Jôba 28
28
4. FIDERANA NY FAHENDRENA
Ny fahendrena, tsy tratry ny sain’olombelona
1Misy toerana ihadiam-bolafotsy,
misy toerana fanadiovam-bolamena.
2Ny vy alaina avy amin’ny tany;
ny vato arendrika hahazoana varahina.
3Mampisava ny haizina ny olona,
hatrany anatin’ny hantsana izy no mikaroka
ny vato miafina ao amin’ny haizina sy ny aloky ny fahafatesana#28,3 Aloky ny fahafatesana: na hoe: Haizim-pito..
4Mihady lalana izy lavitry ny tany onenana,
tsy fantatry ny tongotry ny velona;
tafahantona mitsingevaheva lavitry ny olombelona.
5Ny tany iavian’ny hanina,
voakorontana àty toa voan’ny afo.
6Ny vatony no itoeran’ny safira,
sy ahitana vovo-bolamena.
7Ny vorom-pihaza tsy mahita ny lalana any,
ny masom-papango tsy mahatazana azy;
8ny biby dia tsy nandia izany,
ny liona koa tsy nandalo tany na oviana na oviana.
9Ny olombelona maninji-tanana amin’ny vatomainty,
manozongozona ny tendrombohitra hatramin’ny fotony#28,4-9 Ny asan’ny mpihady vatosoa anatin’ny tany no lazalazain’i Jôba eto. Ireo mpiasa ireo manakorontana ny tany ao anatiny, manisy lalana any ambaniny, hazavainy amin’ny fanilo; tsy azo ambolena intsony izany tany izany...;
10mandavaka lalana anatin’ny vatolampy;
tsy misy zava-tsarobidy tsy hitan’ny masony.
11Mahay manampina ny rano manamika Izy,
ary mitondra ny miafina rehetra ho eo amin’ny mazava.
12Fa aiza kosa no ahitana ny fahendrena#28,12 Aiza no ahitana ny fahendrena. Ny fahendrena lazaina eto, dia atao ho Olona. Izy no ahavitan’Andriamanitra ny asany rehetra. Izy no mahalala ny hevitra rehetra miafina ao amin’Andriamanitra. Dia ny olona faharoa amin’ny Trinité Masina izany.?
Aiza no fitoeran’ny fahalalana?
13Ny olombelona tsy mahay manombana azy;
ny tanin’ny velona tsy ahitana azy.
14Fa hoy ny hantsana: ‹Tsy ato anatiko izy›;
ny ranomasina milaza hoe: ‹Tsy atỳ amiko izy›.
15Ny volamena madio tsy mahatakalo azy,
na lanjam-bolafotsy ohatrinona aza tsy mahavidy azy.
16Tsy ampifandanjaina amin’ny volamena avy any Ofira izy,
na ny berila sarobidy na ny safira.
17Ny volamena amam-pitaratra tsy azo ampitahaina aminy;
ny kapoaka volamena madio tsy mahatakalo azy.
18Ny voahangy amam-batomazava, tsy mendrika hotononina akory,
fa mihoatra noho ny voahangy ny fahazoana ny fahendrena.
19Ny tôpazy avy any Etiôpia tsy mahatoraka azy,
ary ny volamena madio tsy mahatratra ny vidiny.
20Koa avy aiza àry ny fahendrena?
Aiza ny fitoeran’ny fahalalana?
21Miafina amin’ny mason’ny velona rehetra izy,
ary takona amin’ny voron’ny lanitra.
22Hoy ny ambanin’ny tany sy ny fahafatesana:
‹Filazana azy fotsiny no mba renay›.
23Andriamanitra no mahalala ny lalana mankany aminy;
Izy no mahafantatra izay misy azy.
24Fa Izy mahita ny hatrany amin’ny fara vazantany,
mahatsinjo ny ambany lanitra rehetra.
25Fony Izy nandamina ny lanjan’ny rivotra,
nanao ny rano tao amin’ny mizàna,
26namoaka lalàna ho an’ny ranonorana,
nanori-dalana ho an’ny tselatry ny varatra,
27dia nahita sy nilaza azy Izy,
namorona azy sy nahatakatra ny zava-miafina ao aminy.
28Izay Izy vao nilaza tamin’ny olombelona nanao hoe:
‹Ny fahatahorana ny Tompo, dia izay no fahendrena#28,28 Ny fahatahorana ny Tompo dia izay no fahendrena: Izany hoe ny toe-panahy tsara ananan’ny olona matahotra an’Andriamanitra.,
ny mandositra ny ratsy, dia izay no fahalalana› ».
Voafantina amin'izao fotoana izao:
Jôba 28: MBC
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.