2Samoela 23
23
Fara tenin’i Davida
(Jereo 1Tan 2,2-9)
1Izao no fara tenin’i Davida:
«Zava-marina nambaran’i Davida zanak’i Isaia,
tenin’ilay lehilahy mipetraka amin’ny toerana ambony,
ilay voahosotry ny Andriamanitr’i Jakôba,
ilay mpanao hiran’i Israely mahatehotia.
2Ny fanahin’i Iaveh no niteny tamin’ny alalako,
ary ny teniny no eo amin’ny vavako.
3Ny Andriamanitr’i Israely niteny,
ny Vatolampin’i Israely niteny:
Olo-marina mpanapaka ny olombelona#23,3 Olo-marina mpanapaka ny olombelona: Ny Mesia no lazaina amin’izany teny izany: jereo Iz 11,3. - Ny fahatahorana an’Andriamanitra no anisan’ny toetra manavaka Azy indrindra. 8-39. Jereo 1Tan 11, 11-41.
izay manapaka amim-pahatahorana an’Andriamanitra,
4dia toy ny fahazavan’ny maraina raha miposaka ny masoandro,
toy ny andro maraina tsy misy rahona!
Ny tsirim-pahazavany manarakaraka ny ranonorana
no itsimohan’ny ahitra amin’ny tany.
5Tsy toy izany va ny fianakaviako amin’Andriamanitra?
Satria fanekena mandrakizay no nataony tamiko,
voalamina sy voatandrina tsara indrindra;
ka hampitsimohiny tokoa ny famonjena ahy rehetra
sy ny sitraky ny fony rehetra.
6Fa ny olon’i Beliala rehetra kosa, dia toy ny tsilo arian’ny olona:
tsy fandrain-tanana izy;
7fa tsy maintsy mitondra vy na zaran-defona izay olona mikasika azy;
ary dorana amin’ny afo eo ihany izy.»
Ireo mahery fon’i Davida
(Jereo 1Tan 11,11-14; 1Tan 27,2-15)
8Izao no anaran’ny lehilahy mahery izay eo amin’i Davida: i Jesboama zanak’i Hakamonì, no filohan’ny manamboninahitra. Nampandihy ny lefony tamin’ny olona 800 lahy, izay nataony maty tamin’ny indray mandeha monja, izy. 9Ny manarakaraka azy dia i Eleazara zanak’i Dôdao zanak’i Ahôhỳ. Io no anankiray amin’izy telo lahy mahery niaraka tamin’i Davida raha ilay nihaika ny Filistinina tafakambana mba hiady iny izy ireo, 10fa niakatra nihemotra kosa ny lehilahy amin’i Israely. Nitsangana namely ny Filistinina izy mandra-pahavizan’ny tanany, sy efa nihidy velona tamin’ny sabatra. Nanao famonjen-dehibe i Iaveh tamin’izay andro izay, ka nandroso indray nanaraka an’i Eleazara ny vahoaka fa tsy nanao afa-tsy ny manangona ny zavatra babo izy ireo.
11Manarakaraka io, dia i Semà, zanak’i Age, Hararita. Tafakambana ho antokony iray ny Filistinina; nisy toerana anankiray, feno voanemba maniry teo, ary vaky nandositra teo anoloan’ny Filistinina ny vahoaka. 12Fa lasa teo afovoan’io saha io i Semà, dia narovany tsy hidiran’ny Filistinina ary noreseny izy ireo. Ary nanao famonjen-dehibe i Iaveh.
13Tamin’ny Filistinina nitoby tao an-dohasahan’ny Refaima dia nisy telo lahy tamin’ireo Kapiteny 30, nidina nankany amin’i Davida, tao an-johin’i Odolama tamin’ny fotoam-pijinjana. 14Tao amin’ny trano mimanda i Davida#23,14 Tao an-trano mimanda i Davida: Trano mimanda namboarina tao amin’ny zohin’i Odolama., tamin’izay, ary nisy antoko-miaramilan’ny Filistina anankiray tao Betlehema. 15Nanam-paniriana i Davida, ka nanao hoe: «Iza no mba hampisotro ahy ny rano avy amin’ny famorian-drano ao am-bavahadin’i Betlehema?» 16Niaraka tamin’izay, dia namakivaky ny tobin’ny Filistinina ireto lehilahy mahery telo lahy, ka nanovo rano teo amin’ny famorian-drano ao am-bavahadin’i Betlehema; dia noraisiny sy nentiny nankeo amin’i Davida. Kanjo tsy nety nisotro i Davida fa nataony fanatitra araraka ho an’i Iaveh izany, fa hoy izy: 17«Sanatria ahy ny hanao izany, ry Iaveh ô! Satria inona ity fa tsy ny ran’ireo olona nandeha nanao vy very ny ainy!» Ka dia tsy nety nisotro izany izy. Izany no nataon’izy telo lahy mahery ireo.
18I Abisaia rahalahin’i Jôaba zanak’i Sarvià dia filohan’ny manamboninahitra koa. Nampandihy ny lefony tamin’ny lehilahy 300 lahy, ka nahafaty ireo, ka nahazo laza tamin’izy telo lahy ireo. 19Izy no malaza indrindra tamin’izy telo lahy#23,19 Tamin’izy telo lahy: Tokony atao hoe: Tamin’izy telopolo lahy: satria raha tsy izany, dia tsy mifanaraka amin’ny andininy 18, izay hoe: Filohan’ny telopolo lahy... ary nahazo laza tamin’izy 30. ireo ka lehiben’izy ireo. Nefa tsy nahomby irerỳ telo lahy voalohany izy.
20I Banaiasa zanak’i Jôiadasa zanaky ny lehilahy anankiray mahery sy naneho herim-po lehibe matetika, avy any Kabseela, dia namely ireo Ariela#23,20 Ariela (lionan’Andriamanitra) Anarana fanomen’ny Persa sy ny Arabo mandraka androany, ny mpiady izay tena mampiseho herim-po lehibe izany. roa lahy avy any Moaba. Indray andro, nisy oram-panala, dia nidina izy ka namely ilay liona tamin’ny lavaka famorian-drano. 21Namono ny Ejiptianina anankiray mahatsiravina endrika#23,21 Mahatsiravina endrika, na hoe, lehilahy ngezabe. izy; lefona no teny an-tanan’ilay Ejiptianina. Izy kosa nidina nankany aminy nitondra tehina, ary ny lefona teny an-tanan’ny Ejiptianina no notsoahany ka ny lefony ihany no namelezany azy. 22Izany no nataon’i Banaiasa, zanak’i Jôiadasa, 23ary nanan-daza tamin’izy telo lahy mahery izy#23,23 Ary nanan-daza tamin’izy telo lahy mahery izy. Mety raha atao hoe: tamin’izy 30 lahy.. Nalaza noho izy 30 lahy izy, nefa tsy nahomby azy telo lahy irerỳ izy. Noraisin’i Davida ho isan’ny mpanolo-tsaina azy izy.
24Isan’izy 30 lahy: i Asaela, rahalahin’i Jôaba; i Elkanàna, zanak’i Dôdao, avy any Betlehema; 25i Semà avy any Harôda; i Elikà avy any Harôda; 26i Helesa, avy any Falitỳ, i Hirà zanak’i Aksesa, avy any Tekoe; 27i Abiesera, avy any Anatôta; i Mebonaia, Hosatita; 28i Salmôna, Ahôhita; i Maharaia avy any Netôfah; 29i Heleda zanak’i Baanà, avy any Netôfah; i Etaia zanak’i Ribaia, avy any Gabaàn’ny taranak’i Benjamina; 30i Banaia, avy any Farataona; i Hedaia avy any an-dohasahan’i Gaasa, 31i Abi-Albôna, avy any Arabà; i Azmaveta avy any Bahorima; 32i Eliaba, avy any Salabôna; i Bene-Yasena; i Jonatàna; 33i Semà, haratita; i Ahiama, zanak’i Sarara, haratita; 34i Elifeleta, zanak’i Asbaia zana-Makatiana anankiray: i Eliama zanak’i Akitôfela, avy any Gilaô; 35i Hesraia avy any Karmela; i Faraia avy any Arbia; 36i Igaala zanak’i Natàna, avy any Sobà; i Bonì, avy any Gada. 37I Seleka, Amônita, i Nahanaia avy any Berôta, mpitondra fiadian’i Jôaba zanak’i Sarvià; 38i Irà, avy any Jetera; 39I Oria, Heteanina. 37 no totaliny#23,39 37 no totaliny: dia telo amin’ny kilasy voalohany, voalaza ao amin’ny andininy 8-23: 32 amin’ny kilasy fahatelo.
Voafantina amin'izao fotoana izao:
2Samoela 23: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.