Romə 8
8
Yɛnɛ̨ɛ̨i kpɛɛ hvo mą Yálá yəi
1Yiihu kɛa, nuąi di kaa Jesus Kristə hu, nwun na pili hvo kɛa diɛ. 2Mąąhɔlɔɓo, Kili nwɔ tɔ́n a yɛnɛ̨ɛ̨ tɛɛ nu pɔ Jesus Kristə hu, aa nwún mąąɓo nɛ̨ŋɛ̨n da haa di yəi. 3Mɛ̨nįi tɔ́n hva pɛli kɛ gɛi, mąąhɔlɔɓo, nu nwɔ hviikpɛɛlaa aa gɛ vaŋą kpɛɛ ɉu, Yálá aa yili kɛ: Aa nɛ̨ŋɛ̨n gití tee nu kɔ́lɔ hu, a gbɔwɔ lon dɛɛi ə mo, ə pa, ə kɛ a nu, ə gbɔwɔ kulɔ a haláá nɛ̨ŋɛ̨n mąą mɛ̨nį ɓa, ə nɛ̨ŋɛ̨n nwun na pili kɔ́lɔ hu. 4Ə gɛ, dələnmolaa kɛ pələi dɔn ə nɛ, bɔ mɛ̨nį ə kɛ gu hu guɔi gu hvo kɛa yɛnɛ̨ɛ̨ kɛi yɛ bələi nu kiliŋąhiɛ kaa la. Kɛlaa, guɔ gɛ yɛ bələi Kili-Mąąhəɠɛɛ kaa la bɔ. 5Yili ɓa: Nuąi di kaa di wɔ yɛnɛ̨ɛ̨ kɛi a nu kili, nu liiɓa mɛ̨nį ɓə niihɛlɛn gaa diɛ. Kɛlaa, nuąi di kaa yɛnɛ̨ɛ̨ kɛi Yálá ŋą Kilii yeekɔn ma, Yálá liiɓa mɛ̨nį ɓə da di liihɛlɛn na. 6Nu liiɓa kɛɛ a haa tɛɛ nu pɔ, kɛlaa, Kili-Mąąhəɠɛɛ liiɓa kɛɛ, a yɛnɛ̨ɛ̨ da liilaa tɛɛ nu pɔ. 7Nuą yiiɠaai nu liiɓa wɛli kaa diɛ, di kaa a Yálá ɲowoɠaa. Di hva Yálá nwɔ tɔ́n nwoo pɔ mɛ̨nį kɛ, di hva kpɛli pɛli mą. 8Gwa lɛɛ nu liiɓa pulu, gu hva Yálá lii hon.
9Kɛlaa, ka wɛi, ka hvo nu kili yeekɔnma, kɛlaa, Kili-Mąąhəɠɛɛ ɓə; gbala ə tɔɔ, Yálá ŋą Kilii kaa ka hu, nui Kristə nwɔ Kilii hvo ɉu, Kristə nwɔ nu hvə li. 10Akɛ Kristə kaa ka hui, bələi mąn haa pɛ̨ɛ̨ la ka nwuɔ̨, a nɛ̨ŋɛ̨n naa pɔɔi; Gilii Yálá ə dɛɛ ka pɔ gaa a ka wɔɔ yɛnɛ̨ɛ̨, tələnmolaa háálai. 11Akɛ Yálá nwɔ Kilii ŋɛ̨i Jesus nwun haa ɓɛlaa lɔwai, gaa ka hui, Yaa ti lɔ Jesus Kristə nwun yɛ gulɔ haa nuą lɔwai, yaa lɔ ɓə pai yɛnɛ̨ɛ̨ tɛɛi ká kɔlɔi ŋɛ̨i haa mɛ̨nį pɛ̨ɛ̨i nwuɔ̨, bɔ; nwɔ Kilii ti ka hu, ɉáálai.
12Yili ɓa, nąn nonnii, kwələ kaa guɔ, kɛlaa, kɔ́lɔ liiɓa kɛɛ nwɔ kwələ hvəə; gu hvo pa kɛ lɔ túwɔ́i a kɔlɔ liiɓa. 13Mąąhɔlɔɓo, ka kɛli yɛnɛ̨ɛ̨ kɛ a kɔlɔ liiɓa, ka haa. Kɛlaa, Gilii ŋɛ̨i Yálá ə dɛɛ ka pɔ ɉaala, ka kɔ́lɔ liiɓa kɛɛ lɛɛ laa, ka yɛnɛ̨ɛ̨ hɔlɔɓo. 14A tɛ̨ą, nuąi Yálá nwɔ Kilii a di tənən dɔɔ, diɛ ɓə a Yálá lonni. 15Mąąhɔlɔɓo, Gilii ŋɛ̨i ka ɉɔlɔɓo, hvo a luwɔ kili, yɛ pənə yɛ ɲɔw lɔ ka hu, káá nwɔ̨nɔ̨ kɛ la a ɲɔw nuą. Kɛlaa, Gilii ŋɛ̨i Yálá ə dɛɛ ka pɔ ka kɛ a nwɔ ɲąąkɔn nonnii, yaa ɉáálai ɓə gwa tomąi la, guɔ kɛ mą: Aba, mukulaa ɓaa: Nąn! 16Gilii tii yaa kpinįi ɓə a nɛ gu nįį pɔ, yɛ gu kaa a Yálá lonnii. 17Yii kani gu kaa a nonnii, gu kaa kani a gwɛlin ɉɔlɔɓo nuą, gwa Kristə ta ni gu kaa a Yálá kwɛlin ɉɔlɔɓo nuą; gbala ə tɔɔ, yii gu gu wɔɔ hɔlɔɓo nwɔ mɔ̨nɔ̨i hu, gu kaa lɔ pai gu wɔɔ nąą hɔlɔɓoi mąąɲįnɛ̨n ɉu.
Mąąwiɛlaai gaa pai
18Ŋą́ gɔlɔn gɛ́ diɛ: Mąąwiɛlaai gaa gu mąą kpɔn ɉi, gɛnɛ̨ɛi dɛɛ mɔ̨nɔ̨i gu kaa mįi yiihu mą. 19Mąąhɔlɔɓo, pɛli hɛnŋaa kəlee liihɛlɛŋąai diɛ; Yálá lonnii mąą mɛ̨nį too yələ ponoŋą mąąkpɔn. 20Pɛli hɛnŋaai daa too kpɛli-kpɛli mɛ̨nį yeekɔnma, di hvo naali di kwəi; kɛlaa, ɉɛn tii di ɲąąhɛn, gɛ tíi li. Kɛlaa ə mą kɛ tii, kilitɔɔmąąlaa kaa lɔ ni di yəi. 21Mąąhɔlɔɓo, di nwun mąą kaa pai ɓoi, di kulɔ di naa nɔ̨nwɔ̨ɓomun ɲəi, ə gɛ, lɛɛ gbɔwɔlaa da mąąwiɛlaai Yálá lonnii kaa pai ɉɔlɔɓoi, di di nwɔ nąą hɔlɔɓo ɉu. 22Gu gɔlɔn, Yálá nwɔ pɛli hɛnŋąa kaa mɔ̨nɔ̨ mįi yɛ pələi Nɛ̨ɛ̨nu a mɔ̨nɔ̨ mįi la kwəi nwąną hu. 23Yɛnɛ̨ɛ̨ yaa tɔ̨nɔ̨ lɔ hvəə, guɔi ŋɛ̨i gwaa Kili-Mąąhəɠɛɛ hɔlɔɓo tɔlɔɔ, guɔ kpɛli gu kaa lɔ mɔ̨nɔ̨ mįi gu hu pələ, guɔ kɛ diɛ: Yálá ə pa kɛa ə gu kɛ a nonnii, ɛlɛɛ, ə gu kɔlɔ nwun mąąɓo. 24Mąąhɔlɔɓo, gu nwun mąąɓoɔi, kɛlaa, kilitɔɔ mąą woo lɔ li. Mɛ̨nįi nu kilitɔɔ mą, yá kɛli kɛa gaa, kilitɔɔmąą hvə li. Mɛ̨nįi nu ɲɛ̨i a gaai, yá ə́ kilitɔɔ kɛa mą ləi? 25Kɛlaa, mɛ̨nįi hvó gaai, ə́ ɲɛ̨i yɛ ɓo dɔwɔ a nwala walaa, ya ɓə a kilitɔɔmąąlaa.
26Bələi tii ɓə, Kili-Mąąhəɠɛɛ a kpɔnmąą tɛɛ la gu wɔ hvįikpɛɛlaa pɔ. Mąąhɔlɔɓo, gu hva Yálá hvɛli yɛ bələi mąąnɛ̨ɛ̨ la. Kɛlaa, Gilii yaa kpįnįi ɓə a kɛ wɔlɔi, yɛ ɲįŋɛ̨ gu mąą mɛ̨nį ɓa, a wooɠaai gu hva pɛli moi. 27Ɛlɛɛ, nui nu kwəi mɛ̨nį kɔ́lɔn, mɛ̨nįi Kili-Mąąhəɠɛɛ kaa bɔ, ə gɔlɔn. Mɛ̨nįi Kili-Mąąhəɠɛɛ a ɉu hvɛli, nu mąąhəɠɛɛɠaa mąą mɛ̨nį ɓa, ya ɓə Yálá kaa bɔ.
28Gu gɔlɔn nwɔ̨nɔ̨ guɔ diɛ: Nuąi da Yálá wɛlilakɛ, di mąąkpɔnmąą ɓo mɛ̨nį kaa mɛ̨nį kəlee hu; a diɛi tii ə di həɠə ɉu, yɛ bələi nwɔ mɛ̨nį pɛliɛ kaa la. 29Mąąhɔlɔɓo, nuąi ə gbɛa di kɔ́lɔn, aa gbɛa kɛ di həɠə ɉu, diɛ kɛ yɛ non, ə gɛ, yili yɛ kɛ a nu kpulu tamąą di liɛ. 30Nuąi ə di təli, ə gbɛa di həɠə ɉu, yiiɠaai ə di təli, ə di kɛ a tələnmo nuą, nuąi ə di kɛ a tələnmo nuą, ə mąąɲįnɛ̨n gɛ lɔ nwɔ̨nɔ̨ diɛ.
Yálá nwɔ wɛlikɛmąąlaa kɛnɛ̨ɛ̨i
31Lə mɛ̨nį ɓə gwa pɛli nwɔ̨nɔ̨ moi? Akɛ Yálá tɔɔi gu pulu, gbɛɛ ɓə a pɛli kɔ́ pɛlɛi guɔ? 32Yai ti hvo gbɔ-kpɔɔ lon mąąwɛli kaa li, kɛlaa, ə gwɛlɛ gu mąą mɛ̨nį ɓa, lə kpɔɔ ɓə hva pɛli dɛɛi gu pɔ non ɉaalai? 33Nuąi Ə di həɠə ɉu, gbɛɛ ɓə a pɛli hɔn moi? Mąą nu hvo mą. Yálá ɓə di kɛ a tələnmo nuą. 34Gbɛɛ ɓə a pɛli di nwun na pili? Yaan, Jesus Kristə ə haa, ə pənə kpɔ nwɔ̨nɔ̨ ə nwun, gaa heeni Yálá ɓámįiyee hu pələ, yɛ Yálá hvɛli guɔ. 35Lə ɓə a pɛli gu kulɔi Kristə nwɔ wɛlikɛmąąlaa hu? Ɛ̨i, mɔ̨nɔ̨ ɓə? Liikələn gwəi ɓə? Ɓɛlɛkpɛɛmąąlaa ɓə? Pulu ɓə? Yee-howololaa ɓə? Mɛ̨nį ɲąąnwąnąą ɓə? A wala kɛti, haa? 36Yɛ bələi Yálá lawoo hɛɓɛ́ ə mo la, yɛ mą:
«Ə́ mąą mɛ̨nį ɓə da tuwɔ ku paai la,
diɛ ku hon yɛ ɓɛlaa lonnii di kaa lii di paai.»
37Kɛlaa, yili kəlee hu, yeetɛɛmąąlaa kaa ku yəi, nui ku wɛlila kɛ ɉaalai. 38A tɛ̨ą, náái na gɛ́, haa ɓə, yɛnɛ̨ɛ̨ kɛɛ ɓə, malakaɠaa ɓə, heemɛ̨ilaa ɓə, háákələi ɓə, tinąą ɓə, huwalawalaɠaa ɓə, 39ə mą kɛ, huwalawalaaɠaai gaa yələ kwəi, ə mą kɛ yiiɠaai lɔi mu pələ, da pɛli-hɛn nɔpee takpɛliɠaa; nwɛlikɛmąąlaai Yálá aa nɛ guɔ gu Ną́mu Jesus Kristə hu, ɉɛŋąai ti ta hva gu kulɔ nwɛlikɛmąąlaa ti yəi.
നിലവിൽ തിരഞ്ഞെടുത്തിരിക്കുന്നു:
Romə 8: BKPDCG
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
