Enzũko 39
39
Yosefũ akakolera Potĩfarĩ
1Neryo Yosefũ mwatwalwa eMĩsĩrĩ. Neryo Omunya Mĩsĩrĩ ye Potĩfarĩ, omũtabalĩ wa Farao, omukulu wʼabateya, mwamugula omo byala byʼAbaĩsmaelĩ, abamuletayo. 2Nĩkwa Omwami Mukulu abya haguma na Yosefũ, neryo mwabya mundu wʼomũyĩsa. Kandi mwabya omo nyũmba yʼomukama wuwe Omunya Mĩsĩrĩ. 3Omukama wuwe Potĩfarĩ mwalangira ngoko Mwami Mukulu abya haguma na Yosefũ, nʼakandi ngoko Mwami Mukulu mwatsumula ebyosĩ akola omo byala biwe. 4Neryo Yosefũ mwabana erĩsĩmwa omo meso wuwe, mwabya mugombe wuwe. Neryo Potĩfarĩ mwayira Yosefũ mo tsongo-mwami wuwe omo nyũmba yiwe, nʼebyosĩ abya awite mwahĩrabyo omo byala biwe. 5Enyũma wʼaho erĩtsũka omugulu amuyira mo mũhangamĩ oko nyũmba yiwe, nʼoko byosĩ abya nabyo, Omwami Mukulu mwatsumula enyũmba yʼOmunya Mĩsĩrĩ busana na Yosefũ. Omũyĩsa wʼOmwami Mukulu mwabya oko byosĩ abya awite, omo nyũmba, nʼomwʼirima. 6Kandi mwahĩra ebyosĩ abya awite omo byala bya Yosefũ, kandi mwataswaminya kindu ukwʼebyo abya nabyo, ka nʼakalyo alya kasa. Nĩkwa Yosefũ abya mubuya, nʼogʼobũsũ butendere.
Yosefũ akagana muka Potĩfarĩ
7Enyũma wʼemyatsi eyĩ, omũkalĩ wʼomukama wuwe mwabuyahirwa Yosefũ, mwabũga naye ati, Gotsera nage. 8Nĩkwa Yosefũ mwagana, mwabwira omũkalĩ wʼomukama wuwe ati, Lebaya, omukama wage sĩasĩ ekiri haguma nage omo nyũmba, abĩrĩhĩra ebyosĩ awite omo byala byage. 9Sihali mundu oyũndabĩreko omo nyũmba eyĩ, kutse sialitanyikaga kindu nina we, kusangwa uli mũkalĩ wuwe. Neryo nangakola erĩlolo lingaha erĩ ryo nyiti, nʼerĩhalya uku Nyamuhanga kwehĩ? 10Enyũma wʼaho omugulu ahatikana erĩbũga na Yosefũ obuli kiro, Yosefũ mwatalĩga erigotsera naye, kutse erilambama naye. 11Enyũma wʼaho oko mugulu oyo, Yosefũ mwaya omo nyũmba erikola omũbĩrĩ wuwe, kandi sihabya mundu gʼoko bʼomo nyũmba oyo wabyamo. 12Neryo omũkalĩ mwamuwata omo lukimba luwe ati, Gotsera nage. Neryo Yosefũ mwasĩga olukimba luwe omo byala biwe, mwatibita, mwahulukira eyĩhya. 13Enyũma wʼaho omugulu alangira kwʼamabĩsĩga olukimba omo byala biwe, nʼeritibita eyĩhya. 14Omũkalĩ oyo mwabirikira abalume bʼenyũmba yiwe, mwabũga nabo ati, Lebaya, abirituletera Omuebrania erituseka. Mwakingira omwage erigotsera nage, nage mongalaka nʼomulenge munene. 15Enyũma wʼaho omugulu alĩowa ngoko namalaka nʼeribirikira, mwakasĩganaya olukimba luwe hakũhĩ nage mwakatibita eyĩhya. 16Neryo omũkalĩ mwabika olukimba luwe aho ali erĩhĩka aho ĩba wuwe akandĩhĩkĩra eka. 17Neryo mwamubwira ebĩnywa ebĩ ati, Omukobe Muebrania oyo watuletera, mwĩngĩre omwage erinzeka. 18Enyũma wʼaho, omugulu nasumba omulenge wage nʼerilaka mwanyĩsĩgĩra olukimba luwe mwatibita eyĩhya. 19Enyũma wʼaho omugulu omukama wuwe owa ebĩnywa byʼomũkalĩ wuwe, ebyo amubwira, ati, Omukobe wawe mwanyĩkolĩre emyatsi eyĩ; neryo mwahitana.
Eribohwa lya Yosefũ
20Neryo omukama wa Yosefũ mwamuhamba, mwamũhĩra omo mũlĩkĩ aho abʼomũlĩkĩ bʼomwami baboherwe, neryo Yosefũ mwabya hʼomo mũlĩkĩ. 21Nĩkwa Omwami Mukulu mwabya haguma na Yosefũ mwamũkangya eriganyira liwe, mwamuha erĩsĩmwa omo meso wʼomũteya wʼomũlĩkĩ. 22Neryo omũteya wʼenyũmba yʼomũlĩkĩ mwahĩra abʼomũlĩkĩ bosĩ omo byala bya Yosefũ. Ebyosĩ bakolaho iye mwabya mũkolĩ wabyo. 23Neryo omũteya wʼenyũmba yʼomũlĩkĩ mwataswalangira ebyo Yosefũ akola kusangwa Omwami Mukulu abya haguma na Yosefũ. Ebyosĩ akola, Omwami Mukulu m watsumulabyo.
നിലവിൽ തിരഞ്ഞെടുത്തിരിക്കുന്നു:
Enzũko 39: KB80
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible in Kinandi © Bible Society of the Democratic Republic of Congo, and Bible Society of Uganda, 1980.
