑕ ᒪᓂ ᑭᐢᑭᓯᑐᑖᐦᒋᐠ ᐅᐟ ᐋᐢᑕᒥᐃᐧᓂᕽ ᑳ ᑎᐯᔨᐦᒋᑫᐟ ᑳᑭᑫ.

30 # ᓇᒼᐸᕒᐢ 27:21; ᑎᔪᑕᕒᐊᓇᒥ 33:8; ᐁᐢᕒᐊ 2:63; ᓂᐦᐃᒫᔭ 7:65 ᐁᑯᓯ ᑭ ᑲ ᐊᐢᑖᐣ ᐅᔭᓱᐋᐧᓯᐁᐧᐃᐧᓂ ᐋᐧᐢᑭᑲᓈᐱᐢᑯᕽ ᐊᓂᒪ ᔪᕒᐃᒼ ᒥᓇ ᑕᒥᒼ; ᐁᕒᐊᐣ ᒫᑲ ᐅᑌᐦᐃᕽ ᑭᑕ ᐊᐢᑌᔨᐊᐧ ᐃᐢᐱ ᐱᔨᑐᑫᒋ ᑭᑕ ᐅᑎᐢᑲᐃᐧᐢᑲᐋᐧᐟ ᑳ ᑎᐯᔨᐦᒋᑫᔨᐟ; ᐁᑯᓯ ᐁᕒᐊᐣ ᑭᑕ ᐱᒥᐃᐧᑖᐁᐧᐤ ᐅᔭᓯᐋᐧᑎᑯᐃᐧᓂᔨᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐅᑌᐦᐃᕽ ᐁ ᐅᑎᐢᑲᐃᐧᐢᑲᐋᐧᐟ ᑳ ᑎᐯᔨᐦᒋᑫᔨᐟ ᑳᑭᑫ.

31ᑭ ᑲ ᐅᓯᐦᑖᐣ ᒫᑲ ᑫ ᐱᑕᐁᐧᐢᑭᑳᑌᐠ ᐁᐦᐸᑎᕽ ᒥᓯᐁᐧ ᐁ ᒋᐯᑕᑳᐧᐠ. 32ᑭᑕ ᐸᑯᓀᔮᐤ ᐃᑕ ᒥᐢᑎᑳᐧᐣ ᑭᑕ ᐊᔮᐠ ᑖᐊᐧᔨᕽ; ᑭᑕ ᐋᔮᓱᐃᐧᑲᐧᑌᐤ ᒫᑲ ᒥᓯᐁᐧ ᐋᐧᐢᑳ ᐃᑕ ᐁ ᐸᑯᓀᔮᐠ, ᑖᐱᐢᑯᐨ ᐁ ᐸᑯᓀᔮᐠ ᓇᑐᐸᔨᐊᐧᓵᑳᐧ, ᐁᑳ ᑭᑕ ᔮᔨᑭᐸᔨᐠ. 33ᑕᐸᓯᐢ ᒫᑲ ᐁ ᑭᓯᐯᑲᕽ ᑭ ᑲ ᐅᓯᑖᐣ ᓄᑎᒥᒥᓂᑳᓇ ᐁ ᒋᐯᑕᑳᐧᑭ, ᐁ ᒋᐯᑕᑯᒥᐦᑳᐧᑭ, ᒥᓇ ᐁ ᐸᑲᐢᑭᒥᐦᑳᐧᑭ, ᐋᐧᐢᑳ ᐁ ᑲᑭᓯᐯᑲᕽ; ᐁᑯᓯ ᑕᑖᐢᑕᐁᐧᔭᐢ ᐅᓵᐃᐧᓱᓂᔭᐃᐧ ᓴᓴᐁᐧᐅᔮᑲᓂᓴ ᒥᓯᐁᐧ ᐋᐧᐢᑳ. 34ᐅᓵᐃᐧᓱᓂᔮᐃᐧ ᓴᓴᐁᐧᐅᔮᑲᓂᐢ ᐁᑲᐧ ᓄᑎᒥᒥᓂᑳᐣ, ᐅᓵᐃᐧᓱᓂᔮᐃᐧ ᓴᓴᐁᐧᐅᔮᑲᓂᐢ ᐁᑲᐧ ᓄᑎᒥᒥᓂᑳᐣ, ᐁᑯᓯ ᐃᓯ ᐁ ᑭᓯᐯᑲᕽ ᐁᐊᐧᑯ ᑭᑭᐢᑳᒋᑲᐣ ᒥᓯᐁᐧ ᐋᐧᐢᑳ. 35ᑭᑕ ᑭᑭᐢᑲᒼ ᒫᑲ ᐁᕒᐊᐣ ᐁ ᐸᒥᑖᐟ ᐅᐟ ᐊᑐᐢᑫᐃᐧᐣ; ᐁᑯᓯ ᐁ ᓭᐁᐧᐸᔨᐟ ᑭᑕ ᐯᐦᑖᑲᐧᐣ ᐱᔨᑐᑫᒋ ᐃᑕ ᑳ ᑲᓈᑕᓂᔨᐠ ᑭᑕ ᐅᐦᑎᐢᑲᐃᐧᐢᑲᐋᐧᐟ ᑳ ᑎᐯᔨᐦᒋᑫᔨᐟ, ᒥᓇ ᐱᔦᐊᐧᔭᐃᐧᒋ ᐁᑳ ᑭᑕ ᓂᐱᐟ.

36ᐁᑯᓯ ᒫᑲ ᑭ ᑲ ᐅᓯᐦᑖᐣ ᓇᐸᑳᐱᐢᑯᐢ ᒣᒧᐦᒋ ᐅᓵᐃᐧᓱᓂᔮᐤ, ᐁᑯᓯ ᑭ ᑲ ᒪᓯᓈᐱᐢᑲᐁᐣ ᑖᐱᐢᑯᐨ ᐁ ᒪᓯᓈᐱᐢᑲᐦᐃᑳᑌᐠ ᐊᑯᐢᑭᐊᐧᓯᑲᐣ, ᑲᓈᑕᐣ ᐃᐧᔭ ᐅᐦᒋ ᑳ ᑎᐯᔨᐦᒋᑫᐟ. 37ᑭ ᑲ ᐊᐢᑖᐣ ᒫᑲ ᒋᐯᑕᑯ ᐊᐧᐊᐧᓯᒋᑲᓂᕽ, ᐁᑯᓯ ᑭᑕ ᐊᔮᐤ ᐊᐢᑐᑎᓂᕽ; ᐁ ᐅᑎᐢᑲᐋᐧᐠ ᐊᐢᑐᑎᐣ ᐁᑯᑕ ᑭᑕ ᐊᔮᐤ. 38ᐁᕒᐊᐣ ᒫᑲ ᐅᐢᑲᑎᑯᕽ ᑭᑕ ᑭᑭᐢᑲᒼ, ᐁᑯᓯ ᐁᕒᐊᐣ ᑭᑕ ᐱᒥᐃᐧᑖᐤ ᐁ ᒪᒑᔨᐋᐧᓂᔨᑭ ᑲᓈᒋ ᑫᑲᐧᔭ, ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑫ ᑲᓈᒋᐦᑖᒋᐠ ᑲᐦᑭᔭᐤ ᐅ ᑲᓈᒋ ᒣᑭᐃᐧᓂᐋᐧᕽ; ᑳᑭᑫ ᒫᑲ ᐅᐢᑲᑎᑯᕽ ᑭᑕ ᐊᔮᔨᐤ ᑭᑕ ᒥᔪ ᐅᑎᓂᑯᔨᐟ ᑭᓭᒪᓂᑐᐊᐧ.

39ᑭ ᑲ ᒫᒫᑕᐃᐧᑳᐧᑌᐣ ᒫᑲ ᒥᐢᑯᑖᑲᐧ ᑳ ᒥᔮᐧᓯᐠ ᐋᐧᐱᐢᑫᑭᐣ ᐅᐦᒋ, ᐁᑯᓯ ᑭ ᑲ ᐅᓯᐦᑖᐣ ᐊᐢᑐᑎᐣ ᐁ ᒥᔮᐧᓯᐠ ᐋᐧᐱᐢᑫᑭᐣ ᒥᓇ ᑭ ᑲ ᐅᓯᐦᑖᐣ ᐸᑲᐧᑌᐦᐅᐣ ᐁ ᐃᓯ ᐅᓯᐦᒋᑫᐟ ᐅᒪᓯᓂᐢᑕᐃᑫᐤ.

40ᐁᕒᐊᐣ ᒫᑲ ᐅᑯᓯᓴ ᒥᐢᑯᑖᑲᔭ ᑭ ᑲ ᐅᓯᐦᑕᒪᐋᐧᐊᐧᐠ, ᐁᑯᓯ ᒥᓇ ᐸᑲᐧᑌᐦᐅᓇ ᑭ ᑲ ᐅᓯᐦᑕᒪᐋᐧᐊᐧᐠ, ᒥᓇ ᐊᐢᑐᑎᓇ ᑭ ᑲ ᐅᓯᐦᑕᒪᐋᐧᐊᐧᐠ, ᑭᑕ ᑭᐦᒋᓈᑯᓯᒋᐠ ᒥᓇ ᑭᑕ ᒥᔪᓈᑯᓯᒋᐠ. 41ᑭ ᑲ ᐳᐢᑎᐢᑲᒧᑎᔮᐊᐧᐠ ᒫᑲ ᐁᕒᐊᐣ ᑭᒋᐋᐧᒼ ᒥᓇ ᐅᑯᓯᓴ ᐊᓯᒋ; ᐁᑯᓯ ᑭ ᑲ ᑐᒥᓈᐊᐧᐠ ᒥᓇ ᑭ ᑲ ᐅᔭᑭᒫᐊᐧᐠ, ᒥᓇ ᑭ ᑲ ᑲᓈᒋᐦᐋᐊᐧᐠ, ᑭᑕ ᐋᑐᐢᑫᐢᑕᐃᐧᒋᐠ ᐊᔭᒥᐦᐁᐃᐧᔨᓂᐃᐧ ᐊᑐᐢᑫᐃᐧᐣ. 42ᐁᑯᓯ ᒥᓇ ᑭ ᑲ ᐅᓯᐦᑕᒪᐋᐧᐊᐧᐠ ᐋᐧᐱᐢᑫᑭᓄ ᐃᐧᑫᐧᐹᓇ ᑭᑕ ᐊᑲᐧᓇᐊᑭᐠ ᐅ ᒧᓭᐢᑲᑌᐃᐧᓂᐋᐧᐤ: ᐋᐱᑐᓯᔪᐤ ᐅᐦᒋ ᒥᐸᐧᒥᕽ ᐃᐢᑯ ᑭᑕ ᐃᐢᑯᓯᔨᐊᐧ. 43ᑭᑕ ᑭᑭᐢᑲᐁᐧᐤ ᒫᑲ ᐁᕒᐊᐣ ᒥᓇ ᐅᑯᓯᓴ ᐱᔨᑐᑫᑖᐧᐃᐧ ᒫᐊᐧᒋᐦᐃᑐᐃᐧ ᒥᑭᐋᐧᐱᕽ ᐊᐦᐳ ᓂᔮᑕᑳᐧᐃᐧ ᐸᑭᑎᓈᓱᐃᐧᓈᐱᐢᐠ ᑭᑕ ᐊᑐᐢᑫᒋᐠ ᐃᑕ ᑳ ᑲᓈᑕᓂᔨᐠ; ᐁᑳ ᑭᑕ ᐱᒥᐃᐧᑖᒋᐠ ᒪᒋᐃᑎᐃᐧᐣ, ᐁᑯᓯ ᑭᑕ ᓂᐱᒋᐠ; ᐁᐊᐧᑯ ᑲᑫᐢᑫᐧᐃᐧᐣ ᑳᑭᑫ ᐃᐧᔭ ᒥᓇ ᐅ ᓂᐦᑖᐃᐧᑭᐦᐋᑲᓇ ᑫ ᐊᐢᑳᐧᑯᐟ ᑭᑕ ᐱᒥᑎᓴᐦᐊᑭᐠ.

നിലവിൽ തിരഞ്ഞെടുത്തിരിക്കുന്നു:

ᐁᐠᓴᑕᐢ 28: KKMs

ഹൈലൈറ്റ് ചെയ്യുക

പകർത്തുക

താരതമ്യം

പങ്ക് വെക്കു

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

This Bible text is a corrected edition of the 1908 Western Cree Bible; it is in the public domain.

ᑲᓈᒋ ᑭᐦᒋ ᒪᓯᓈᐦᐃᑲᐣ നെക്കുറിച്ച് കൂടുതലറിയുക