Ezekiela 15
15
Fanoharana amin’ny foto-boaloboka
(Jereo Iz 5,1)
1Tonga tamiko ny tenin’i Iaveh nanao hoe#15,1-5 Nanao hoe. Ny foto-boaloboka izay tsy mamoa dia faikany amin’ny hazo rehetra tsy misy antony ilàna ny tahony, na dia kely akory aza, fa dorana. Toy izany koa i Israely mpivadika dia latsaka ambany noho ny mpanompo sampy ka tsy tokony hanampò ho afaka amin’ny fandravana azy rehetra izy. Ny fampitahana an’i Israely amin’ny foto-boaloboka dia jereo Jer 2,21; 17,6; Iz 3,14; 5,1 sy ny manaraka; Os 10,1; Sal 80,9.:
2Ry zanak’olona,
Inona no ihoaran’ny tahom-boaloboka,
noho ny tahon’ny hazo hafa rehetra,
noho ny rantsan-kazo
izay isan’ireo hazo any an’ala?
3Moa mba fangalàn-kazo, hanaovan-javatra va izy?
Na mba fangalana hombo hanantonan-javatra akory?
4Atao ao anaty afo izy, holevoniny,
dia levon’ny afo ny laniny roa;
may koa ny tenantenany;
ka azo atao inona indray izy?
5Fony mbola tsy nahafahana aza izy,
tsy azo nanaovana na inona na inona;
ka mainka rehefa kila sy main’ny afo,
ho azo atao inona intsony?
6Ka izao no lazain’ny Tompo Iaveh:
toy ny tahom-boaloboka any amin’ny hazo an’ala,
izay hazo atolotra ho levon’ny afo,
no hanolorako ny mponina ao Jerosalema.
7Hitodika hanandrina azy ny Tavako;
afa-nandositra ny afo izy, nefa levon’ny afo ihany indray;
dia ho fantatrareo fa Iaveh Aho,
rehefa atodiko hanandrina azy ireo ny Tavako.
8Ary ataoko zary efitra ny tany,
noho izy ireo nivadika;
- teny marin’i Iaveh Tompo. -
Voafantina amin'izao fotoana izao:
Ezekiela 15: MBC
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.