Ko fɔlɔfɔlɛ 45
45
Yusufu la a fan nabɔɛ
1Yusufu bele nɔla a fan tabitala bitugun a la miliŋɛ mɔgɛnu ɲala. A ka a kulɛ mayɛlɛ, a ko: «Wo mɔgɛnu bɛ labɔɔ n kunma!» Awa, Yusufu be a yɛtɛ labɔɔla a baaba dɔndɛnu ma tɛmuɛ min tɔ, mɔgɔ yo ma to a kɛnna. 2A fɔlɔta dila sɛnbɛ la, han Misira kaanu ka a kulɛ mɔɛ, Misira mansa la bon butɔ mɔgɛnu tugun ka kɛ kibare mɔɛ. 3Yusufu ka a fɔ a baaba dɔndɛnu ye, a ko: «Yusufu le mu nde la! Han bi n baaba be ɲɔ?» Kɔnɔ a baaba dɔndɛnu ma nɔ a jaabila, bayi anu bɛ nun Yusufu la tola kan dɔndɔ, wo ka anu sɛrɛn, a ka anu yigitɛgɛ.
4Yusufu ka a fɔ a baaba dɔndɛnu ye: «Yandi n bata wo táran, wo ni wo madon n na.» Anu ka anu madon a la. A ka a fɔ anu ye: «Wo dɔgɔ Yusufu le mu n na, wo ka min san nun Misira kaanu ma. 5Kɔtɛ wo jusu kana bɔɔ, wo mɛn kana nimisa. Tɔɲa le, wole le ka n mayita han anu ka n nati yan. Kɔnɔ Ala le ka n nasanba wo ɲatɔ, alako n ni wo lakisi. 6Wo bata a yen san fila le ka, kɔnkɛ be jamanɛ tɔ, kɔnɔ san loolu mɛn be toren, sɛnɛ te nɔ wɔtɔla, dɔmɛ te nɔ tɛgɛla. 7Ala be n nasanbaren de wo ɲatɔ alako wo bɔnsɛ kana mule duge kunma, n ni wo lakisi n ni wo latanga a banba la. 8Awa, wole le ma n nati yan, Ala le ka n nati. Ale le ka n ma Misira mansa kɛnna sɔlá la, a ka n ma a la mansa boŋɛ kuŋɛ la. Nde le mu Misira duge bɛ kunma fɔlá la.
9Wo teriya wo ni taga a fɔ n baaba ye, wo ko: ‹Nde, i la den Yusufu be kɛ-lɛ fɔren, n ko: Ala bata n ma Misira bɛ kunma fɔlá la.› A ni na n bata teriya teriya la. 10A be naala tola n kɛnna le, Gosɛn duge tɔ. Ale nun a la deŋɛnu, anun a mamareŋɛnu, anun a la kolofeŋɛnu, a lanma nun a banba, anun feŋɛ min bɛ be a bolo. A bɛ ni naa to n kɛnna. 11N si a hajue bɛ jara le ɲɔ anun a la denbaya anun a sɔtɔfeŋɛ bɛ, bayi san loolu kɔnkɛ mɛn be toren. Alako wo kana to fenfen bele wo bolo.»
12Yusufu mɛn ko anu ma: «Wo bata n yen wo ɲa fila la, n dɔgɔ Bunyamin tugun ka n yen a ɲa fila la. Nde Yusufu yati da le be kumaren wo ye. 13N be nɔɔra min sɔtɔren Misira jamanɛ tɔ, anun wo be koe min bɛ yenden, wo ni a ɲamakaran n baaba ye. Wo teriya wo ni taga n baaba nati yan.» 14Wo kɔma, a milinta a dɔgɔ Bunyamin kaŋɛ la anu fila bɛ tota dila. 15A ka a kɔtɔnu bɛ masunbu a be dila. Wo bɛ labandeŋɛ le, jɔnɔn a nun a baaba dɔndɛnu fɔlɔta da masarala.
Misira mansa la Yaguba makele koe
16Wo kuma keta Misira mansa la boŋɛ tɔ, ka a fɔla Yusufu baaba dɔndɛnu bata na. Wo diyata Misira mansa nun a la miliŋɛ mɔgɛnu ye. 17Misira mansa ka a fɔ Yusufu ye, a ko: «A fɔ i baaba dɔndɛnu ye, wo be kɛ-lɛ mala: wo ni wo la kotenu bakki wo la sofalenu kɔɛɛ tɔ, wo ni taga ke Kanana duge tɔ. 18Wo ni wo baaba jigan, anun wo la denbayanu, wo ni na n kɛnna. Duge kandula ɲinma min be Misira, n si a don wo bolo, alako wo ni duge tɔnɛ dɔmɔ. 19I ni a fɔ i baaba dɔndɛnu ye: wo ni sarɛtinu jigan Misira duge tɔ, alako wo ni wo la deŋɛnu anun wo la musenu nun wo baaba bakki, wo bɛ ni na. 20Hali wo ma kɔntɔfili wo sɔtɔfeŋɛnu la ko la, bayi fondo ɲinma min bɛ be Misira, a be mala wo tɛŋɛ le la.» 21Yaguba la deŋɛnu ka a ma ɲɔgɔnna. Yusufu ka sarɛtinu don anu bolo, iko Misira mansa ka a fɔ a ye ki min na. A ka kila fanda tugun don anu bolo. 22A ka doroki banbanu dii anu bɛ ma. A ka kaalisi kole kɛmɛ saba tugun don Bunyamin bolo, anun doroki banba loolu. 23Yusufu ka kɛ-lɛ lasanba a baaba ma kila fanda la: dɔmɔ ɲinmanu min be Misira duge tɔ, a ka anu bakki sofali kayi tan kɔɛ tɔ. A ka kɔrɛ nun dɛgɛ, anun dɔmɛ mɔɔle bɛ bakki sofali musu tan kɔɛ tɔ. 24Wo kɔma a ka a kɔtɔnu boloka, anu ni taga. A ka a fɔ anu ye: «Wo juse kana bɔɔ kila la de.»
25Anu bɔɔta Misira anu tagata anu baaba Yaguba dula Kanana duge tɔ. 26Anu to ka a fɔ Yaguba ye, anu ko: «Han bi Yusufu be baluren, ale le be Misira jamanɛ bɛ kunma fɔla yati», Yaguba ka a mɔdɛ, bayi a bele laaren anu la kuma la. 27Yusufu ka kumanu min bɛ fɔ anu ye, anu ka wo bɛ ɲamakaran Yaguba ye. Yaguba ka sarɛtinu yen Yusufu be minnu lasanbaren a ma, a doni koe la. Wo koe le ka a ma anu baaba Yaguba juse sata. 28Yaguba ka a fɔ a ko: «Awa, wo dan ɲɔ! Yaga, han bi n na den Yusufu be balue tɔ. Fɔ n ni taga le, n ni a yen yannun n be fagala.»
നിലവിൽ തിരഞ്ഞെടുത്തിരിക്കുന്നു:
Ko fɔlɔfɔlɛ 45: MOG
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
