Ezekiela 22
22
Ireo helok’i Jerosalema
(Jereo Ezek 16; 20; 23)
1Tonga tamiko ny tenin’i Iaveh, nanao hoe:
2Ary ianao, ry zanak’olona, moa hitsara va ianao; moa hitsara ny tanàna mpandatsa-dra va ianao? Ampahafantaro azy avokoa ny fahavetavetany; 3ka ataovy hoe: Izao no lazain’ny Tompo Iaveh: Ry tanana mpandatsa-dra ao anatiny, hahatonga ny fotoany#22,3 Hahatonga ny fotoany: Hoatry ny mikendry izay hahafaingana ny fotoana hanasaziana azy izy io amin’ny fampitomboana ny fahotany. sy mivongika sampy vetaveta hahaloto azy. 4Tonga meloka ianao, tamin’ny ra nalatsakao, nandoto tena tamin’ny sampy vetaveta nataonao; ary nanafaingana ny andronao tamin’izany ka tonga amin’ny fara taonanao; izany no nanaovako anao ho fandàtsan’ny firenena amam-pihomehezan’ny tany rehetra. 5Na ny akaiky, na ny lavitra, samy hanebaka anao, voaloto anarana sy be tabataba.
6Indreto ny lehiben’i Israely, eo aminao, fa samy mikezaka ny handatsa-dra, araka ny heriny avy. 7Ao aminao, ny ray aman-dreniny, tsiratsiraina; ao anatinao, ny vahiny, levilevena; ao aminao ny kamboty ama-mpitondratena, amam-pahoriana. 8Ny fitoerako masina, hamavoinao; ny sabatako, tevatevainao. 9Ao aminao, misy olona manendrikendrika, mba handatsa-dra; ao aminao, misy mihinana eny an-tendrombohitra#22,9 Mihinana eny an-tendrombohitra. Fomban-dry zareo mpanompo sampy rehefa avy nanatitra sorona tamin’ny sampiny dia manao fihinanam-be arahin’ny hamamoana sy fahalotoana.; ao anatinao, misy manao heloka be vava. 10Ao aminao, misy manokatra ny fitanjahan-drainy; ao aminao misy manao an-keriny amin’ny mararin’ny fadim-bolana. 11Ny iray, manao fahavetavetana amin’ny vadin’ny namany; ny iray hafa, mifotitra mandoto ny vinantovaviny ao aminao; ary misy koa mametaveta ny anabaviny zanaka vavin-drainy. 12Ao aminao, misy mandray kolikoly handatsa-dra; manao zana-bola#22,12 Maka zana-bola. Ny fampisamboram-bola misy zanany, dia azon’ny Jody natao tamin’ny olon-kafa; fa raha samy izy Jody ihany, dia tsy azony natao izany (Eks 22,24; Lev 25,36 sy ny manaraka; Deter 23,20 sy ny manaraka). be loatra ianao, sady maka zana-bola, sy miharaka ny haren’ny namanao; ary Izaho hadinonao, - teny marin’ny Tompo Iaveh. -
13Indro Aho miteha-tanana, noho ny tombony azonao tsy an-drariny, sy noho ny ra izay eo aminao. 14Moa hahazaka va ny fonao ary hahatoha ihany va ny tananao, amin’ny andro hiasako hamely anao? Izaho Iaveh no nilaza ka hanatanteraka. 15Haeliko any amin’ny firenena ianao, sy hahahako any amin’ny tany samihafa, ary hesoriko ho afaka aminao ny lotonao rehetra; 16ka eo aminao ianao ho voaloto eo imason’ny firenena, dia ho fantatrao fa Iaveh Aho.
17Tonga tamiko ny tenin’i Iaveh, nanao hoe: 18Ry zanak’olona, amiko ny taranak’i Israely, dia efa niova ho tain-drendrika; izy rehetra dia varahina, fira-potsy, vy, ary fira-mainty ao anatin’ny memy; zary taim-bolafotsy izy. 19Koa izao no lazain’ny Tompo Iaveh: Noho ianareo rehetra tonga taim-bolafotsy, noho izany, dia indro, hangoniko eo afovoan’i Jerosalema, ianareo. 20Toy ny fanangon’ny olona volafotsy, varahina, vy, fira-mainty, fira-potsy, ao afovoan’ny memy sy hofoforina harendrika, no hanangonako anareo, amin’ny fahatezerako amam-pahavinirako; hataoko ao ianareo ary hataoko rendrika. 21Hanangona sy hifofotra anareo amin’ny afon’ny fahatezerako Aho, ka ho voarendrika ao afovoan’i Jerosalema ianareo. 22Toy ny fandrendrehana volafotsy ao anaty memy no hahavoarendrika anareo ao afovoany, dia ho fantatrareo fa Izaho Iaveh, nampidina ny fahatezerako taminareo.
23Tonga tamiko ny tenin’i Iaveh, nanao hoe:
24Ry zanak’olona, lazao aminy hoe: Tany tsy voadio ianao, tsy voasasan’ny ranonorana, tamin’ny andron’ny fahatezerana. 25Misy firaisan-tetiky ny mpaminaniny#22,25 Firaisan-tetiky ny mpaminaniny: Ny mpaminany sandoka izay nitady hamitaka sy hifetsy. eo afovoany. Toy ny liona mierona mamiravira ny hazany, dia mihinana ny fanahy izy ireo#22,25 Mihinana ny fanahy izy ireo: Amin’ny fitarihana ny olona amin’ny hadisoan-kevitra.; mifaoka ny fananana sy ny rakitra, mampitonbo isa ny mpitondratenany#22,25 Mampitombo isa ny mpitondratena: Amin’ny teniny feno lainga, dia amporisihiny aoka izany erỳ ny vahoaka amin’ny zavatra mampidi-doza, ohatra ny ady amin’ny Kaldeanina, izay faharavan’ny firenena no ho voka-dratsy aterany. eo afovoany. 26Ny mpisorony, nandika ny lalàko, nandoto ny fitoerako masina; tsy manavaka ny masina sy ny tsy masina; tsy mampianatra ny mahasamy hafa ny maloto sy ny madio, mamily maso tsy hijery ny sabatako; ary tsiratsiraina Aho, eo afovoan’izy ireo. 27Ny lehibeny, eo afovoany, toy ny amboadia mamiravira haza, dia mandatsa-dra, mahavery fanahy hahazoana tombony. 28Ny mpaminany manarontsarona izany heloka rehetra izany, mahita fahitana zava-poana amam-paminaniana lainga, milaza hoe: Izao no lazain’ny Tompo Iaveh, nefa i Iaveh tsy niteny tsinona. 29Ny vahoaka amin’ny tany manao an-keriny, mandroba lava, manitsakitsaka ny ory sy ny mahantra, ary mampahory tsy an-drariny ny vahiny. 30Nitady Aho, raha misy olona eo aminy, manao manda#22,30 Olona... manao manda: Olona izay mampitony ny hatezerako sy mampitsahatra ny vokatr’izany, amin’ny fivavahany sy ny hatsaram-panahiny, tahaka an’i Abrahama izay nanandrana nangataka ho an’i Sôdôma, ary i Môizy sy i Aarôna mbamin’ny Finea nifona ho an’ny Israelita (Jen 18,23 sy ny manaraka; Eks 32,11 sy ny manaraka). sy mitsangana eo amin’ny banga, eo anatrehako, hiaro ny tany mba tsy handravako azy, nefa tsy nahita Aho. 31Ka dia naidiko teo aminy, ny fahatezerako; nolevoniko tamin’ny afon’ny hatezerako izy; natsingeriko teo an-dohany, izay nataony, - teny marin’ny Tompo Iaveh. -
Voafantina amin'izao fotoana izao:
Ezekiela 22: MBC
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.