JESOA ILAY MPANJAKA: fampaherezana ho an'ny Paska nosoratan'i Timothy KellerSantionany

"Fanasitranana lalina kokoa”

I Jesoa dia mahafantatra zavatra tsy fantatr’ilay lehilahy — manana olana lehibe kokoa noho ny toe-batany izy. Hoy i Jesoa taminy: “Azoko ireo olanao. Efa hitako ny fahorianao. Ho avy amin'izany aho. Kanefa aoka ho fantatrao fa ny olana lehibe indrindra eo amin’ny fiainan’ny olombelona iray dia tsy ny fijaliany velively; fa ny fahotany.”

Raha toa ka hitanao fa manafintohina ny valin-tenin’i Jesoa, mba diniho anie, fara faharatsiny, ity: Raha misy milaza aminao hoe: “Ny olana lehibe indrindra amin’ny fiainanao dia tsy ny zava-nitranga taminao, tsy ny nataon’ny olona taminao ihany koa; Ny olanao lehibe indrindra dia ilay fomba namalianao izany" - mahagaga fa manome hery izany. Nahoana? Satria tsy manam-pahefana amin'ny zava-nitranga taminao na amin'ny zavatra ataon'ny hafa ianao—fa kosa, afaka manao zavatra momba ny tenanao ianao. Rehefa miresaka momba ny ota ny Baiboly dia tsy ny zavatra ratsy ataontsika fotsiny ihany akory no resahiny. Tsy hoe lainga, ohatra, na fitsiriritana fotsiny izany —fa tsy firaharahiana an’Andriamanitra eto amin’izao tontolo izao nataoNy izany; ilay hoe tsy miaraka Aminy fa miaina tsy misy fifandraisana Aminy na amin'inona na amin'inona. Hoy izy io: “Izaho no hanapa-kevitra ny amin'ny fiainako.” Ary milaza i Jesoa fa izany no tena olana.

Nasehon’i Jesoa tamin’ilay malemy ny olany lehibe indrindra, tamin’ny alalan’ny fitarihana azy ho any amin'ny lalina kokoa. Hoy i Jesoa: “Raha manatona Ahy ianao ka mangataka Ahy ny hanasitrana ny vatanao, dia mila mandalina kokoa ianao. Nataonao tsinontsinona ny halalin’ny fanirianao, ny fanirian’ny fonao.” Rariny raha maniry ny handeha amin'ny heriny manontolo ireo rehetra malemy. Kanefa azo antoka fa ity lehilahy ity dia nametraka ny fanantenany rehetra tamin'ny fahafahana handeha indray. Ao am-pony izy, efa saika milaza ny hoe: “Raha mba afaka nandeha indray aho, dia efa natao hiaina. Ho faly lalandava aho, ary tsy hitaraina mihitsy. Raha mba afaka mandeha aho, dia hilamina amin'izay ny fiainako. Ary hoy i Jesoa: "Anaka, diso ianao." Mety hoe enjana, saingy tena marina izany. Hoy i Jesoa: “Rehefa manasitrana ny vatanao Aho, raha izany ihany no ataoko, dia ho tsapanao fa ho faly lalandava ianao. Saingy afaka roa volana, efa-bolana - dia tsy haharitra izany hafaliana izany. Lalina ny fototry ny tsy fahafaham-pon’ny olombelona”.

Nahoana ny famelan-keloka no tena nilain’ilay malemy? Nahoana izany no tena ilaintsika indrindra? Inona koa no “filàna” hafa tsapantsika fa lalina kokoa noho ny filantsika famelan-keloka?


Sombiny avy amin'ny JESOA ILAY MPANJAKA, nosoratan'i Timothy Keller
Natonta tamin'ny fifanarahana niaraka tamin'ny Riverhead Books, izay mpikambana amin'ny Penguin Group (USA) LLC, Pengui Random House Cmpany. Copyright 2011 by Timothy Keller

Ary avy amin'ny TOROHEVITRA FIANARANA JESOA ILAY MPANJAKA nosoratan'i Timothy Keller sy Spence Shelton, Copyright (c) 2015 by Zondervan, a division of Harper Collins Christians Publishers.