رَوْمَا 2
2
اللّه يحاسِب بالحقّ
1وَ إِنْتَ التُّلُومْ النَّاسْ، كَنْ إِنْتَ تَبْقَى يَاتُو كُلَ، مَا عِنْدَكْ كَلَامْ. فِي الشَّيّءْ التُّلُومْ فَوْقَهْ نَادُمْ آخَرْ، إِنْتَ قَاعِدْ تُلُومْ نَفْسَكْ أَشَانْ إِنْتَ التُّلُومْ أَخُوكْ، قَاعِدْ تِسَوِّي نَفْس الشَّيّءْ مِثْلَهْ. 2لَاكِنْ نَعَرْفُوا اللّٰهْ يِحَاسِبْ بِالْحَقّ كُلَّ النَّاسْ الْيِسَوُّوا الذُّنُوبْ دَوْل.
3أَسْمَعْ، يَا نَادُمْ التُّلُومْ النَّاسْ وَ تِسَوِّي نَفْس الشَّيّءْ مِثِلْهُمْ، فِي فِكْرَكْ إِنْتَ تَنْجَى مِنْ حِسَابْ اللّٰهْ وَلَّا؟ 4تِدَوْر تَحْقِرْ خَيْر اللّٰهْ الْعَظِيمْ وَ صَبْرَهْ وَ طُولْ رُوحَهْ وَلَّا؟ مَا تَعَرِفْ كَدَرْ هُو قَاعِدْ يِسَوِّي لَيْك الْخَيْر أَشَانْ يِدَوْر يِوَدِّيكْ لِلتَّوْبَةْ وَلَّا؟ 5لَاكِنْ رَاسَكْ قَوِي وَ فِي قَلْبَكْ مَا تِدَوْر تُتُوبْ. وَ بَيْدَا، إِنْتَ قَاعِدْ تِزِيدْ الْعِقَابْ الْيَجِي فَوْقَكْ فِي يَوْم غَضَبْ اللّٰهْ. وَ دَا الْيَوْم الْاللّٰهْ يِحَاسِبْ فَوْقَهْ النَّاسْ بِالْحَقّ.
6فِي الْيَوْم دَا، اللّٰهْ يِجَازِي أَيِّ نَادُمْ حَسَبْ عَمَلَهْ السَّوَّاهْ. 7هُو يَنْطِي الْحَيَاةْ الْأَبَدِيَّةْ لِلنَّاسْ الْيِسَوُّوا الْخَيْر وَ يِفَتُّشُوا دَايْماً مِنْ اللّٰهْ الْمَجْد وَ الشَّرَفْ وَ الْحَيَاةْ الْمَا عِنْدَهَا حَدّ. 8لَاكِنْ النَّاسْ الْعَاصِيِينْ الْيَابَوْا الْحَقّ وَ يِتَابُعُوا الْفَسَالَةْ، زَعَلْ اللّٰهْ وَ غَضَبَهْ يَنْزُلُوا فَوْقهُمْ. 9اللّٰهْ يِنَزِّلْ تَعَبْ شَدِيدْ وَ عَذَابْ فِي أَيِّ إِنْسَانْ الْيِسَوِّي الْفَسَالَةْ، أَوَّلْ كَيْ فِي الْيَهُودْ وَ بَتَّانْ فِي الْمَا يَهُودْ كُلَ. 10وَ اللّٰهْ يَنْطِي مَجْد وَ شَرَفْ وَ سَلَامْ لِأَيِّ نَادُمْ الْقَاعِدْ يِسَوِّي الْخَيْر، أَوَّلْ كَيْ لِلْيَهُودْ وَ بَتَّانْ لِلْمَا يَهُودْ كُلَ. 11أَشَانْ اللّٰهْ يِشِيفْ كُلَّ الْقَبَايِلْ سَوَا سَوَا.
12كُلَّ النَّاسْ الْمَا عِنْدُهُمْ شُرُوطْ التَّوْرَاةْ وَ يَذْنُبُوا، يَهْلَكَوْا بَلَا شُرُوطْ التَّوْرَاةْ. وَ كُلَّ النَّاسْ الْعِنْدُهُمْ شُرُوطْ التَّوْرَاةْ وَ يَذْنُبُوا، اللّٰهْ يِحَاسِبْهُمْ حَسَبْ شُرُوطْ التَّوْرَاةْ. 13أَشَانْ النَّاسْ الصَّالِحِينْ قِدَّامْ اللّٰهْ، هُمَّنْ مَا النَّاسْ الْيَعَرْفُوا شُرُوطْ التَّوْرَاةْ، لَاكِنْ هُمَّنْ النَّاسْ الْيِطَبُّقُوا شُرُوطْ التَّوْرَاةْ. هُمَّنْ بَسْ النَّاسْ الْاللّٰهْ يَجْعَلْهُمْ صَالِحِينْ. 14النَّاسْ الْمَا يَهُودْ مَا عِنْدُهُمْ شُرُوطْ التَّوْرَاةْ. وَ لَاكِنْ وَكِتْ هُمَّنْ بِنُفُوسْهُمْ يِطَبُّقُوهُمْ حَتَّى كَانْ مَا عِنْدُهُمْ شُرُوطْ التَّوْرَاةْ كُلَ، هُمَّنْ بِقَوْا مِثِلْ عِنْدُهُمْ شُرُوطْ التَّوْرَاةْ فِي نُفُوسْهُمْ. 15وَ بِمِثِلْ دَا، حَالْهُمْ تِوَصِّفْ كَدَرْ شُرُوطْ التَّوْرَاةْ مَكْتُوبِينْ فِي قُلُوبْهُمْ. وَ قُلُوبْهُمْ يَشْهَدَوْا لَيْهُمْ وَ أَفْكَارْهُمْ مَرَّاتْ يَتْهَمَوْهُمْ وَ مَرَّاتْ يِدَافُعُوا لَيْهُمْ. 16وَ حَسَبْ بِشَارَةْ الْمَسِيحْ النِّبَلِّغْهَا، دَا كُلَّ كَيْ يَبْقَى وَاضِحْ فِي الْيَوْم الْاللّٰهْ يِحَاسِبْ فَوْقَهْ النَّاسْ بِوَاسِطَةْ عِيسَى الْمَسِيحْ. وَ هُو يِحَاسِبْ النَّاسْ فِي الْعَمَلْ الْيِسَوُّوهْ بِعَشِيرْ.
نِفاق اليَهُود
17وَ لَاكِنْ أَسْمَعْ، إِنْتَ التُّقُولْ إِنْتَ يَهُودِي وَ تُخُطّ قَلْبَكْ فِي شُرُوطْ التَّوْرَاةْ وَ تِسْتَكْبَرْ أَشَانْ اللّٰهْ هُو رَبَّكْ 18وَ تُقُولْ تَعَرِفْ الشَّيّءْ الْهُو يِدَوْرَهْ وَ تَقْدَرْ تِمَيِّزْ الْعَدِيلْ مِنْ الْمَا عَدِيلْ أَشَانْ قَرَيْت شُرُوطْ التَّوْرَاةْ. 19إِنْتَ تَحْسِبْ نَفْسَكْ قِيدْ لِلْعَمْيَانِينْ وَ نُورْ لِلنَّاسْ الْقَاعِدِينْ فِي الضَّلَامْ 20وَ مُعَلِّمْ لِلْجُهَّالْ وَ أُسْتَاذْ لِلْأَطْفَالْ أَشَانْ عِنْدَكْ فِي التَّوْرَاةْ الْمَعْرَفَةْ الْكَامِلَةْ وَ الْحَقّ.
21إِنْتَ دَا التِّعَلِّمْ النَّاسْ الْآخَرِينْ، مَالَا مَا تِعَلِّمْ نَفْسَكْ؟ فِي تَعْلِيمَكْ تُقُولْ: «مَا تَسْرِقْ» وَ لَاكِنْ مَالَا إِنْتَ تَسْرِقْ؟ 22وَ تُقُولْ: «مَا تَزْنَى» وَ لَاكِنْ مَالَا إِنْتَ تَزْنَى؟ إِنْتَ تَكْرَهْ الْأَصْنَامْ مَرَّةْ وَاحِدْ وَ لَاكِنْ مَالَا تَسْرِقْ خُمَامْ مِنْ بُيُوتْهُمْ؟ 23إِنْتَ تِلْفَشَّرْ بِشُرُوطْ التَّوْرَاةْ وَ لَاكِنْ مَالَا إِنْتَ تِخَالِفْ شُرُوطْ التَّوْرَاةْ بِالشَّيّءْ الْإِنْتَ قَاعِدْ تِسَوِّيهْ؟ وَ بِمِثِلْ دَا، إِنْتَ تِتَلِّفْ أُسُمْ اللّٰهْ. 24أَشَانْ دَا بَسْ، الْكِتَابْ بُقُولْ: <بِسَبَبْكُو إِنْتُو، الْأُمَمْ يَحْقُرُوا أُسُمْ اللّٰهْ.>#2:24 الكلام دا تلقوه في إشَعْيا 52:5، حسب الترْجمة اليونانيّة.
25الطَّهُورَةْ عِنْدَهَا لَيْك فَايْدَةْ كَنْ تِتَابِعْ شُرُوطْ التَّوْرَاةْ. لَاكِنْ كَنْ تِخَالِفْ شُرُوطْ التَّوْرَاةْ، خَلَاصْ إِنْتَ الْمُطَهَّرْ بِقِيتْ مِثِلْ النَّادُمْ الْمَا مُطَهَّرْ. 26وَ كَنْ نَادُمْ وَاحِدْ مَا مُطَهَّرْ يَعْنِي مَا يَهُودِي وَ قَاعِدْ يِتَابِعْ شُرُوطْ التَّوْرَاةْ، نُقُولْ لَيْك اللّٰهْ يَجْعَلْ النَّادُمْ دَا مِثِلْ مُطَهَّرْ. 27وَ بِمِثِلْ دَا، النَّادُمْ الْمَا طَهَّرَوْه فِي جِلْدَهْ وَ لَاكِنْ يِتَابِعْ الشُّرُوطْ، هُو يِوَصِّفْ بِحَالَهْ دِي كَدَرْ إِنْتَ الْيَهُودِي خَاطِي. أَشَانْ عِنْدَكْ الْكِتَابْ وَ الطَّهُورَةْ وَ لَاكِنْ تِخَالِفْ الشُّرُوطْ.
28بِالصَّحِيحْ، الْيَهُودِي مَا يَبْقَى يَهُودِي بِالشَّيّءْ الْيِنْشَافْ فَوْقَهْ. وَ الطَّهُورَةْ الصَّحِيحَةْ مَا قَطِعِينْ الْجِلِدْ بَسْ. 29لَاكِنْ الْيَهُودِي الصَّحِيحْ، هُو يَهُودِي فِي قَلْبَهْ وَ طَهُورْتَهْ، هِي طَهُورَةْ الْقَلِبْ الْجَايَةْ مِنْ رُوحْ اللّٰهْ. وَ طَهُورْتَهْ مَا طَهُورَةْ الْمَكْتُوبَةْ فِي كِتَابْ التَّوْرَاةْ بَسْ. الْيَهُودِي الْمِثِلْ دَا، كَنْ النَّاسْ مَا يَشْكُرُوهْ كُلَ، اللّٰهْ يَرْضَى بَيَّهْ.
Voafantina amin'izao fotoana izao:
رَوْمَا 2: ع.د.ت19
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
La Bible en arabe tchadien © Alliance biblique du Tchad, 2019