संत.जोहन 20
20
ईसु आला जिवीःड-बिरिडोः
(संत.मत्ती 28:1–8; संत.मरकुस 16:1–8; संत.लुकास 24:1–12)
1हपता रअः पहिल हिला मरियम मगदलिनी आँगा-पोटाअ काबुर दुबाःड़े हीःग नेनाय, आउर टुकू के मारघटा तरअः ओचोअ ऊना नेल लःअय। 2हुनी सिमोन पतरस आउर हुनी एटाअ चेला दुबाःड़े, जेके ईसु दुलारी केनाय, नीर हीःग कोअते कंहड़ी लःअय, “हुंकू परभु के मारघटा दुबाःड़े तरअः तुलांग इदी किदयाकु, आउर आले काले पाड़ीआ ची हुनी के ओकाःड़े दोहो तदियाकु।” 3तब पतरस आउर एटाअ चेला मारघटा पखा नीर तोराकिना। 4हुंकिन बनाहोड़ साँघे नीर सेनोः केनाकिन, बकिर एटाअ चेला पतरस तरअः मड़ांग केते मारघटा रे पहिल सोदोर नाय। 5आउर हुनी कोयोअ केते गेन्दरअ भाईर के पड़ाव ओना नेल लःअय। बकिर हुनी भीतरी काय बोलो नेना। 6तब सिमोन पतरस हुनी तयोम-तयोम सोदोर नेनाय, आउर मारघटा भीतीर बोलो नेनाय आउर कफन गेन्दरअ के पड़ाव ऊना नेल लःअय। 7आउर ईसु आला बोहोअ रे जे गमछा लपटाव लअः ताही नेना, कफन गेन्दरअ लोः पड़ाव ऊना कोवान, बकिर आलगे मिएड़े लाटुम खेअ दोहो लअः नेल लःअय। 8तब एटाअ चेला होः जे मारघटा पहिल रे सोदोर थिनाय भीतरी बोलो नेनाय, आउर नेल केते बिसवास लःअय। 9एता लःअय ची हुंकू धरम पुथी रेनअः होना बात काकु समझाव ताही नेना, जेकर मोताबिक हुनी आला जिवीःड-बिरिडोः दरकार थिना। 10नोःआँ तयोम चेला अपन ओड़ाअ रूवाड़ नाकिन।
ईसु मरियम मगदलिनी लोः देखारोअ
(संत.मत्ती 28:9,10; संत.मरकुस 16:9–11)
11मरियम मारघटा दुबाःड़े गी बाहरी रे ईईयाम-केनाय, हुनी ईयाम-यअते काबुर भीतरी कोयोअ लःअय, 12आउर होनाःड़े फिटफिट-पुँड़ी गेन्दरअ उयु उनकिन बनहोंड़ सिरमादूत के दुड़ूः उनकिन नेल लिकिनाय, मियांड के बोहोअ पखा आउर एटाअ के जांगा पखा, जे एड़े ईसु आला गोएःग होड़ो दोहो लअः ताही नेना। 13सिरमादूत हुनी के बेता लियाकिन, “ए आउराईत आम एतान लःअय इयाम दाम?” हुनी उतारा एमा लिकिनाय, “हुंकू ईङ आली परभु के तुलांग इदी किदयाकु आउर ईङ काईंग पाड़ीआ ची हुनी के ओकाःड़े दोहो तदियाकु।” 14नोःआँ कंहड़ी केते, हुनी पछली मुहांड़ लःअय आउर ईसु के होनाःड़े तिंगु उनी नेल लियाय, बकिर हुनी के काय चिनहा दाड़ी लिया ची हुनी ईसु हेके। 15ईसु हुनी के बेता लियाय, “ए आउराईत आम एता लःअय ईयाम दाम? ओके के नाम दियाम?” मरियम हुनी के माली समझाव केते बेता लियाय, “ए हुजूर जदि आम हुनी के तुलांग इदी तदियाम होले ईङ के उदूओईंगमें ची आम हुनी के ओकाःड़े दोहो तदियाम आउर ईङ हुनी के इदीयींग।” 16ईसु नोःआँ रे हुनी के बेता लियाय, “मरियम” हुनी पछली घुमाव केते इब्रानी भाखा रे ईसु के बेता लियाय, “रब्बुनी” चाहे “ए गुरू।” 17ईसु हुनी के बेता लियाय, “ईङ के आलुम छुवाँईंग,” “एता लःअय ची नहाअः जगुत ईङ आपा दुबाःड़े तेंग काईंग सेन ताना। बकिर ईङ आलकु चेला बोकोकु दुबाःड़े सेन केते, बेता कुमे ची ईङ आली बाबा आउर आपे आली बाबा आउर अपन परमेसर आउर आपे आली परमेसर दुबाःड़े तेंग तोराईङा।” 18मरियम मगदलिनी सेन केते चेलाकु के बेता लिकुआय, “ईङ परभु के नेल तदियीङ आउर हुनी ईङ के नोःआँ बात कंहड़ी लःअय।”
चेलाकु रे दिसतार नेनाय
(संत.मत्ती 28:16–20; संत.मरकुस 16:14–18; संत.लुकास 24:36–49)
19हेन हिला, हपता रअः सुरू हिला, आयुबोः बेरा, जब चेलाकु जाहुदीकु रअः बोरते दुवार सिंग-उगुर थिनाकु, ईसु हुंकू तलारे हीःग केते तिंगुअ नाय। हुनी चेलाकु के बेता लिकुआय, “आपे के सानती भेटाअः!” 20आउर नोःआँ तयोम हुंकू के अपन तीः आउर अपन पंजरा उदूओ लिकुआय, तब चेलाकु परभु के नेल केते रिझनाकु। 21ईसु हुंकू के फिन बेता लिकुआय, “आपे के सानती भेटाअः! जे लकान बाबा ईङ के कुलगोःड तदिङाय, हिना लकान ईङ होः आपे के कुलगोःड दिपीईंग।” 22नोःआँ कंहड़ी केते हुंकू रे ओम केते बेता लिकुआय, “पबितर आतमा के गरहनेपे। 23#सं.मत्ती 16:19; 18:18आपे जे आला पाप छमायापे, हुंकू के अपन पाप तरअः छुटकारा भेटाआ, आउर जेकर आला पाप के आपे कापे छमाया, हुंकू अपन पाप तरअः तोल ताहिकोआकु।”
ईसु आला थोमस के दिसतारोः
24ईसु हीःग थिनाय, हिमीन रे बारहों मेसे मियांड थोमस, जेके दिदमुस माने कि जावा बेताई केनाकु, हुंकू लोः काय ताही नेना। 25एटाअ चेलाकु हुनी के बेता लियाकु, “आले परभु के नेल तदियाले” हुनी उतारा एम लःअय, “जब तक ईङ हुनी आला तीः रे काँटी रअः चिनहा इरिंग नेलेआ, काँटी रअः ठाँव रे अपन अंगड़ी इरिंग दोहोय आउर हुनी आला पंजरा रे अपन तीः काईंग सजाय जगुत इरिंग बिसवासेआ।”
26आठ रोज तयोम, हुनी आलकु चेला फिन ओड़ाअ भीतीर रे ताही नेनाकु, आउर थोमस हुंकू लोः ताही नेनाय। जामा दुवार सिंङ लअः ताहिना रे होः ईसु हुंकू तलारे हीःग केते तिंगुअ नाय आउर कंहड़ी लःअय, “आपे के सानती भेटाअः।” 27तब हुनी थोमस के बेता लियाय, “आम अपन अंगड़ी नोड़े दोहोयमे। नेलेमे नोःआँ ईङ आला तीः हेके। अपन तीः जिलींग केते ईङ आला पंजरा रे लगाय में तेकर अबिसवासी कोवान, बकिर बिसवासी बनाअः मे।”
28नोःआँ आयुम केते थोमस उतारा एम लःअय, “ए ईङ आली परभु! ए ईङ आली परमेसर।”
29ईसु हुनी के बेता लियाय, “आम ईङ के नेल केते, ईङ रे बिसवास तदाम। बकिर धनया हुंकू एदान कुआ जे बेगार नेलते बिसवासे-आकु।”
सिरसिरावती नोःआँ पुथी लि-लिखा रअः मतलोब
30ईसु अपन चेलाकु मड़ांग आउर ढेर चिनहा-छकरीत काम देखाव लःअय, जेकर लिखा लअः नोःआँ पुथी रे एम लअः कनोआँ। 31नोःआँ निआँ लःअय लिखा लअः एदनाआ, जेकर से आपे बिसवासेपे ची ईसु गी ख्रीस्त परमेसर आली होपोन हेके। आउर बिसवास केते हुनी आला नुमू तरअः जिनगी नामेकु।
Voafantina amin'izao fotoana izao:
संत.जोहन 20: ASR
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 NLCI CC BY-NC-ND 4.0
