Korɛntə dɔlɔɔ 2
2
Kili-kɛ-ɲəi da ɓowo Polə ŋą kalan gɛ woo hu Korɛntə
1Ɲą́ą́ gbinįlee pai ŋį́ mo ká pɔɔli ną́n nonnii, və́ kɛ pa li və́ Yálá ŋą mɛ̨nį loɔ laa həli káá a gbąnąlaa woo, awala kɛ tii, kili ɲą kulɔ woo. 2Mąąhɔlɔɓo, ŋą́ naa gwə́i, gɛ́, və́ mɛ̨nį takpɛli mɛ̨n ka lɔwai, hvo kɛli lɔ Jesus Kristə mąą mɛ̨nį, a Jesus Kristə, yai di gbɔn kolɔwa ɓa, mąą mɛ̨nį. 3Yili ɓə gɛ, ŋą́ kɛ ka lɔwai yɛ nu hvįikpɛɛ, gɛ́ ɲɔw, mąą yɛ kpɛlin. 4Nwóó da nwɔ́ nuą mąąkwɛli pələ, di hvo kɛ a gbąnąlaa kili, kɛlaa, di kɛ a Yálá ŋą Kilii nwɔ huwalawala ŋą mɛ̨nį lɛ pələ; 5ə gɛ, ká wɔ laa na laa kɔ́wɔ hvo pa kɛ a vilɛnŋąą nuą di wɔ kilikɛɲəi laa mɛ̨i, kɛlaa, gɔwɔ ə hvilɛn Yálá ŋą huwalawalalaa mɛ̨i.
Yálá nwɔ kilikɛɲəi laa
6Kɛlaa gaa kpɔ pa a tɛ̨ą, kilikɛɲəi laa ɓə ku kaa nɛi Kristalɛa diɛ, a diɛi daa di kpɛlaan ɉee. Gilikɛɲəi laa yili, hvo a ɲɛ̨nɛ̨ɛ̨ ŋɛ̨i nwɔɔ, ə mą kɛ a ɲɛnɛ̨ɛ̨ ŋɛ̨i hu tɔɔɓɛlaa di wɔɔ, yai naa kulɔi ɓaa a nwun na pili. 7Yálá ŋą kilikɛɲəi laa ɓə ku kaa naa həlii, gaa a kwɛlɛɛn mɛ̨nį, noɔ, yai Yálá ə wɔlɔ bɛli, yɛnɛ̨ɛ̨ kɔ́wɔ hvo ni kɛ tɔɔ li, a guɔi ə gu həɠə ɉu, a gu mąąɲįnɛ̨n. 8Ɲɛnɛ̨ɛ̨ ŋɛ̨i hu tɔɔɓɛlaa danɔ̨n gbɛli hvo kɛ gɔlɔn; hvo gaai, da gɔlɔn gɛ, di hvo li kɛ mąąwiɛlaa Ną́mu kpɔn kolɔwa ɓa. 9Kɛlaa, yɛ bələi bɛ̨ɛ̨i la, diɛ kɛ:
«Mɛ̨nį lɛlɛɛɠaai Yálá aa bɛli nwɛlikɛmąą nuą mąą mɛ̨nį ɓa,
ɲɛ̨i kɔ́w ta hvo ni gaa li; hvə ni too li wəli ta hu,
ɛlɛɛ, mąą gili hvo ni too li nu kan ɲą.»
10Yaan, guɔ ɓə Yálá ə nɛ guɔ, nwɔ Kilii háálai. Hvo gaai, Yálá nwɔ Kilii ɓə a mɛ̨nį kəlee hukpɛ, ə mą kɛ, Yálá nwɔ mɛ̨nį pɛliɛɠaa. 11Gbɛɛ ɓə kani a pɛli nu hu pələ mɛ̨nį kɔlɔn ɉii, ə kulɔ lɔ, nu kpɔwɔ kilii gaa ɉu? Bələ lɔ ɓə gaa la, mɛ̨nįi Yálá kwəi, nu ta hvo gɔlɔn, hvo kɛli lɔ Yálá nwɔ Kilii. 12Gu wɛi, gu hvo kɛ yɛnɛ̨ɛ̨ kili hɔlɔɓo li, kɛlaa, kilii a həɠə Yálá pɔ; ə gɛ, gu pɛli Yálá nwɔ nɛ̨ɛ̨laa yəi mɛ̨inɛ̨ɛ̨ɠaa kɔlɔn ɉii. 13Kuɔn, ku hvo mɛ̨nį ta ɓoi a nu kan ŋą kilikɛɲəi woo, kɛlaa, ku kaa moi a Yálá nwɔ Kilii nwɔ mɛ̨nį lɛ pələ, kuɔ mo a Yálá nwɔ kili.
14Nui nu kan gili lɔ ɓə mą, mɛ̨nįi a həɠə Yálá nwɔ Kilii pɔ pələ, hva pɛli ɲee heei mu. Gbala ə tɔɔ, gaa ɲɛ̨i mu a ɓowo mɛ̨nį, hva pɛli gbaɠala kaai; mąąhɔlɔɓo, Yálá ŋą kilii hu ɓə da pɛli di mɛ̨nįɠaa ti hutɔɔ la. 15Nui Yálá nwɔ Kilii yee kɔnma nwɛi, a mɛ̨nį kəlee hutɔɔ, ɛlɛɛ, nu ta hva pɛli naa ɲɔ̨nwɔ̨ɔ̨ ɓoi. 16Mąąhɔlɔɓo, gbɛɛ ɓə Yálá kiliŋąhiɛ kɔ́lɔn, yɛ pɛli gili tooi ɲəi? Kɛlaa, gu wɛi, Kristə nwɔ kiliŋąhiɛ ɓə gu yəi.
നിലവിൽ തിരഞ്ഞെടുത്തിരിക്കുന്നു:
Korɛntə dɔlɔɔ 2: BKPDCG
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക