Tobia 6
6
6. Ilay hazandrano
1Dia lasa i Tobia, nanaraka azy ny alika; ary teo amin’ny ony Tigra#6,1 Tigra: ony lehibe izay miandoha any amin’ny tendrombohitr’i Armenia, dia mandeha mamaky ny lemak’i Mesôpôtamia. no nijanonany voalohany. 2Nidina ndeha hanasa tongotra kosa izy ka inty nisy hazandrano makadiry, niantoraka handrapaka azy#6,2 Niantoraka handrapaka azy: Izany hoe, nikasa handrapaka ny tongotr’ilay tovolahy.. 3Nivadika ny fon’i Tobia, ka niantso mafy izy nanao hoe: «Iantsampazany aho, tompoko!» 4Fa hoy ity Anjely taminy: «Raiso amin’ny sofiny io, ka tariho ho eo aminao.» Dia nataony izany: notarihiny ho eny an-tanety ilay hazandrano, ka inty nihavatravatra teo an-tongony. 5Ary hoy ilay Anjely taminy: «Esory ny taovan’io hazandrano io, ka tahirizo ny fony sy ny àty aman’aferony, fa fanao fanafody tsara.» 6Notoviny izany, dia natonony ny sasany amin’ny nofony, ka nentiny teo aminy eny an-dalana, ary nasiany sira ny sisa, izay tsy maintsy hahavita azy ireo, mandra-pahatongany any Ragesa, tanànan’i Meda. 7Fa nanontany an’ity Anjely i Tobia nanao hoe: «Raha sitrakao, ry Azariasa rahalahiko, mba lazao ahy kely: manan-kery hahasitrana inona moa ireto zavatra avy amin’ny hazandrano nasainao tahiriziko ireto?» 8Ka hoy ilay Anjely namaly azy: «Raha sombiny kely amin’ny fony no apetrakao eo ambony vain’afo, dia maharoaka ny demony isan-karazany amin-dehilahy na amim-behivavy, ny setroka avy amin’izay, ka tsy afa-manatona an’ireo intsony izy. 9Ary ny aferony kosa dia fanosotra ny maso voasarona fotsy matevina, ka mahasitrana azy.»
10Dia hoy i Tobia taminy: «Aiza no tianao hialantsika sasatra?» 11Ary hoy ny Anjely namaly azy: «Eto misy lehilahy anankiray atao hoe: Ragoela, iray foko amam-pianakaviana aminao, manan-janaka vavy anankiray atao hoe Sarà izy; ary tsy manan-janaka hafa, afa-tsy izay, na lahy na vavy. 12Tsy maintsy ho lasanao avokoa ny fananany rehetra#6,12 Tsy maintsy ho lasanao avokoa ny fananany rehetra: Satria araka ny lalàna, ny zazavavy (mandova) dia tsy maintsy manambady lehilahy iray ao amin’ny fianakaviany. Jereo Fanis 27,8; 36,6-12, ka ampitahao amin’ny Deter 25,6; Rot 4,4. ka tsy maintsy halainao ho vady izy. 13Ka angataho amin-drainy izy, fa homeny anao ho vadinao.» 14Dia hoy ny navalin’i Tobia: «Nandre lazan’olona aho fa hoe: Fito lahy no efa nanambady azy izay, nefa maty avokoa; sady demony koa indray no lazain’olona tamiko ho namono an’ireo. 15Ka matahotra aho fandrao dia iharan’izany koa ny tenako, ary noho izaho lahitokan-dray aman-dreniko, sao dia mampidina ny fahanteran’izy ireo amin’alahelo any am-pasana.» 16Ary hoy ny Anjely Rafaely taminy: «Mihainoa ahy, fa hatoroko anao izay ananan’ny demony fahefana. 17Dia izay miditra amin’ny fanambadiana, nefa mamoaka an’Andriamanitra hiala ao am-pony sy ao an-tsainy mba hanarana ny filan’ny nofony, toy ny soavaly ama-mole tsy manan-tsaina; ireny no ananan’ny demony fahefana. 18Fa ianao kosa, rehefa manambady azy, dia midira ao an’efitrano, ary miaraha-mitoetra aminy amim-pahadiovana mandritra ny hateloana, ka aza mihevitra na inona na inona, afa-tsy ny fiaraha-mivavaka aminy. 19Amin’ny alina voalohany, ataovy amin’ny afo ny atin’ny hazandrano, dia handositra ny demony. 20Amin’ny alina faharoa, dia ho voaray ho isan’ny fikambanan’ny patriarka masina ianao. 21Amin’ny alina fahatelo dia horaisinao ny tso-drano nampanantenaina ny taranany hiterahanareo zanaka matanjaka. Rehefa afaka ny alina fahatelo dia raiso amim-pahatahorana ny Tompo razazavavy, ka aoka ny fanirian-janaka no hitarika anao fa tsy ny filan’ny nofo, mba hahazoanao ao amin’ny zanakao, ny tso-drano nampanantenaina ny taranak’i Abrahama#6,20-21 Amin’ny alina faharoa sy fahatelo dia mbola hifady ny asan’ny nofo ihany, ka tsy hihevitra afa-tsy ny fivavahana sy ny asan’ny Fanahy, ka amin’izany dia hahazo ny tso-drano toy ireo patriarka, izany hoe taranaka marobe..»
Voafantina amin'izao fotoana izao:
Tobia 6: MBC
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.